Ma timochijchikauakan pampa okachi kuali titetlapouiskej
1. ¿Tlen neskayomej itech achto siglo kiteititiaj moneki timochijchikauaskej pampa okachi kuali titetlapouiskej?
1 Akinmej tikchiuaj ken Cristo, moneki timochijchikauaskej pampa okachi kuali titetlapouiskej. Ik non, Jesús okinmachtiaya imachtijkauan pampa okachi kuali tetlapouiskej (Luc. 9:1-5; 10:1-11). Noijki ijkon okichijkej Áquila uan Priscila pampa okimachtijkej Apolos uan “okiyekajsikamatiltijkeh itlamachtilis Dios” (Hech. 18:24-26). Pablo noijki ijkon okichi, okilui Timoteo ma mochijchikaua pampa okachi kuali tlamachtiskia uan ‘nochteh kitaskiah kiyekchiwa iteki’, maski kuali yotlamachtiaya (1 Tim. 4:13-15). Ik non, maski youejka tiktekichiuiliaj toTeko noso amo, moneki nochipa timochijchikauaskej pampa okachi kuali titetlapouiskej kuali tlajtolmej.
2. ¿Tlen moneki tikchiuaskej pampa timomachtiskej ken tetlapouiaj oksekimej?
2 Ma tikchiuakan ken oksekimej. Pampa okachi kuali titetlapouiskej moneki tikchiuaskej ken oksekimej (Prov. 27:17). Ik non, ijkuak titetlapouiaj moneki kuali tikitaskej ken tetlapouia tokni akin iuan tiauij. Ma tikintlajtlanikan akinmej kuali tetlapouiaj tlen uelis tikchiuaskej, uan kuali ma tikinkakikan tlen techiluiskej (Prov. 1:5). ¿Techchiuilia oui oksepa tikintlajpalotiuij akinmej otechkakej, tikpeualtiskej se tlamachtil ika Biblia, noso tikchiuaskej okse tekitl itech tetlapouilistli? Tla ijkon, ma timotlapouikan iuan tokni akin kiyekana se nechikol pampa akinmej tetlapouiaj noso okse tokni tlen kuali tetlapouia pampa ma techpaleuikan. Ik non, nochipa ma tiktlatlaujtikan Jehová, uan ma tiktlajtlanilikan iespíritu santo pampa okachi kuali titetlapouiskej (Luc. 11:13).
3. ¿Ken moneki tikitaskej ijkuak techiluiskej ken uelis okachi kuali titetlapouiskej?
3 Ijkuak ikaj techiluis ken uelis okachi kuali titetlapouiskej maski amo otiktlajtlanijkej, amo ma tikualanikan (Ecl. 7:9). Ijkon ken Apolos, ma tikselikan ika yolyamanilistli uan ma tiktlasojkamatikan. Tla ijkon tikchiuaskej tikteititiskej ixtlamatilistli (Prov. 12:15).
4. ¿Tlen okijto Jesús tlen miak ipati pampa okachi kuali titetlapouiskej?
4 Kiueyichiua Jehová pampa okachi kuali titetlapouiaj. Se neskayotl, Jesús okinyolchika imachtijkauan okachi kuali ma tetlapouikan. Okijto ye ken ikuajyo uvas uan akinmej tlapejpenalmej ken imamayo. Uan iTajtsin Jesús kiteki imamayo pampa “okachi matlaaki” noso ma tlamochiua (Juan 15:2). Ijkon ken akin kitoka uvas kineki okachi ma tlamochiua, Jehová kineki okachi ma timochijchikauakan pampa okachi kuali titetlapouiskej uan “matikweyijkachiwakah ika totlajtol” (Heb. 13:15). ¿Tlen panos tla okachi kuali titetlapouiaj? Jesús technankilia: “Notajtsi kiselia weyílistli ijkuak nomejwah nonkitemakah miak nomotlakilo” (Juan 15:8).