¿Tleka moneki tikpatioitas iTekiuajkayo toTajtsin Dios?

Sapanoa miakej tlaltikpaktlakamej kichiaj iTekiuajkayo toTajtsin Dios ma kiyektlali nochi. Ik non, kichiuaj ken Jesús okinnauati imachtijkauan; ye okinmilui ma motlatlaujtikan: “Ma uiki motekiuajkayo. Ma mochiua motlanekilis, ken itech iluikak, noijki itech Tlaltikpak” (Mateo 6:10, Traducción del Nuevo Mundo).

Miakej tlaneltokalismej amo kipatioitaj iTekiuajkayo toTajtsin Dios, maski miakej tlaltikpaktlakamej kipatioitaj nin Tekiuajkayotl. Se tlakatl tlen itoka H. G. Wells okitlajtlachialtiaya ken Jesús sapanoa okipatioitaya “tlen Jesús okitokayoti Tekiuajkayotl tlen kajki Iluikak”, pero itech nin Tekiuajkayotl “miakej tlaneltokalismej amo okachi tlamachtiaj”.

TiiTlaixpantijkauan Jehová amo ken oksekimej tlaneltokalismej, tejuan nochipa titetlapouiaj itech iTekiuajkayo toTajtsin Dios. Se neskayotl, revista tlen okachi moixmati, tlen axkan tiktlajtoltijtok mochijchiua ika 220 tlatlamantli tlajtolmej uan itech nochi Tlaltikpak amo onka okse revista ken nin pampa sejse metstli moxexeloaj uan mochijchiuaj kanaj 46 millones. ¿Uan itech tlen techtlapouia? San xikita tokayotl tlen mota itech iixko nin revista: Akin Tetlapouijtok. Kitematiltia iTekiuajkayo Jehová.a

¿Tleka sapanoa titetlapouiaj itech nin Tekiuajkayotl? Pampa nochi tlen ijkuilitok itech Biblia techtlapouia itech nin Tekiuajkayotl. Uan noijki melauak titlaneltokaj san iTekiuajkayo toTajtsin Dios uelis kiyektlalis nochi tlen techtlajyouiltia.

San timochijchikauaj tikchiuaskej ken Jesús. Ye okachi okipatioitaya iTekiuajkayo toTajtsin Dios uan itech otetlapouiaya (Lucas 4:43). ¿Tleka sapanoa okipatioitaya? ¿Ken mitspaleuis iTekiuajkayo toTajtsin Dios? Timitsyoleuaj ximomachti tlen kijtoa Biblia itech nin revista.