¿Otikmatiaya?

¿Yiuejkika ken okimatiayaj opeuaya okse xiuitl uan okse metstli?

IJKUAK hebreos okatkaj itech tlali tlen toTajtsin Dios okinmakak, xiuitl opeuaya ijkuak okiyektlaliayaj tlali uan otlatokayaj, non okichiuayaj itech septiembre noso octubre.

Para kimatiskiaj keski tonal kipiaskia se metstli, omoyekanayaj ika metstli (luna). Desde ijkuak selik hasta ijkuak chikaua uejkaua 29 noso 30 tonalmej. Para kimatiskiaj keski tonal kipiaskia se xiuitl, omoyekanayaj ika tonaltsin. Se xiuitl tlen okipouayaj ika tonaltsin okachi uejkaua uan amo ijkuak okipouayaj tonalmej ika metstli. Ik non, para kajxitiliskiaj tonalmej tlen okipolouaya, omonekiaya itlaj kichiuaskej. Xamo okajxitiliayaj seki tonalmej sejse metstli, ijkuak ayamo opeuaya okse xiuitl. Ijkon ijkuak otokayaj noso opixkayaj yokatka okse xiuitl.

Ijkuak okatka Moisés, Jehová okilui ialtepe xiuitl santo omonekiaya peuas metstli abib noso nisán (axkan ye marzo noso abril) (Éx. 12:2; 13:4). Non metstli israelitas oiluichiuayaj, ijkuakon okimakayaj Jehová achto cebada tlen okololouayaj (Éx. 23:15, 16).

Se ixtlamatki tlen omotokayotiaya Emil Schürer okijto: “Amo okatka oui kimatiskiaj keman kitlaliskiaj okse metstli itech calendario: iluitl Pascua tlen omonekiaya kichiuaskej itech chikauak metstli (luna llena) okatka metstli Nisán (14 de Nisán) itech primavera, ijkuak youak noijki ouejkauaya ijkon ken tonal [...]. Tla ijkuak itlamian xiuitl okitayaj kichiuaskiaj Pascua pero ayamo opeuaya primavera, okajxitiliayaj okse metstli ijkuak ayamo opeuaya metstli Nisán” (Historia del pueblo judío en tiempos de Jesús 175 a. C. - 135 d. C).

ITlaixpantijkauan Jehová noijki ijkon tikchiuaj para tikmatiskej tlen tonal tikilnamikiskej iCena toTeko, non mochiua itech marzo noso abril ijkuak uetsi 14 de nisán icalendario hebreo. Tinochtin techiluiaj keman tikilnamikiskej iCena toTeko.a

¿Pero ken okimatiayaj hebreos keman opeuaya uan otlamiaya se metstli? Axkan para tikmatiskej, techpaleuia se calendario noso se dispositivo electrónico. Pero yiuejkika okatka oui kimatiskej.

Ijkuak okatka Noé, sejse metstli okipiaya 30 tonalmej (Gén. 7:11, 24; 8:3, 4). Satepan itech calendario hebreo amo nochi metstli okipiaya 30 tonalmej. Metstli okipouayaj ijkuak opeuaya selik metstli (luna creciente), ijkuak yopanouaya 29 noso 30 tonalmej, opeuaya okse metstli.

Se tonal David uan Jonatán okijtojkej mostlatika yetoskia luna nueva, ijkuakon peuaskia okse metstli (1 Sam. 20:5, 18). Ik non, xamo itech siglo 11 achto itech xiuitl se, yokimatiayaj keman peuaskia okse metstli. ¿Ken okimatiayaj israelitas keman peuaskia okse metstli? Amochtli Misná tlen kijtoua tlen okichiuayaj judíos, kijtoua ijkuak yejuan okiskej Babilonia. Ijkuak oajsiaya tonal 30, kualkan omonechikouayaj Sanedrín (judíos tlen otlanauatiayaj), ijkon okichiuayaj chikome metstli uan ijkon okimatiayaj keman opeuaya okse metstli. ¿Ken okimatiayaj?

Okintitlaniayaj sekimej tlakamej inajnakastlan altepetl Jerusalén ijkuak yiyouak para ma kitakan iluikak. Ijkuak yikin tepitsin opeuaya omotaya metstli, san niman okinmiluiayaj akinmej opouiayaj itech Sanedrín. Ijkuak okitayaj nochi tlen omonekiaya, ijkuakon okijtouayaj tlen tonal opeuaya okse metstli. Pero ¿tlamo okitayaj metstli porque otlamixtemiaya? Okijtouayaj metstli tlen okatka kipiaskia 30 tonalmej uan mostlatika opeuaya okse metstli.

Amochtli Misná kijtoua akinmej opouiayaj itech Sanedrín ijkon okiteititiayaj ijkuak otlaxotlaltiayaj itech tepetl Olivos, amo uejka kanin okatka Jerusalén uan oksekimej tepemej kanin otlamotaya. Satepan ayakmo otlaxotlaltiayaj uan okintitlaniayaj sekimej para ma kijtokan keman opeuaya okse metstli. Ijkon nochtin judíos tlen ochantiayaj Jerusalén uan itech okseki altepemej, okimatiayaj keman opeuaya okse yankuik metstli uan ijkon yokimatiayaj keman omonekiaya kichiuaskej iluitl.

Tlen nikan mota techpaleuia ma tikajsikamatikan keman peuaskia metstli, tlen metstli oiluichiuayaj uan tlen estaciones yetoskiaj itech calendario hebreo.