AXKAN PANOUA TLEN AMO KUALI

3 | Xikinmalui akinmej tikintlasojtla

¿TLEKA MONEKI IJKON TIKCHIUAS?

Ijkuak okachi panoua tlen amo kuali, miakej amo kitaj ijkuak ayakmo okachi mouikaj inmiuan akinmej kintlasojtlaj.

Miakej kinekij yetoskej inselti.
Akinmej yomonamiktijkej okachi mokualaniaj.
Tetajmej ayakmo kintekipachoua tlen kinpanoua inkoneuan.

¿Otikmatiaya?

Moneki tikinpiaskej toyolikniuan porque ijkuak titlajyouiaj, yejuan uelis techpaleuiskej para kuali matimomachilikan uan amo okachi matimotekipachokan.
Tla mofamilia sapanoua motekipachoua, uelis tlajyouiskej.
Konemej uelis okachi kinmojtis tlen kitaj itech noticias.

¿Tlen uelis tikchiuas?

Biblia kijtoua: “Se melauak toyolikni nochipa kiteititia techtlasojtla uan ye se tokni tlen kajki ijkuak timoyolkokouaj” (Proverbios 17:17).

Xiktlapoui akin uelis mitsajsikamatis uan mitspaleuis. Tla tikilnamiktok ikaj mitstlasojtla, mitspaleuis xitlaxiko ijkuak itlaj mitspanos.

¿TLEN MITSPALEUIS? Nikan kijtoua seki tlamantli

Xikinmalui akinmej tikintlasojtla, xikchiua tlen nikan kijtoua

KUALI XIMOUIKA IUAN MONAMIK NOSO MOSIUA

Kuali ximouika iuan monamik noso mosiua

Biblia kijtoua: “Okachi kuali ome uan amo san se [...]. Uan tla se uetsi, iyolikni uelis kipaleuis” (Eclesiastés 4:9, 10). Tlakatl uan siuatl amo moneki yetoskej ken itech tlatlamantli equipos tlen mauiltiaj, para tlatlaniskej moneki yetoskej san sekan itech se equipo.

Tla itlaj mitstekipachoua, amo xikualani iuan monamik noso mosiua. Kuali nanyetoskej tla tikmati timochia uan titlaxikoua.
Maski san se uelta itech semana ximotlapouikan tlen namechtekipachoua. Xikitakan ken nankiyektlaliskej uan amo ximokualanikan.
San sekan xikchiuakan tlen namechpaktia.
Xikilnamikikan tlen kualtsin yonamechpanok. Xamo uelis nankitaskej fotos tlen onankinkixtijkej ijkuak onanmonamiktijkej noso ijkuak onankichijkej okse tlamantli.

“Xamo akin monamiktia amo nochipa kipaktis tlen kipejpenas inamik noso isiua. Pero uelis mopaleuiskej ijkuak itlaj kipejpenaskej uan moneki mochijchikauaskej kuali kichiuaskej tlen okipejpenkej” (David).

NOCHIPA XIMOUIKA INMIUAN MOYOLIKNIUAN

Nochipa ximouika inmiuan moyolikniuan

Xikilnamikto amo moneki san moyolikniuan mamitsyolchikauakan, tejuatsin noijki moneki tikinyolchikauas. Tla ijkon tikchiuas, noijki timoyolchikauas.
Mojmostla xiktlapoui se moyolikni para tikmatis ken kajki.
Xikintlajtlani moyolikniuan tlen yokinpaleui matlaxikokan, ijkuak okinpanok tlen mitspanotok.

“Ijkuak mitspanotok tlen amo kuali, yetoskia ken ijkuak ejekakiaui, moyolikniuan uelis mitspaleuiskej xikmati tlen tikchiuas. Xamo mitsilnamiktiskej tlen yitikmati. Moyolikniuan kintekipachoua tlen mitspanoua. Ijkon ken te noijki mitstekipachoua tlen kinpanoua” (Nicole).

XIKINMAJSIKAMATI MOKONEUAN

Xikinmajsikamati mokoneuan

Biblia kijtoua: “Nonnochteh san xitlamatokah ijkuak nonkinkakiskeh oksikimeh, amo san nima xitlajtokah” (Santiago 1:19). Xamo mokoneuan amo kinekiskej mitsiluiskej tlen kintekipachoua noso tlen kinmojtia. Tla kuali tikinkakis, mitsiluiskej ken momachiliaj.

Tla kuali momachiliaj mokoneuan mitsiluiskej tlen kintekipachoua. Uelis ijkon nankichiuaskej ijkuak kanaj nannejnemitiuij noso nanyauij itech carro uan amo ijkuak nanmotlaliaj para inmiuan nanmotlapouiskej.
Xikinmalui para amo san makikaktokan noticias.
Xikinmilui tlen tikchijtok para tikinmaluis.
Xikita tlen uelis tikchiuas iuan mofamilia ijkuak itlaj panotikisa.

“Ximotlapoui inmiuan mokoneuan uan xikkaua makijtokan tlen kimachiliaj. Xamo momojtiaj noso kualanij uan amo mitsiluiaj. Xikinmilui te noijki ijkon timomachilia uan tlen tikchijtok para okachi kuali timomachilis” (Bethany).