Ma kimatikan monauatiskej

¿TLEN KIJTOSNEKI?

Tla tikmatij timonauatiskej:

• tikmatiskej timochiaskej

• tikmatiskej tlen moneki tikchiuaskej

• tikchiuaskej tlen moneki maski amo techpaktia

• tikitaskej tlen kinpoloa oksekimej

¿TLEKA MIAK IPATI?

Konemej tlen kimatij monauatiskej amo kichiuaskej tlen amo kuali maski kinyoltilanas. Pero tlen amo kimatij monauatiskej:

• kinteuiskej oksekimej

• moyolkokoskej

• tlachichinaskej, kintekitiltiskej drogas uan tlauanaskej

• noijki ayakmo kuali tlakuaskej

Ixtlamatkej okitakej ijkuak konemej kimatij monauatiskej, ijkuak moskaltiaj amo kinpoloa tomin, amo moouijtiliaj uan amo okachi mokokoaj. Ik non, Angela Duckworth akin tlamachtia itech Universidad ompa Pensilvania, okijto: “Nochipa techpaleuia tla tikmatij timonauatiskej”.

¿KEN NANKINMACHTISKEJ MA MONAUATIKAN?

Ualeua moneki nankinmiluiskej amo nankichiuaskej tlen kinekij

PRINCIPIO BÍBLICO KIJTOA: “San xikijtokah tla ‘ejé’, ‘ejé’, noso tla ‘amó’, ‘amó’” (Mateo 5:37).

Ualeua konemej motlaueltiaj ijkuak itlaj kinekij ma kinmakakan intatajuan uan noijki ijkon kichiuaj inmixpan oksekimej. Tla intatajuan kinmakaj tlen kinekij, kinmititiaj san moneki motlaueltiskej ijkuak itlaj kinekiskej.

Pero tla tetajmej kinmiluiaj amo kinmakaskej tlen kinekij, kinmachtiaj amo uelis tikpiaskej nochi tlen tiknekij. Se psicólogo itoka David Walsh, okijkuilo: “Okachi yolpakij akinmej kimatij amo uelis kipiaskej nochi tlen kinekij. Ik non, amo tikteititiskej tikintlasojtlaj tla nochipa tikinmakaskej tlen kinekij”.a

Tla axkan nankinmiluiskej namokoneuan amo nankichiuaskej tlen kinekij, ijkuak moskaltiskej amo oui kixtopeuaskej drogas, amo auilnemiskej uan amo kichiuaskej tlen kintlajyouiltis.

Xikinmititikan tlen panos tla kichiuaskej tlen kuali noso tlen amo kuali

PRINCIPIO BÍBLICO KIJTOA: “Amo ximokajkayawakah: amaka weletis kikajkayawas Dios. Nochteh kipixkah tlan kitookah” (Gálatas 6:7).

Namokoneuan moneki kajsikamatiskej tlen panos tla kichiuaskej tlen kuali noso tlen amo kuali. Ik non, moneki kimatiskej monauatiskej porque tlamo tlajyouiskej. Ma tikitakan tlen uelis kinpanos. Amo kinpiaskej inyolikniuan tla san niman tlananankiliaj ijkuak itlaj kinmiluiaj. Pero tla amo san niman kualanij, kimatij namechkakiskej uan kimatij mochiaskej, oksekimej kinekiskej inmiuan yetoskej. Xikinmititikan ma kimatikan monauatiskej porque ijkon kuali yetoskej ijkuak moskaltiskej.

Xikinmititikan tlen moneki okachi kipatioitaskej

PRINCIPIO BÍBLICO KIJTOA: “Nochipa nonkimatiskeh ken ijki nonkipejpenaskeh tlan okachi kuali” (Filipenses 1:10).

Tikmatiskej timonauatiskej amo san techpaleuis amo ma tikchiuakan tlen amo kuali, noijki techpaleuia ma tikchiuakan tlen moneki maski amo techpaktia. Namokoneuan moneki kimatiskej tlen okachi ipati uan non achto ma kichiuakan. Ma tikijtokan kinekij mauiltiskej pero uelis nankinmiluiskej achto ma kichiuakan intarea.

Xikchiuakan tlen nankijtoaj

PRINCIPIO BÍBLICO KIJTOA: “Porke ijkó kemi Ne onikchi moneki no ijkó xikchiwakah” (Juan 13:15).

Namokoneuan kitaj tlen nankichiuaj ijkuak itlaj amo namechpaktia noso ijkuak itlaj namechkualania. Ik non, xikteititikan nankimatij nanmonauatiskej porque ijkon amo nanmoouijtiliskej. Ximotlajtlanikan: “¿Tlen nikchiua ijkuak nokoneuan amo nechtlakamatij? ¿San niman nikualani noso nikmati nimochias?”.