¿TLEN TIKCHIUASKEJ IJKUAK TLAPATIOUA?

Matiktemakakan tlen tikpiaj

Xamo tikitaskej oui tiktemakaskej tlen tikpiaj porque okachi tlapatioua uan amo tikpiaj tomin. Pero techpaleuis tla ijkon tikchiuaskej. Matikitakan ken uelis tikololoskej tomin uan tiktemakaskej tlen tikpiaj.

¿TLEKA MIAK IPATI?

Tla tiktemakaskej tlen tikpiaj maski amo miak tlamantli, tipakiskej uan kuali timomachiliskej. Tepajtijkej yokitakej tla tiktemakaskej tlen tikpiaj, techpaleuia amo matimokokokan uan kuali matimokuayejyekokan. Noijki amo san timotekipachojtoskej, amo timosotlauaskej, kuali yetos topresión, amitlaj techkokos uan okachi kuali tikochiskej.

“Okachi yolpaki akin itlaj kitemaka uan amo ijkuak itlaj kiselia” (Hechos 20:35).

Okachi amo oui tikseliskej matechpaleuikan tla tikinpaleuiaj oksekimej ijkuak itlaj moneki noso kinpoloua tomin. Se tlakatl tlen itoka Howard uan chanti Inglaterra okijto: “Nosiua uan ne nochipa tikitaj ken uelis tikinpaleuiskej oksekimej. Ijkon amo tikitaj oui tikseliskej matechpaleuikan ijkuak moneki”. Matikinpaleuikan oksekimej ika nochi toyolo uan amo matikchiakan matechkopilikan tlen tikinmakaj. Ijkon tikinpiaskej toyolikniuan tlen uelis techpaleuiskej ijkuak moneki.

“Xikinmakakan oksekimej tlen nankipiaj uan yejuan noijki namechmakaskej tlen kipiaj” (Lucas 6:38).

¿TLEN UELIS TIKCHIUASKEJ?

Matikinmakakan oksekimej tlen tikpiaj. Uelis tiktemakaskej se tlakualtsintli tlen amo patio maski amo tikpiaj miak tlamantli. Duncan uan ifamilia chantij Uganda uan yejuan amo kipiaj miak tlamantli pero kinpaktia kitemakaskej tlen kipiaj. Duncan okijto: “Nosiua uan ne nochi domingo ikaj tikyoleuaj matlakuati tochan maski amo tikchiuaj se tlakuali patio. Ijkon tikchiuaj porque techpaktia tiyetoskej inuan oksekimej”.

Achto matimotlapouikan iuan tofamilia ijkuak itlaj tiktetliokoliskej (Job 17:5).

Matikchiuakan nin tlamantli: Uelis ikaj tiktliokoliskej se tlakualtsintli maski amo patio noso uelis tikmakaskej itlaj makoni. Tla tikpiaj itlaj tlen ayakmo tiknejnekij, uelis tiktliokoliskej se toyolikni noso ikaj tlen tikixmatij.

Matikitakan ken uelis tikinmakaskej oksekimej tlen tikpiaj. Amo moneki tomin para itlaj tiktetliokoliskej. Uelis tiyetoskej inuan oksekimej uan matikinpaleuikan ijkuak moneki. Ijkon tikteititiskej techtekipachoua tlen kinpanoua. Oksekimej kitaskej tikinmakaj se kualtsin tetliokolil tla tikinyeknotsaj. Ikinon matikinmiluikan oksekimej tikintlasojtlaj uan tikpatioitaj tlen kichiuaj.

Matikchiuakan nin tlamantli: Matikinmiluikan oksekimej uelis tikinpaleuiskej ijkuak itlaj moneki kichiuaskej inkalijtik noso ijkuak itlaj kiyektlaliskej. Noijki uelis tikinkouilitiuij tlen kinpoloua. Matikintlajkuililikan toyolikniuan uan matikinmiluikan tikintlasojkamatiliaj tlen kichiuaj noso matikinmiluikan tikinmilnamikij.

Tipakiskej tla tikitaj ken uelis tikinmakaskej oksekimej tlen tikpiaj.

“Amo xikilkauakan nankichiuaskej tlen kuali uan nankinmakaskej oksekimej tlen nankipiaj” (Hebreos 13:16).

Se tlakatl uan se siuatl kipaleuiaj se siuatl tlen yikipia miak xiuitl. Yejuan kololouaj xiuitl tlen youaki uan ye itlaj totonik okinmakak makonikan.