ToTajtsin Dios techyoleua ma timochiuakan tiiyolikniuan

ToTajtsin Dios kineki ma timochiuakan tiiyolikniuan. ¿Tikmatia tejuatsin ke uelis timochiuas iyolikni Akin okachi ueyi itech Tlaltikpak uan iluikak? Abrahán, akin yiuejkika nemia, okitokayotijke iyolikni toTajtsin Dios (Santiago 2:23). Biblia tlajtoa itech oksekimej tlakamej uan siuamej akin noijki omochijkej iyolikniuan toTajtsin Dios uan okiselijkej ueyi tlateochiualismej. Ipan nin tonalmej, miakej tlaltikpaktlakamej mochijtokej iyolikniuan toTajtsin Dios. Tejuatsin noijki uelis timochiuas iyolikni.

Okachi kuali tikpias toTajtsin Dios ken moyolikni ke tikpias ken moyolikni se tlaltikpaktlakatl. ToTajtsin Dios amo keman kinkaua iyolikniuan tlen yolmelajkej (Hebreos 13:5). Timouikas iuan toTajtsin Dios okachi kuali ke tikpias miak tomin. Ijkuak mikij akinmej kipiaj miak tomin, oksekimej mokaua ika intomin. Akinmej kuali mouikaj iuan toTajtsin Dios kipiaj tlen melauak ipati uan amo akaj uelis kinkixtilis (Mateo 6:19).

Uelis sekimej amo kinekiskej ximomachti tlen toTajtsin Dios tlamachtia. Akinmej kichiuaskej nin uelis yetoskej moyolikniuan noso mochanejkauan (Mateo 10:36, 37). Tla akaj mitsuejuetskilia noso mitsmomojtia, ximotlajtlani: “¿Akin nikneki nikyolpaktis, tlaltikpaktlakamej noso toTajtsin Dios?”. Ximokuayejyeko: tla akaj mitsiluiskia amo xitlakua, ¿tikchiuaskia? ¡Amo! Tla tiknekij tiyoltoskej moneki titlakuaskej. ¡ToTajtsin Dios uelis kichiuas xiyolto nochipa! Ik non, ximomachtijto ken uelis timochiuas iyolikni toTajtsin Dios uan amo xikaua itlaj ma mitstsakuili (Juan 17:3).