Ma yetokan yolyamankej

¿TLEN KIJTOSNEKI?

Akinmej yolyamankej tetlakaitaj. Amo moueyinekij nion kichiaj ma kinpatioitakan. Kinekij tepaleuiskej uan kinekij kichiuaskej tlen kuali kichiuaj oksekimej.

Sekimej kijtoaj akinmej yolyamankej amo yolchikauakej. Pero akinmej yolyamankej kilnamiktokej motlapololtiaj uan amo ueli nochi kichiuaj.

¿TLEKA MIAK IPATI?

• Tla konemej yolyamankej, oksekimej kinpaktis inmiuan yetoskej. Amochtli La epidemia del narcisismo, kijtoa: “Yolyamankej okachi mouikaj iuan oksekimej” uan “amo oui kitaj teuan motlapouiskej”.

• Kuali yetoskej ijkuak moskaltiskej. Amo san axkan kinpaleuis tla konemej yetoskej yolyamankej, noijki ijkuak moskaltiskej. Kinpaleuis ijkuak kitemoskej tekitl. Se psicólogo uan tepajti tlen itoka Leonard Sax, okijto: “Se telpochtli tlen moueyineki uan kilkaua amo nochi ueli kichiua, amo kimakaskej tekitl ijkuak kitemoti. Pero xamo kimakaskej tla kikakis akin kitemaka tekitl”.a

¿KEN NANKINMACHTISKEJ MA YETOKAN YOLYAMANKEJ?

Xikinpaleuikan amo ma moueyinekikan

PRINCIPIO BÍBLICO KIJTOA: “Akin kimolia weyijkatitok, iwa amo milák, san ye inewia mokajkayawah” (Gálatas 6:3).

• Amo xikinmiluikan tlen amo melauak. Amo xikinmiluikan: “Mochiuas nochi tlen nanmokuayejyekoaj” noso “uelis nankichiuaskej nochi tlen nankinekij”. Tla ijkon nankinmiluiskej, xamo kinekiskej ijkon kichiuaskej pero amo nochipa mochiuas tlen kinekij. Tla namokoneuan kichiuaskej itlaj tlen amo okachi oui uan mochijchikauaskej, okachi kuali yetoskej ijkuak moskaltiskej.

• Xikinyolchikauakan ijkuak itlaj kuali kichiuaj. Amo nankinpaleuiskej ma yetokan yolyamankej namokoneuan tla nankinmiluiskej nochi kuali kichiuaj. Okachi nankinpaleuiskej tla nankinmiluiskej tlen kuali okichijkej.

• Xikinmititikan ken moneki kintekitiltiskej redes sociales. Miakej itech redes sociales moueyinekij uan kiteititiaj tlen kuali kichiuaj. Pero non amo kinpaleuia ma yetokan yolyamankej.

• Xikinmachtikan san niman ma kijtokan ma kintlapojpoluikan. Ijkuak itlaj amo kuali kichiuaskej, xikpaleuikan ma kajsikamatikan omotlapololtijkej.

Xikinmititikan ma motlasojkamatikan

PRINCIPIO BÍBLICO KIJTOA: “Nochipa ximotlasojkamatikah” (Colosenses 3:15).

• Nochi tlen onka. Konemej moneki ma kipatioitakan nochi tlen okichijchi toTajtsin Dios porque techpaleuia ma tiyoltokan. Ma kimatokan timikiskej tlamo tikpiaskej atl, ejekatl uan tlen tikkuaskej. Non kinpaleuis ma kipatioitakan uan ma kitlasojkamatikan nochi tlen onka.

• Ma kitakan kuali inyelis oksekimej. Xikinmachtikan namokoneuan amo ma moxikokan tla oksekimej itlaj okachi kuali kichiuaj. Amo ma kinnexikolitakan porque yejuan noijki uelis ijkon kichiuaskej.

• Xikinmititikan ma motlasojkamatikan. Xikinmachtikan ma motlasojkamatikan ika nochi inyolo. Ijkon nankinpaleuiskej ma yetokan yolyamankej.

Xikinmititikan miak ipati ma kinpaleuikan oksekimej

PRINCIPIO BÍBLICO KIJTOA: “Xikinmitakah n oksikimeh kemi okachi weyijkatitokeh. Amaka makimotemoli san tlan ye kipalewia, yej makitemo tlan ika weletis kimpalewis oksikimeh” (Filipenses 2:3, 4).

• Xikinmiluikan ma tlapaleuikan kalijtik. Tla amo nankinmiluiaj ma namechpaleuikan, xamo mokuayejyekoskej okachi ipati tlen yejuan kinekij kichiuaskej. Achto moneki tlapaleuiskej uan satepan mauiltiskej. Xikinmachtikan ken kinpaleuia oksekimej tla kichiuaskej tlen nankinnauatiaj uan ijkon okachi kinpatioitaskej uan kintlasojtlaskej.

• Xikinmiluikan se tlateochiualistli tlapaleuiskej. Tla kinpaleuiskej oksekimej, okachi yetoskej ixtlamatkej. Ik non, xikitakan akin moneki ma kipaleuikan uan ken uelis tlapaleuiskej namokoneuan. Xikinyolchikauakan ijkuak ikaj kipaleuiaj.