“Ninmej kuali tlajtolmej itech Tekiuajkayotl motetlapouis”
“Ninmej kuali tlajtolmej itech Tekiuajkayotl motetlapouis itech nochi tlaltikpak para ma kimatikan nochi altepemej, ijkuakon nochi tlamis” (MATEO 24:14, TNM).
¿Tlen kijtosneki tlen okijto Jesús? Evangelio tlen okijkuilo Lucas kijtoua: “Jesús otlamachtijtijtnemia itech miakeh altepemeh. Ye okintlapowijtinemia de n kualitlájtoli de Dios” (Lucas 8:1). Jesús okinmilui moneki “nitetlapowiti de kan tlanawatia Dios ika n kualitlájtoli intech oksikimeh altepemeh, ken ika ye onechaltítlanki Dios” (Lucas 4:43). Achto okintitlanki imachtijkauan ma tetlapouikan ik kanin ochantiayaj pero satepan okinmilui: “Nonyaskeh nontetlapowitiweh […] itech nochi n tlaltíkpaktli” (Hechos 1:8; Lucas 10:1).
Tlen okichijkej akinmej opejkej kichiuaj ken Cristo. Imachtijkauan san niman opejkej kichiuaj tlen okinnauati. Ik non, Hechos 5:42 kijtoua: “Nochi tonati itech Weyi Tiopa iwa itech kalmeh, n tlatematiltijkeh otlamachtiayah iwa otetlapowiayah Jesús, Ye n Cristo”. Nochtin otetlapouiayaj, amo san sekimej. Ixtlamatki August Neander okijto: “Se tlakatl tlen itoka Celso opejki kinpinauiaj akinmej opejkej kichiuaj ken Cristo porque otetlapouiayaj maski amo ixtlamatkej, amo okixmatiayaj letra, san otekipanouayaj ika ichkatsojmitl, okinyektlaliayaj kakmej uan okichijchiuayaj tsotsoli”. Jean Bernardi akin okijkuilo Les premiers siècles de L’Église (Los primeros siglos de la Iglesia) kijtoua, akinmej okichiuayaj ken Cristo omonekiaya “tetlapouiskej san kanin uan itech nochi tlaltikpak. Ipan ojtli, uejueyij altepemej, kanin tlanemakaj uan itech kalmej maski kinkakiskiaj noso amo”.
¿Axkan akinmej ijkon kichiuaj? Teopixki anglicano David Watson kineltoka miakej amo mouikaj iuan toTajtsin Dios, porque akinmej katej teopan amo kintlapouiaj nion kinmachtiaj tlen kijtoua Biblia. Itech amochtli ¿Por qué se van los católicos?, José Luis Pérez Guadalupe kijtoua, iTlaixpantijkauan Jehová san sekan tetlapouiaj itech nochi kalmej porque “kuali moyekanaj” amo ken evangélicos, adventistas uan okseki religiones.
Miak ipati tlen okijto Jonathan Turley itech amochtli Cato Institute (Cato Supreme Court Review, 2001-2002) ye okijto: “Ijkuak miakej kikakij tokayotl ‘iTlaixpantijkauan Jehová’, san niman mokuayejyekouaj akinmej tetlajpalouaj itech nochi kalmej maski amo kinchiaj. Ijkon kichiuaj amo para kichiualtiskej oksekimej ma kineltokakan tlen yejuan tlamachtiaj, kichiuaj porque ijkon kiueyichiuaj inDios”.
[Recuadro]
¿Yitikmati akinmej?
Tlen yotimomachtijkej ika Biblia, kiteititia akinmej melauak kichiuaj ken Cristo, ¿yitikmati akinmej? Katej miakej religiones uan kijtouaj kichiuaj ken Cristo. Pero xikilnamiki tlen okinnejmachti Jesús idiscípulos: “Amo nochteh akimeh nechiliah: ‘¡Noteko, Noteko!’, kalakiskeh kan Dios tlanawatia. Sanwel akimeh kichiwah tlan kimonekiltia Notajtsi non kajki ilwikak” (Mateo 7:21). Ik non, tla tikneki ma mitsteochiua toTajtsin Dios ijkuak iTekiuajkayo tlanauatis ipan tlaltikpak, moneki tikinmixmatis akinmej kichiuaj tlen kineki toTajtsin Dios uan inmiuan timonechikos. ¿Mitspaktiskia okachi tikmatis tlen kichiuas nin Tekiuajkayotl? (Lucas 4:43). Tla ijkon tikneki, timitsyoleuaj ximotlapoui iuan iTlaixpantijkauan Jehová akinmej omitsmakakej nin amatlajkuilol.