Rémora tlen ueli mopepechoua

Se michin tlen itoka rémora ueli mokitskia itech oksekimej michimej uan ueli mokajkaua uan amo kinkojkoua nonmej michimej. Non yokintlajtlachialti ixtlamatkej.

Ximokuayejyeko nin: Non michin mopepechoua intech ballenas, rayas, tiburones, ayomej uan oksekimej michimej maski ineuayo tlakuauak. Kinkua inokuiliuan uan tlen yejuan ayakmo kikuaj. Noijki uelis nemis ijtik atl uan amitlaj uelis kichiuiliskej. Ixtlamatkej momachtijtokej tleka rémora ueli mopepechoua itech okseki tlamantli.

Seki rémoras omopepechojkej itech tiburón ballena

Michin rémora kipia itlaj inpan itsonteko tlen kipaleuia ma mopepecho intech okseki michimej, kipia itlaj yamanki tlen kipaleuia kuali ma mopepecho. Noijki kipia uitstli uan tlakuauak. Ijkuak majkokui uitstli mopepechoua itech okse michin uan kipaleuia ma molini. Ken rémora kuali mopepechoua itech okse michin ken kuali mokitskijtok amo mokajkaua maski michin totoka molinia.

Ixtlamatkej kintlajtlachialtia tlen kipia itech itsonteko michin rémora, ik non, okichijchijkej se tepostli tlen mopepechoua ken nin michin. Uan uelis mopepechos san kanin, ijkuak okinekiayaj kitlakajkaualtiskej oui porque sapanoua chikauak omokitskitoka maski amo ueyi.

Ixtlamatkej uelis kichiuaskej miak tlamantli ika tlen kitaj kipia michin rémora. Noijki uelis ika kintemoskej michimej tlen katej ijtik atl noso para kimatiskej tlen onka ijtik mar. Noijki uelis kinpaleuis ma kipepechokan seki teposmej ipan puentes noso barcos para ma kintlauili ijtik atl.

¿Tlen timokuayejyekoua? ¿Ikaj okichijchi rémora tlen ueli mopepechoua?