ToTajtsin Dios techmaka ixtlamatilis para tiyolpakiskej iuan tofamilia

Tlakatl moneki kitlasojtlas isiua

“Moneki n tlakatl makitlasojtla isiwa, kemi ye inewia kitlasojtla ikuerpo. Porke akin kitlasojtla isiwa, noiwa ye motlasojtla. Porke amaka kikokolia ikuerpo, yej kimalwia iwa kitlakualtia. Ijkó noiwa kichiwa Cristo inwah non kimajmanah ikuerpo” (EFESIOS 5:28, 29).

Tlakatl ye akin kiyekana ifamilia (Efesios 5:23). Tlakatl amo kitlajyouiltia isiua, amo kichiualtia ma kichiua nochi tlen kiluia, kimaka tlen ika mopanoltis uan kimaluia para kuali ma momachili. Kichiua ma yolpaki uan amo san kitemoua kichiuas tlen ye kineki (Filipenses 2:4). Ijkuak motlapouia iuan isiua, kiluia tlen mokuayejyekoua uan ken momachilia uan ye noijki kikaki tlen isiua kiluia. Amo kajua, amo kiteuia nion kiluia itlaj tlen kiyolkokos (Colosenses 3:19).

Siuatl moneki kitlakaitas inamik

“Tesiwa noiwa makitlakita [itlaka]” (EFESIOS 5:33).

Siuatl uan inamik kuali katej ijkuak kipaleuia tlen ye kipejpena kichiuas. Ijkuak inamik siuatl motlapololtia ye amo kiluia tlen uelis kiyolkokos, kitlakaita uan amo san niman kualani (1 Pedro 3:4). Tla itlaj kitekipachoua, kitlakaita inamik ijkuak kitlapouia uan noijki kimati keman moneki kiluis (Eclesiastés 3:7).

Amo ximomekatikan

“Tlakatl [...] mosetilis iuan isiua uan moneki mochiuaskej san se tlalnakayotl” (GÉNESIS 2:24).

Ijkuak se tlakatl uan se siuatl monamiktiaj okachi kuali mouikaj. Ik non, ome moneki mochijchikauaskej para nochipa kuali mouikaskej. ¿Ken uelis ijkon kichiuaskej? Moneki motlapouiskej uan kijtoskej tlen melauak onka itech inyolo uan nochipa moneki itlaj kimotetliokoliskej. Amo keman ma momekatikan porque non tetlajyouiltia uan kichiua ayakmo kuali ma mouikakan (Hebreos 13:4).

Tetajmej xikinmachtikan namokoneuan

“Kuali xikmachti chokotsin para kuali ma uia uan maski kipias miak xiuitl kichiuas tlen kuali” (PROVERBIOS 22:6).

ToTajtsin Dios okinkauili tetajmej ma kinmachtikan inkoneuan, moneki kinmachtiskej ken kipiaskej inyelis, tetajmej kuali ma yeknemikan para inkoneuan ijkon ma kichiuakan (Deuteronomio 6:6, 7). Tla konemej kichiuaj itlaj tlen amo kuali, amo inmiuan ma kualanikan, moneki kinkakiskej, ‘amo san nima tlajtoskeh nion kualaniskeh’ (Santiago 1:19). Uan tla tetajmej kinekij kinyektlaliskej, ijkon ma kichiuakan pero amo porque inmiuan kualanij, ijkon ma kichiuakan porque kintlasojtlaj.

Konemej xikintlakamatikan namotatajuan

“[Konemej], xikintlakitakah nomotajwah [...]. ‘Xiktlakita mopapá iwa xiktlakita momamá’” (EFESIOS 6:1, 2).

Konemej moneki nochipa ma kintlakamatikan iuan ma kintlakaitakan intatajuan. Non kichiua kuali inmiuan ma mouikakan uan ma yolpakikan. Ijkuak yikipiaj miak xiuitl kiteititiaj kintlakaitaj intatajuan ijkuak kinmaluiaj. Kinyektlaliliaj inkalijtik para kuali ma yetokan uan ijkuak moneki kinpaleuiaj para ma kipiakan tlen ika mopanoltiskej (1 Timoteo 5:3, 4).