Ma tikixtopeuakan tlaneltokalistli tlen amo melauak

Satanás uan amo kuali iejekauan amo kinekij ma tiktekichiuilikan toTajtsin Dios. Kinekij kinxeloskej tlaltikpaktlakamej itech toTajtsin Dios. ¿Ken kichiuaj? Ika tlaneltokalistli tlen amo melauak (2 Corintios 11:13-15). Se tlaneltokalistli amo melauak tla amo tlamachtia tlen melauak itech Biblia. Tlaneltokalistli tlen amo melauak kajki ken tomin tlen amo melauak: moita melauak maski amo itlaj ipati. Tlaneltokalistli tlen amo melauak uelis techtlajyouiltis.

Tlaneltokalistli tlen amo melauak amo uelis kiyolpaktis Jehová, akin kijtoa tlen melauak. Ijkuak Jesús okatka ipan Tlaltikpak, tlayekankej teopixkej kinekiaj kimiktiskej. Yejuan omokuayejyekoayaj ke okiueyichiuayaj toTajtsin Dios ken ye kineki. Okijtoayaj: “Tejuan tikpiaj san se topapan, topapan yen toTajtsin Dios”. ¿Ijkon mokuayejyekoaya Jesús? ¡Amo! Ye okinnankili: “Namejuan namopapan yen diablo” (Juan 8:41, 44). Axan, miakej tlaltikpaktlakamej mokuayejyekoaj kiueyichiuaj toTajtsin Dios ken ye kineki, maski non amo melauak, pampa yejuan kitekichiuiliaj Satanás uan amo kuali iejekauan (1 Corintios 10:20).

Ijkon ken se kuauitl tlen palantok amo kuali kitemaka itlakilotl, tlaneltokalistli tlen amo melauak kichiua tlaltikpaktlakamej ma kichiuakan tlamantli tlen amo kuali. Itech nochi Tlaltikpak onka miak ouijkayotl pampa tlaltikpaktlakamej kichiuaj tlen amo kuali. Onka miak auilnemilis, moteuiaj, tlachtekij, tetlajyouiltiaj, temiktiaj uan oksekimej tlamantli tlen amo kuali. Miakej akinmej kichiuaj ijkon kipiaj intlaneltokalis, maski ijkon, intlaneltokalis amo kinyolinia ma kichiuakan tlen kuali. Tla yejuan amo kikauaj tlamantli tlen amo kuali, amo uelis mochiuaskej iyolikniuan toTajtsin Dios (Mateo 7:17, 18).

Tlaneltokalistli tlen amo melauak tlamachtia ma motlatlaujtikan innauak teotsitsintin. ToTajtsin Dios kijtoa amo ma timotlatlaujtikan innauak teotsitsintin. ¿Tleka? ¿Techpaktiskia akaj tlen amo keman technotsa ma kinotsa se totlaixkopinal? ¿Uelis yetos toyolikni? ¡Amo uelis! Jehová kineki ke tlaltikpaktlakamej ma motlatlaujtikan san ye inauak uan amo innauak teotsitsintin tlen amo yoltokej (1 Corintios 8:4).

Tlaneltokalistli tlen amo melauak tlamachtia ke uelis kinmiktiskej oksekimej tlaltikpaktlakamej ijkuak onka guerras. Jesús okijto ke iyolikniuan toTajtsin Dios motlasojtlaskiaj se iuan okse. Amo tikinmiktiaj akinmej tikintlasojtlaj (Juan 13:35). Nion uelis tikinmiktiskej tlaltikpaktlakamej tlen amo yolkualmej. Ijkuak akinmej okikokoliayaj Jesús okikitskijkej, ye amo okinkauili imachtijkauan ma moteuikan pampa ma kipaleuikan (Mateo 26:51, 52).

Tlaneltokalistli tlen amo melauak tlamachtia ke tlaltikpaktlakamej tlen amo yolkualmej tlajyouiskej itech miktlan kanin tlatlatoskej nochipa. Biblia tlamachtia ke tlajtlakol motlaxtlaua ika mikilistli (Romanos 6:23). Jehová ye tetlasojtla. Ken Jehová tetlasojtla, ¿tetlajyouiltiskia nochipa ijkon? ¡Amo! Itech Xochitlal yetos san se tlaneltokalistli, tlaneltokalistli tlen Jehová kiselia (Apocalipsis 15:4). Nochtin tlaneltokalismej tlen tlamachtiaj itlakajkayaualis Satanás kinmixpoloskej.