¿Tlen techpanoa ijkuak timikij?

Mikilistli amo ijkon ken nemilistli. Mikilistli ijkon ken ijkuak se kuali kochtok (Juan 11:11-14). Akinmej yomikej amo ueli tlakakij, nion ueli tlachiaj, nion tlajtoaj, nion ueli mokuayejyekoaj (Eclesiastés 9:5, 10). Tlaneltokalistli tlen amo melauak tlamachtia ke akinmej yomikej yauij kanin nemij espíritus pampa nemiskej iuan inkojkoluan. Amo ijkon tlamachtia Biblia.

Akinmej yomikej amo uelis techpaleuiskej nion uelis itlaj techchiuiliskej. Miakej tlaltikpaktlakamej kinmiluichiuiliaj uan kintlamaniliaj mikamej pampa yejuan kineltokaj ke ijkon kinyolpaktiaj. Maski ijkon, nin tlaneltokilistli amo kiyolpaktia toTajtsin Dios pampa nin uits itech itlakajkayaualis Satanás. Uan noijki amo kinyolpaktia akinmej yomikej, pampa yejuan amo yoltokej. Amo ma tikinmakasikan nion ma tikinueyichiuakan akinmej yomikej. San toTajtsin Dios moneki tikueyichiuaskej (Mateo 4:10).

Mikamej oksepa kinyolitiskej. Satepan, Jehová kinmixitis mikamej pampa nemiskej itech se xochitlal tlen yetos ipan Tlaltikpak (Juan 5:28, 29; Hechos 24:15). ToTajtsin Dios uelis kinmixitis akinmej yomikej ijkon ken tejuan tikixitiaj akin kochtok (Marcos 5:22, 23, 41, 42).

Satanás noso Diablo kichijtok ke miakej tlaltikpaktlakamej ma kineltokakan ke amo timikij, non se tlakajkayaualis. Satanás uan amo kuali iejekauan kichiuaj ma mokuayejyekokan tlaltikpaktlakamej ke mikamej kipiaj se espíritu tlen amo miki, uan uelis techkokolismakaskej noso techtlajyouiltiskej. Satanás kinkajkayaua tlaltikpaktlakamej, kemantika ika kochtemikilis noso kichiua ma kinmitakan mikamej. Ik non, Jehová kinmixpolos akinmej kinekij motlapouiskej iuan mikamej (Deuteronomio 18:10-12).