Timoyolkokouaj ijkuak ixpoliui akin otiktlasojtlayaj

“Sofiaa uan ne yotikpiayaj 39 xiuitl otimonamiktijkej, ye sapanoua omokokouaya uan satepan oixpoliuik. Noyolikniuan onechyolchikauayaj uan miak tlamantli otikchiuayaj. Pero se xiuitl sapanoua onimoyolkokouaya. Ualeua kuali onikatka pero san niman oksepa amo kuali onimomachiliaya. Maski yopanok eyi xiuitl oixpoliuik nosiua ok nimoyolkokoua” (Kostas).

¿Oixpoliuik ikaj akin otiktlasojtlaya? Tla ijkon yomitspanok, xamo otimomachili ken Kostas. Onka seki tlamantli tlen sapanoua techyolkokoua noso techtekipachoua. Ijkuak ixpoliui tonamik, se tofamiliar noso se toyolikni. Ixtlamatkej kijtouaj melauak ijkon panoua. Se revista tlen itoka The American Journal of Psychiatry okijto: “Ijkuak ikaj ixpoliui mokuayejyekoua ayakmo keman kitaskej uan sapanoua moyolkokoua”. Xamo ijkuak ixpoliui akin okitlasojtlayaj motlajtlaniaj: “¿Uejkauas ijkon nimomachilis? ¿Se tonal ok niyolpakis? ¿Tlen uelis nechpaleuis ma nimoyolseui?”.

Nonmej tlajtlanilmej monankiliaj itech nin revista ¡Ma titlachixtokan! Itech okse tlamachtil kijtoua seki tlamantli tlen xamo tejuatsin mitspanotok porque oixpoliuik akin otiktlasojtlaya. Itech okseki tlamachtilmej tikitas tlen uelis tikchiuas uan xamo non mitspaleuis amo okachi ximoyolkokojto.

Tiknekij nin revista ma kinpaleui uan ma kinyolchikaua akinmej tlajyouijtokej porque oixpoliuik akin okitlasojtlayaj.