Todd Aki/Moment Open via Getty Images
¿IKAJ OKICHIJCHI?
Mantarraya kualtsin kichipaua itlakual
Ijkuak mantarrayas tlakuaj san kitlapouaj inkamak ijkuak ajkuij uan kitolouaj atl uan okuilintsitsintin tlen intoka plancton. Nin ome tlamantli panoua kanin mochipaua itlakual hasta ajsiti itech inkech kanin kintolouaj okuilintsitsintin. Atl tlen kitolouaj oksepa kikixtia itech ibranquias. Ijkuak mantarraya kikixtia atl ok kintsakuilia okuilintsitsintin para amo makisakan maski kanin kichipaua itlakual uejueyi tlapotok. Se ixtlamatki tlen itoka Ed Yong okijto: “Nin tlamantli amo ueliskia ijkon panos”.
Ximokuayejyeko: Kanin mantarraya kichipaua itlakual yetoskia ken kipia makuili arcos tlen mota ken tsikauastli. Sekimej arcos tlen motaj ken tsikauastli peua moliniaj ik tlayekapan uan oksekimej ik tlakuitlapan. Nin kichiua seki atl mapano ipan uan okseki atl mapano itlajkotia arcos tlen motaj ken tsikauastli, ijkon mochiuaj seki remolinos. Okuilintsitsintin tlen intoka plancton san mouitekij itempa arcos tlen motaj ken tsikauastli. Ijkuak ijkon panoua atl kichiua nochi tlakuali maajsiti itech ikech mantarraya.
Maski sekimej okuilintsitsintin sapanoua tsikitsitsintin amo kisaj porque remolinos tlen kichiua ika atl kipaleuia maajsi itech ikech mantarraya. Nin tlamantli tlen kichiua mantarraya para kichipauas itlakual kipaleuia amo mamokopa itlakual itech mar.
Noijki kanin kichipaua itlakual mantarraya amo keman motsakua uan iselti mochipaua. Maski nin michin motlaloua ijkuak ajkui, kintoloua okuilintsitsintin uan miak atl san niman mochipaua.
Akinmej tlatemouaj kinekij kichiuaskej seki tlamantli ijkon ken kichipaua itlakual mantarraya. Yejuan kinekij kichijchiuaskej se tepostli para kichipauaskej atl tlen sokio.
¿Ken tikita?: Tlen kichiua mantarraya para kichipauas itlakual ¿san iselti omochi noso ikaj okichijchi?