Tetlajchiuilis amo kuali

Satanás kineki ma tikneltokakan uan ma tikchiuakan tetlajchiuilis. Miakej tlaltikpaktlakamej kintlamaniliaj mikamej noso espíritus pampa amo ma kinchiuilikan tlen amo kuali. Ijkon kichiuaj pampa kinmakasij mikamej noso espíritus. Ninmej tlaltikpaktlakamej momailpiaj itlaj chichiltik pampa yejuan kineltokaj ijkon mopaleuiaj. Mopajtiaj ika ejekapajtli, yauij kanin kinpopoaj ika xiuitl, ika teksistli noso totoltetl pampa kineltokaj ika mopaleuiskej. Sekimej itech inkalijtik kipiloaj ajos, herraduras uan oksekimej tlamantli pampa kineltokaj uelis kinpaleuis. Uan oksekimej kitekitiltiaj “pajtli” tlen kinmaka tetlajchiuiani pampa kineltokaj uelis kinpaleuis okachi ma tlanemakakan noso ma kipiakan innamik.

Tla timochiuaj tiiyolikniuan Jehová, Satanás amo itlaj uelis techchiuilis. ToTajtsin Jehová uan iángeles kipiaj okachi miak chikaualistli ke Satanás uan amo kuali iejekauan (Santiago 2:19; Apocalipsis 12:9). Jehová kineki kinpaleuis ika ichikaualis akinmej iyolikniuan tlen amo keman kikauaj (1 Pedro 3:12).

ITlajtol toTajtsin Dios kijtoa amo ma titetlajchiuikan. Jehová kinmixpolos akinmej tetlajchiuiaj uan akinmej kintlajtlanilia ma kinpaleui, tetlajchiuilis uelis techtlalis itech ima Satanás noso Diablo (Levítico 19:26; Gálatas 5:20, 21).