Sekimej techtlajtlaniaj

Ijkuak Jesús okichi iCena, ¿kanin okatkaj 70 discípulos tlen okintitlanka matetlapouitij? ¿Ayakmo iuan omouikayaj?

Amo matimokuayejyekokan 70 discípulos okikajkej Jesús noso ayakmo okinseliaya porque amo iuan okatkaj ijkuak okichi iCena. Ye okinekiaya yetos san inuan iapóstoles non tonal.

Jesús kuali omouikaya inuan 12 apóstoles uan noijki inuan 70 discípulos. Pero okinpejpenki 12 tlakamej tlen okatkaj idiscípulos uan okintokayoti apóstoles (Luc. 6:​12-16). Jesús okatka ompa Galilea ijkuak “okinnechiko 12 apóstoles” uan “okintitlanki matetlapouitij iTekiuajkayo toTajtsin Dios uan makinpajtitij kokoxkej” (Luc. 9:​1-6). Satepan ik sur ompa Judea “okinpejpenki ok 70 discípulos uan okintitlanki ojome” (Luc. 9:51; 10:1). Ikinon ik kanin otetlapouiayaj yokatkaj discípulos.

Sejse xiuitl judíos tlen opejkej kichiuaj ken Cristo ok okichiuayaj Pascua xamo inuan infamilia (Éx. 12:​6-11, 17-20). Jesús oyajki inuan iapóstoles ompa Jerusalén ijkuak yikimiktiskiaj. Pero ye amo okinmilui idiscípulos tlen ochantiayaj Judea, Galilea uan Perea iuan makichiuatij Pascua. Non kiteititia xamo Jesús okinekiaya yetos san inuan iapóstoles. Ikinon okinmilui: “Yoniknekiaya namouan nikkuas nin Pascua ijkuak ayamo peua nitlajyouia” (Luc. 22:15).

¿Tleka Jesús okinekiaya yetos san inuan iapóstoles? Porque non tonal kichiuaskia itlaj miak ipati. Ye kimiktiskiaj ken “Ichkatsin iaxka toTajtsin Dios tlen kipojpolos tlajtlakoli ipan tlaltikpak” (Juan 1:29). Ijkuak israelitas okichiuayaj Pascua uan okikuayaj ichkatsin, okinmilnamiktiaya Jehová okinmakixti Egipto. Pero ijkuak Jesús mikiskia kinpaleuiskia miakej mamomakixtikan (1 Cor. 5:​7, 8). Noijki imikilis Jesús kinpaleuiskia 12 apóstoles makintlalikan tlanechikolmej (Efes. 2:​20-22). Tetlajtlachialti porque altepetl Jerusalén tlen kajki iluikak motlakxilijtok “ipan 12 temej” uan ipan nonmej temej ijkuilitok “intoka 12 iapóstoles Ichkatsin” (Apoc. 21:​10-14). Nochi non kiteititia apóstoles tlapaleuiskiaj mamochiua tlen toTajtsin Dios kineki. Xamo ikinon Jesús okinekiaya yetos inuan iapóstoles ijkuak okichi saiktlami Pascua uan satepan okinmilui makilnamikikan iCena.

Non tiotlak 70 discípulos uan oksekimej amo okatkaj iuan Jesús. Pero Cena tlen okinnauati makilnamikikan kinpaleuiskia nochtin discípulos tlen amo kikauaskiaj. Porque nochtin discípulos tlen Jehová kinpejpenaskia pouiskiaj itech se acuerdo para tlanauatiskej ijkon ken Jesús okinmilui iapóstoles non youak (Luc. 22:​29, 30).