1 ¿Tleka moneki timotlatlaujtiskej?
TLATLAUJTILISTLI. San seki tlamantli tlen kijtoua Biblia okachi kinekij kimatiskej tlakamej uan siuamej. Itech nin tlamachtil tikitaskej chikome tlamantli tlen miakej motlajtlaniaj uan tikitaskej tlen kijtoua iTlajtol toTajtsin Dios. Nin tlamachtil kinpaleuis akinmej ayamo motlatlaujtiaj, ma motlatlaujtikan uan akinmej motlatlaujtiaj, okachi kuali ma motlatlaujtikan.
NOCHTIN akinmej kipiaj inreligión motlatlaujtiaj. Maski san kanin katej, itech teopan, sinagogas, mezquitas, pagodas, santuarios uan sekimej kitekitiltiaj rosarios, nochtin motlatlaujtiaj maski katej inselti noso amo.
Maski onka miak tlamantli tlen yoltok ipan tlaltikpak, san tlakamej uan siuamej ueli timotlatlaujtiaj. Ijkon ken yolkamej tejuan titlakuaj, tikonij atl uan timijyotiaj. Noijki tinesij, timoskaltiaj uan tiixpoliuij (Eclesiastés 3:19). Pero san tejuan timotlatlaujtiaj. ¿Tleka?
Porque ijkuak timotlatlaujtiaj techpaleuia kuali ma timouikakan iuan toTajtsin Dios. Biblia kijtoua toTajtsin Dios ijkon otechchijchi (Eclesiastés 3:11). Jesús okijto: “Ma yolpakikan akinmej kimatij moneki kitemoskej toTajtsin Dios” (Mateo 5:3, TNM).
Axkan tikmatij tleka onka miak templos uan okseki tlamantli tlen ika motlatlaujtiaj uan tleka uejkauaj ijkuak ijkon kichiuaj. Sekimej hasta kitemouaj ikaj ma kinpaleui para amo momachiliskej inselti. Pero, ¿melauak yolpakij ijkuak ijkon kichiuaj? Tejuan amo tichikauakej, san niman tiixpoliuij uan amo nochi tikajsikamatij. San akin amo keman ixpoliui, ixtlamatki uan kipia chikaualistli uelis techpaleuis. Pero ¿tleka timotlatlaujtiaj?
¿Se tonal yomitspanok seki tlamantli amo kuali uan amikaj omitspaleui noso omitsilui tlen uelis tikchiuas? Xamo akin otiktlasojtlaya oixpoliuik, otikchi itlaj amo kuali noso itlaj omonekiaya tikpejpenas, ¿otikmachili amikaj omitsyolseui, amikaj omitstlapojpolui noso amikaj omitsilui tlen uelis tikchiuaskia?
Biblia techiluia ijkuak timotlatlaujtiaj techpaleuia kuali ma tiyetokan. Noijki kijtoua miakej tlakamej uan siuamej okitlatlaujtijkej toTajtsin Dios para ma kinyolseui, ma kintlapojpolui uan ma kinyekana uan okinkak ijkuak itlaj okitlajtlanijkej (Salmo 23:3; 71:21; Daniel 9:4, 5, 19; Habacuc 1:3).
Nochtin akinmej omotlatlaujtiayaj itlaj okimatiayaj. Yejuan okimatiayaj akin kitlatlaujtiskej para ma kinkaki pero axkan miakej amo kimatij akin kitlatlaujtiskej.