Ken omomalui Jesús

JEHOVÁ ualeua kichiua seki tlamantli para kinmaluis telpochmej uan akinmej amo ueli inselti momaluiaj. Itech tlalan xamo tikita ken totomej kinmaluiaj inkoneuan, ijkon ken tejuan techmaluia Jehová pero xamo amo ijkon otikitaya.

Matikijtokan ijkuak tinejnemi itech ojtli tikita se tototl uan timokuayejyekoua xamo kikokouaj iajasuan porque amo ueli patlani. Ijkuak tikneki tikkitskis motlaloua uan satepan patlani. Nin tototl amo melauak okikokouayaj iajasuan ¿tleka ijkon okichi?...

Porque ik ompa okatkaj ikoneuan, tototl amo okinekiaya xikinmajsi ikoneuan noso itlaj xikinchiuili. Ik non, okichi ken okikokouayaj iajasuan para amo ik ompa xipano. ¿Tikmati akin uelis techmaluis ijkon ken nin tototl kinmaluia ikoneuan?... Itech Biblia kijtoua Jehová ken se águila tlen kinmaluia ikoneuan (Deuteronomio 32:11, 12).

Jehová sapanoua kitlasojtla Jesús uan ijkuak ye okatka iluikak okipiaya miak chikaualistli uan iselti omomaluiaya. Pero ijkuak oneski ken se konetl nikan tlaltikpak, omonekiaya ikaj kimaluis.

Jesús omonekiaya moskaltis para uelis kichiuaskia tlen Jehová okinauati. Pero Satanás okinekiaya kimiktis para amo mamoskalti. ¿Tikneki tikmatis tlen opanok?... Matikitakan ken Satanás okinekiaya kimiktis Jesús uan ken okimalui Jehová.

Satepan ijkuak oneski Jesús, Satanás okichi itech iluikak ik kanin kisa tonaltsin, mapetlani itlaj tlen omotaya ken se sitlali. Sekimej tlakamej tlen omomachtiayaj ken katej sitlalimej, oyajkej ik kanin opetlaniaya non sitlali uan oajsito Jerusalén. Ompa otlajtlankej kanin nesiskia akin kinnauatiskia judíos. Yejuan okintlajtlanijkej sekimej tlakamej tlen okimatiayaj tlen kijtoua Biblia uan okinmiluijkej nesiskia Belén (Mateo 2:1-6).

Satepan tekiua Herodes tlen otlanauatiaya Jerusalén, okimatki oneski se yankuik tekiua ik Belén uan okinmilui tlakamej tlen omomachtiayaj ken katej sitlalimej: ‘Xiktemokan konetl uan ijkuak nankajsiskej techiluikan’. ¿Tikmati tleka Herodes okinekiaya kajsis Jesús?... ¡Porque okikokoliaya uan okinekiaya kimiktis!

¿Ken okimalui toTajtsin Dios ikone?... Satepan ijkuak ninmej tlakamej okitatoj Jesús uan okitliokolijkej miak tlamantli, toTajtsin Dios okinmilui ayakmo mayakan kanin okatka tekiua Herodes. Ik non, amo opanokej ik Jerusalén ijkuak oyajkej inmialtepe. Ijkuak Herodes okimatki nin, sapanoua okualanki uan ken okinekiaya kimiktis Jesús, otlanauati makinmiktikan nochtin konemej tlen okatkaj Belén uan ayamo okajxitiayaj ome xiuitl. Pero Jesús ayakmo ompa okatka.

¿Tikmati ken omomakixti Jesús?... Ijkuak tlakamej oyajkej, Jehová okilui José tlen okatka inamik María macholo Egipto. Ompa Herodes amitlaj uelis kichiuiliskia Jesús. Seki xiuitl satepan María, José uan Jesús okiskej Egipto uan toTajtsin Dios okilui José machantitij Nazaret, porque ompa amitlaj kichiuiliskiaj Jesús (Mateo 2:7-23).

¿Tikmati ken Jehová okimalui ikone?... ¿Akin moneki kimaluiskej ijkon ken totomej tlen inantsin okinmaluiaya? ¿Noso ken Jesús ijkuak okatka konetl? Te noijki moneki mitsmaluiskej, porque katej sekimej tlen kinekij mitschiuiliskej tlen amo kuali. ¿Tikmati akinmej?...

Biblia kijtoua Satanás kajki ken se león tlen kineki ikaj kikuas. Ijkon ken león kinkua yolkamej tlen amo chikauakej, Satanás uan amo kuali ejekamej kinpejpenaj konemej para kinchiuiliskej tlen amo kuali (1 Pedro 5:8). Pero Jehová okachi chikauak amo ken Satanás uan kinmaluia konemej tlen kitekichiuiliaj. Noijki uelis kinyolchikauas akinmej Satanás okinchiuili itlaj tlen amo kuali.

Ijkon ken otikitakej itech tlamachtil 10, ¿tlen kinekij amo kuali ejekamej uan Satanás matikchiuakan?... Kinekij matiauilnemikan uan matikchiuakan tlen Jehová amo kipaktia. ¿Tikilnamiki akinmej uelis san sekan motekaskej?... Se tlakatl uan se siuatl tlen yomonamiktijkej.

Pero sekimej kinpaktia motekaskej iuan konemej. Ik non, sekimej konemej peuaj kichiuaj seki tlamantli tlen amo kuali uan peuaj auilnemij. Ijkon opanok yiuejkika itech altepetl Sodoma. Biblia kijtoua akinmej ompa ochantiayaj, telpochmej uan akinmej yokipiayaj miak xiuitl, okinekiayaj motekaskej iuan tlakamej tlen okitatoj Lot (Génesis 19:4, 5).

Jesús omonekiaya makimaluikan uan te noijki moneki mitsmaluiskej para amikaj mitschiualtis iuan ximoteka. Akinmej kinekij ijkon xikchiua xamo kijtoskej moyolikniuan. Uelis mitsiluiskej itlaj mitsmakaskej para amitlaj xikijto. Pero yejuan amo mitstlasojtla, ijkon ken Satanás uan amo kuali ejekamej. Yejuan san kinekij moyolpaktiskej, ik non, motekaj iuan konemej. ¡Pero non amo kuali!

¿Tikmati tlen kichiuaj para uelis moyolpaktiskej?... Xamo kinekiskej mitsmajmachiliskej kanin amo moneki noso mitsiluiskej xikchiua tlen pitsotik. Pero amo moneki tikkauilis ikaj mamitsmajmachili, maski yetos mokni, motajtsin noso monantsin. Itech mocuerpo onka seki tlamantli kanin amo moneki tiktekauilis ikaj mamitsmajmachili.

¿Ken uelis timomaluis para amikaj mitschiuilis tlen amo kuali? Achto amikaj xikkauili mamitsmajmachili kanin amo moneki. Tla ikaj ijkon kineki kichiuas, xikilui: “¡Amo ijkon xikchiua! ¡Ikaj nikiluis!”. Tla mitsiluia motlajtlakol tlen opanok, amo xikneltokili porque amo melauak tlen mitsiluia. Xio uan ikaj xiktlapoui tlen omitschiuili. Moneki ikaj tikiluis maski mitsiluis amikaj xiktlapoui uan maski mitsiluis itlaj mitstliokolis noso mitsmomojtis moneki tias uan ikaj tiktlapouis tlen omitschiuili.

Moneki timomaluis uan amo timomojtis. Ijkuak motatajuan mitsiluiskej sekimej amo yolkualmej uan amo moneki tias kanin uelis itlaj mitspanos moneki tikintlakamatis. Ijkon amikaj mitschiuilis tlen amo kuali.