“ITekiuajkayo toTajtsin Dios kichiuas ma yeto yolseuilistli”

ITekiuajkayo toTajtsin Dios tlanauatis itech nochi tlaltikpak. Yimiak xiuitl tikchiaj ma tlanauati porque techpaleuis san sekan ma tiyetokan ika yolseuilistli. Ijkon kijtoa Salmo 72:7 yetos “miak yolseuilistli” itech nochi tlaltikpak. Pero ¿keman peuas ualtlanauatis iTekiuajkayo toTajtsin Dios? ¿Ken kichiuas? ¿Ken techpaleuis nin Tekiuajkayotl?

¿KEMAN PEUAS UALTLANAUATIS ITEKIUAJKAYO TOTAJTSIN DIOS?

Biblia kijtoa tlen panoskia ijkuak yipeuas ualtlanauatis iTekiuajkayo toTajtsin Dios. Panoskia guerras, apistli, kokolistli, tlalolinis uan momiaktilis tlen amo kuali (Mateo 24:3, 7, 12; Lucas 21:11; Apocalipsis 6:2-8).

Okse profecía kijtoa: “Iksemi tonatijmeh yetos miak tlaijyowílistli. N tlakah yetoskeh xíkojteh, satlawel kiwilitaskeh tomi [...] [amo] kintlakitaskeh intajwah. Amo kimatiskeh motlasojkamatiskeh iwa [amo] ok kitlakitaskeh Dios. [Amo] kimatiskeh tetlasojtlaskeh nion tetlapojpolwiskeh. Satlawel kiwilitaskeh tepojpoaskeh iwa amo kixikoskeh tlan amokuali kelewis inkuerpo, tetlaijyowiltiskeh iwa kikokoliskeh tlan kuali. [...] Ayakmó pinawaskeh nion [amitlaj] kixmawiliskeh. Moyolpaktijtinemiskeh ika tlan amo kuali kelewia inkuerpo, iwa ayakmó kitemoskeh Dios” (2 Timoteo 3:1-4). Maski yiuejkika ijkon panotiuits, axkan okachi kichiuaj nin tlamantli.

Nin profecías opejki mochiuaj 1914. Sekimej ixtlamatkej uan políticos kijtoaj itech 1914 opejki panoa miak tlamantli. Se ixtlamatki danés itoka Peter Munch, okijkuilo: “Ijkuak opejki guerra itech 1914, nochi ompa opejki tlen axkan panotok. Achto kuali otikatkaj pero itech non xiuitl opejki titlajyouiaj, temomojti tlen panoa uan amo kuali tikatej”.

Pero noijki panotos seki tlamantli tlen kuali. Nin yetoskia ken ijkuak itlaj techpanoa uan timoyolkokoaj pero satepan timoyolseuiaj. Nochi tlen yotikijtojkej kiteititia iTekiuajkayo toTajtsin Dios yiualtlanauatis tlaltikpak. Jesús okijto tlen kuali panoskia: “Ninmej kuali tlajtolmej itech Tekiuajkayotl motetlapouis itech nochi tlaltikpak para ma kimatikan nochi altepemej, ijkuakon nochi tlamis” (Mateo 24:14, TNM).

TiiTlaixpantijkauan Jehová titetlapouiaj ninmej kuali tlajtolmej. Ik non, tikpiaj se revista tlen itoka Akin Tetlapouijtok. Kitematiltia iTekiuajkayo Jehová. Ompa kijtoa ken techpaleuis iTekiuajkayo toTajtsin Dios uan tlen kichiuas itech tlaltikpak.

¿KEN PEUAS UALTLANAUATIS ITEKIUAJKAYO TOTAJTSIN DIOS?

Ma tikitakan naui tlamantli:

1. Itech nin Tekiuajkayotl amo tlanauatiskej políticos.

2. Políticos tlen katej itech nochi tlaltikpak kinekiskej ok tlanauatiskej uan kixnamikiskej iTekiuajkayo toTajtsin Dios (Salmo 2:2-9).

3. ITekiuajkayo toTajtsin Dios kinmachiuas tekiuajkej porque kinekiskej ok tlanauatiskej (Daniel 2:44; Apocalipsis 19:17-21). Ijkuakon, Biblia kijtoa peuas Armagedón ijkuak ijkon kichiuaskej tekiuajkej (Apocalipsis 16:14, 16).

4. Akinmej kipaleuiskej iTekiuajkayo toTajtsin Dios amitlaj kinpanos ijkuak peuas Armagedón uan nochipa chantiskej itech se xochitlali. Biblia kijtoa sapanoa miakej yetoskej (Apocalipsis 7:9, 10, 13, 14).

¿KEN TECHPALEUIS NIN TEKIUAJKAYOTL?

Tla tiknekij ma technauati iTekiuajkayo toTajtsin Dios moneki timomachtiskej Biblia. Ik non, Jesús okijto ijkuak okitlatlaujti iTajtsin: “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3).

Sapanoa techpaleuis tla tikixmatiskej toTajtsin Dios. Ma tikitakan ome tlamantli. Achto, techpaleuia ma titlaneltokakan itech toTajtsin Dios. Non techpaleuia ma tikneltokakan iTekiuajkayo melauak onka uan san niman ualtlanauatis (Hebreos 11:1). Okse tlamantli, techpaleuia ma tiktlasojtlakan toTajtsin Dios uan oksekimej. Tiktlasojtlaj toTajtsin Dios, ik non, tiktlakamatij ika nochi toyolo. Noijki tikintlasojtlaj oksekimej uan tikchiuaj tlen okijto Jesús: “Xikchiwakah tlan kuali, ijkó kemi nomejwah nonkinekih makichiwakah tlan kuali nomowah” (Lucas 6:31).

ToTajtsin Dios akin otechchijchi kineki kuali ma tiyetokan. Ye kineki ma tikpiakan yolilistli tlen amo keman tlamis (1 Timoteo 6:19). Axkan amo tikpiaj non melauak yolilistli. Miakej mochijchikauaj kuali yetoskej. Pero ¿ken tiyetoskej ijkuak tikpiaskej yolilistli tlen amo keman tlamis? Ma tikitakan seki tlamantli tlen kichiuas nin Tekiuajkayotl.