¿TLEN TIKCHIUASKEJ IJKUAK TLAPATIOUA?
Okachi tlapatiouas
Xamo amo tikitaj ijkuak tlapatioua porque okachi techtlaxtlauiaj. Pero xamo timotekipachoskej tla tlapatiouas uan ayakmo okachi techtlaxtlauiskej. Uelis okachi timotekipachoskej tla tikpiaj tofamilia porque moneki tikinmakaskej tlen ika mopanoltiskej.
Amo uelis tikchiuaskej amo matlapatioua pero techpaleuis tla tikilnamiktokej okachi tlapatiouas.
¿TLEKA MIAK IPATI?
Tla tikilnamiktokej amo uelis tikchiuaskej ayakmo matlapatioua, amo oui tikchiuaskej nin tlamantli:
Timoyolseuiskej. Okachi kuali timokuayejyekoskej uan kuali tikpejpenaskej tlen tikchiuaskej tla timoyolseuijtokej.
Tiyetoskej tiixtlamatkej. Non techpaleuis matiktlaxtlauakan tlen moneki uan amo matimotomintlamikan.
Amo timokualaniskej iuan tofamilia tla amo techajxilia tomin.
Tikitaskej tlen moneki tikkouaskej. Non kijtosneki amo tikkouaskej tlen amo moneki uan ijkon amo timotomintlamiskej.
¿TLEN UELIS TIKCHIUASKEJ?
Matikilnamiktokan ayakmo uelis okachi timotlakouiskej. Amo okachi matimotlakouikan ijkuak tlapatioua. Miakej kinekij nochi kimokouiskej maski amo kipiaj tomin pero san okachi moouijtiliaj. Pero akinmej ijkon kichiuaj yetoskia ken ajkuij ijtik atl tlen chikauak yaui. Satepan sotlauaj uan ayakmo ueli itlaj kichiuaj. Tinochtin techtekipachoua tikpiaskej tlen ika mopanoltiskej tofamilia. Pero okachi miak ipati matikintlasojtlakan, inuan matiyetokan uan matikitakan tlen kinpanoua.
Miakej kinekij nochi kimokouiskej maski amo kipiaj tomin pero akinmej ijkon kichiuaj yetoskia ken ajkuij ijtik atl tlen chikauak yaui.