“Amo oueyititokaj uan amo okachi omomachtijkej”

1, 2. ¿Tlen milagro okichijkej Pedro uan Juan?

SAPANOUA otonaya tlajkotonal uan miakej ompa okatkaj itech templo. Ompa oajsitoj judíos uan idiscípulos Cristo. Yiajsiskia ‘hora nochtin motlatlaujtiskiaj’ (Hech. 2:46; 3:1).a Pedro uan Juan miakej okinpanouijtiajkej porque okinekiayaj ajsitiuij kanin okatka se ipuerta templo “tlen itoka Kuajkualtsin”. Miakej ompa opanouayaj uan chikauak otlajtouayaj, pero okachi chikauak otlajtouaya se tlakatl tlen amo onejnemiaya porque ijkon oneski. Ye ompa okitlajtlaniaya tomin (Hech. 3:2; 4:22).

² Non tlakatl okintlatlaujti ome apóstoles makimakakan tomin ijkuak inauak omotokijkej. Yejuan inakastlan omoketskej uan ye omokuayejyeko itlaj kimakaskiaj. Pero Pedro okilui: “Amo nikpia plata nion oro pero nimitsmakas tlen nikpia. ¡Ika itoka Jesucristo Nazareno, nimitsiluia xinejnemi!”. Akinmej ompa okatkaj omotlajtlachialtijkej ijkuak okitakej Pedro okimakitski uan okiketsalti (Hech. 3:6, 7). ¡Ximokuayejyeko ken omomachili tlakatl ijkuak opejki nejnemi! Melauak opakik uan okiueyichi toTajtsin Dios ika nochi iyolo.

3. ¿Tlen tetliokolil uelis kiseliskiaj akinmej ompa okatkaj uan tlakatl tlen opajtik?

³ Nochtin opakiayaj uan omotlalojkej okinnamikitoj Pedro uan Juan, pero yejuan yokatkaj ompa korredor tlen itoka Salomón. Itech non korredor kanin Jesús se tonal otlamachti, Pedro okinyekilui ken okipajti non tlakatl (Juan 10:23). Akinmej ompa okatkaj uan tlakatl tlen yikin opajtik uelis kiseliskiaj se tetliokolil okachi ipati amo ken nochi oro uan plata tlen onka tlaltikpak noso san tlen kokolistli kinpajtiliskiaj. Pedro okinmilui uelis moyolkopaskiaj para kintlapojpoluiskiaj uan mochiuaskiaj idiscípulos Jesucristo, porque Jehová okitlali ‘matechpaleui matiyoltokan’ (Hech. 3:15).

4. (1) ¿Tlen opanok ijkuak Pedro uan Juan okichijkej se milagro? (2) ¿Tlen timomachtiskej?

⁴ ¡Non tonal amo keman kilkauaskiaj! Se tlakatl okipajtijkej uan opejki nejnemi. Noijki akinmej ompa okatkaj uelis kajsikamatiskiaj tlen kineki toTajtsin Dios makichiuakan uan kiyolpaktiskej (Col. 1:9, 10). Tekiuajkej amo okinpakti non tlamantli uan amo kinkauiliskiaj discípulos makichiuakan tlen okinnauati Jesús (Hech. 1:8). Itech nin tlamachtil tikitaskej Pedro uan Juan okitematiltijkej iTlajtol toTajtsin Dios. Noijki tikitaskej ken otlamachtijkej uan tlen okichijkej discípulos maski tekiuajkej okinmitayaj amo “oueyititokaj uan amo okachi omomachtijkej” (Hech. 4:13).b Noijki tikitaskej ken uelis tikchiuaskej ijkon ken Pedro, Juan uan oksekimej discípulos ijkuak okintlajyouiltijkej.

Amo otikchijkej “ika tochikaualis” (Hechos 3:11-26)

5. ¿Tlen techmachtia tlen okichi Pedro?

⁵ Nonmej apóstoles teixpan otlajtojkej maski okimatiayaj ompa okatkaj sekimej tlen okijtojkej makimiktikan Jesús (Mar. 15:8-15; Hech. 3:13-15). Pedro okatka yolchikauak ijkuak okinmilui akinmej ompa okatkaj ye okipajti tlakatl ika itoka Jesús. Okinyekilui yejuan otlapaleuijkej makimiktikan Cristo. Pero ye amo okinkualankaitak porque okinmilui ‘amo okimatiayaj tlen okichiuayaj’ (Hech. 3:17). Noijki okinmilui yejuan okatkaj ikniuan uan okintlapoui tlen kichiuas toTajtsin Dios. Jehová kinpaleuiskia ‘kuali mayetokan’ tla moyolkopaskiaj uan kiteititiskiaj okineltokayaj Cristo (Hech. 3:19). Tejuan noijki moneki tiyetoskej tiyolchikauakej uan tikinmiluiskej oksekimej toTajtsin Dios tlaixkomakas. Pero amo matikinmajuakan nion matikinkualankaitakan porque tejuan amo technamiki titeixkomakaskej. Tejuan tikinmitaj uelis yetoskej tokniuan ijkon ken Pedro okinmitak. Ikinon tikintlapouiaj tlen kichiuas toTajtsin Dios.

6. ¿Ken okiteititijkej Pedro uan Juan okatkaj yolyamankej?

⁶ Apóstoles okatkaj yolyamankej porque amo okijtojkej yejuan okichijkej milagro. Ikinon Pedro okintlajtlani: “¿Tleka nantechitaj ken yetoskia ika tochikaualis otikchijkej manejnemi nin tlakatl noso otikchijkej porque tiktekichiuiliaj toTajtsin Dios ika nochi toyolo?” (Hech. 3:12). Ye uan oksekimej apóstoles kuali okimatiayaj san toTajtsin Dios okinpaleui makichiuakan non milagro. Ikinon okijtojkej Jehová uan Jesús okinpaleuijkej.

7. ¿Ken tikinpaleuiaj akinmej tikintlapouiaj?

⁷ Tejuan noijki moneki tiyetoskej tiyolyamankej ijkuak titetlapouiaj. Tejuan kuali tikmatij iespíritu toTajtsin Dios ayakmo techpaleuia matitepajtikan. Pero uelis tikinpaleuiskej makineltokakan toTajtsin Dios uan Cristo. Noijki matikchiuakan ijkon ken Pedro ijkuak okinmilui toTajtsin Dios kintlapojpoluis uan kuali yetoskej. Sejse xiuitl miakej ijkon kichiuaj uan moapolaktiaj porque kinekij kichiuaskej ken Cristo.

8. ¿Ken mochijtok ijkuak Pedro okijto “toTajtsin Dios nochi kiyektlalis”?

⁸ Tejuan tikmatij axkan yimochijtok tlen apóstol Pedro okijto: “ToTajtsin Dios nochi kiyektlalis”. Non opejki 1914 ijkuak toTajtsin Dios okitlali iTekiuajkayo ompa iluikak ijkon ken “yiuejkika okinmilui makijtokan profetas yolkualmej” (Hech. 3:21; Sal. 110:1-3; Dan. 4:16, 17). Satepan Jesús okinpaleui idiscípulos makiueyichiuakan toTajtsin Dios nikan tlaltikpak ijkon ken moneki. Ijkuakon sapanoua miakej opejki kiseliaj makinnauati iTekiuajkayo toTajtsin Dios uan axkan pakij san sekan kiueyichiuaj Jehová ika yolseuilistli. Yejuan okikajkej innemilis tlen achto okipiayaj uan ‘okiyankuilijkej innemilis ken kineki toTajtsin Dios’ (Efes. 4:22-24). Ijkon ken tlakatl okipajtijkej ika ichikaualis toTajtsin Dios, miakej kipatlaj innemilis porque espíritu santo kinpaleuia uan amo porque kinpaleuia se tlakatl. Matikchiuakan ijkon ken Pedro ijkuak kuali tiktekitiltiaj iTlajtol toTajtsin Dios uan matiyetokan tiyolchikauakej. Jehová techpaleuia ijkuak tikinpaleuiaj oksekimej makichiuakan ken Cristo.

“Amo uelis tikkauaskej tikijtoskej tlen yotikitakej uan yotikkakej” (Hechos 4:1-22)

9, 10. ¿Tlen okichijkej jueces ijkuak okimatkej Pedro uan Juan otetlapouijkej?

⁹ Miakej omotlajtlachialtijkej ijkuak Pedro otlamachti uan ijkuak tlakatl tlen okipajti oajkotsikuiniaya uan chikauak otsajtsiaya. Akin okimaluiaya templo uan teopixkej tlen otlayekanayaj san niman omotlalojkej otlachiatoj tlen opanotoka. Nesi nonmej tlakamej okatkaj itech se religión tlen okinmiluiayaj saduceos. Yejuan okipiayaj miak tomin, okinpaleuiayaj tekiuajkej uan okipaleuiayaj altepetl Roma. Fariseos okintlakamatiayaj nochi tlanauatilmej tlen okinpiayaj. Pero saduceos amo okintlakamatiayaj tlanauatilmej tlen okinmijtouayaj uan amo okineltokayaj kinyolitiskej akinmej yoixpolikej.c Ikinon okualankej ijkuak Pedro uan Juan teixpan otlamachtijtokaj Jesús okiyolitijkej.

¹⁰ Yejuan okualankej ikinon okintsakuatoj Pedro uan Juan uan mostlatika okinuikakej inmixpan jueces tlen okinmixkomakayaj judíos. Nonmej jueces omoueyinekiayaj ikinon okinmitayaj Pedro uan Juan “amo oueyititokaj uan amo okachi omomachtijkej”. Yejuan ome amo uelis tlamachtiskiaj itech templo porque amo omomachtijkej itech se escuela tlen okachi omoixmatiaya. Pero jueces omotlajtlachialtijkej porque kuali otlajtouayaj uan amo omomojtiayaj. ¿Tleka ijkon okichijkej? Porque “yejuan okatkaj iuan Jesús” (Hech. 4:13). Jesús okinmachti ijkon ken kijtoua toTajtsin Dios uan amo okinmachti ijkon ken akinmej otlamachtiayaj tlanauatil (Mat. 7:28, 29).

11. ¿Tlen okijtojkej kichiuaskiaj apóstoles?

¹¹ Jueces okinnauatijkej apóstoles ayakmo matetlapouikan. Ijkuakon omochiuaya tlen yejuan okijtouayaj. Seki semanas achto yejuan okijtojkej Jesús omonekiaya mikis (Mat. 26:59-66). Pero Pedro uan Juan amo omomojtijkej ijkuak okinmiluijkej ayakmo matetlapouikan. Yejuan omoyolchikajkej uan ika tlakaitalistli okinnankilijkej akinmej okipiayaj miak tomin, akinmej okatkaj ixtlamatkej uan akinmej oueyititokaj. Okinmiluijkej: “Namejuan xikijtokan kox kuali kita toTajtsin Dios timechtlakamatiskej namejuan noso ye tiktlakamatiskej. Tejuan amo uelis tikkauaskej tikijtoskej tlen yotikitakej uan yotikkakej” (Hech. 4:19, 20).

12. ¿Tlen techpaleuis kuali matitlanankilikan uan matiyetokan tiyolchikauakej?

¹² ¿Tejuatsin tiyolchikauak ijkon ken okatkaj apóstoles? ¿Ken timomachilia ijkuak tiktlapouia akin kipia miak tomin, ixtlamatki noso ueyititok? ¿Timomojtia ijkuak mitspinauia se mofamiliar, akin iuan timomachtia noso akin iuan titekipanoua? Amo ximotekipacho porque uelis ayakmo timomojtis. Ijkuak Jesús okatka nikan tlaltikpak, okinmachti apóstoles ken tlanankiliskiaj ika tlakaitalistli ijkuak okintlajtlaniayaj tlen okineltokayaj (Mat. 10:11-18). Satepan ijkuak Jesús okiyolitijkej, ye okinmilui ‘nochipa inuan yetos hasta ijkuak tlamis tlen axkan onka’ (Mat. 28:20). Axkan techyekana Jesús ika “tlakeuali yolmelajki uan ixtlamatki” uan techmachtia ken titlanankiliskej ijkuak techtlajtlaniaj tlen tikneltokaj (Mat. 24:45-47; 1 Ped. 3:15). ¿Ken techmachtia? Techmachtia ika Toteki akinmej tikchiuaj ken Cristo ijkuak timonechikouaj. Noijki techyektlalia ika se sección tlen itoka “¿Tlen kijtoua Biblia?” tlen kajki itech jw.org. ¿Timomachtia ika nin tlamantli? Okachi kuali titlanankiliskej uan tiyetoskej tiyolchikauakej tla ijkon tikchiuaskej. Matitetlapouikan tlen yotikitakej uan yotikkakej ijkon ken apóstoles okichijkej maski kinkualanis oksekimej.

“San sekan okitlatlaujtijkej toTajtsin Dios” (Hechos 4:23-31)

13, 14. ¿Tlen moneki tikchiuaskej ijkuak amo techkauiliaj matitetlapouikan uan tleka?

¹³ Ijkuak Pedro uan Juan okinkixtijkej, san niman omonechikojkej inuan tokniuan. Nochtin “san sekan okitlatlaujtijkej toTajtsin Dios” uan okiluijkej makinyolchikaua matetlapouikan (Hech. 4:24). Pedro kuali okimatiaya amo san iselti uelis tetlapouiskia tla okinekiaya kitekichiuilis Jehová. Seki semanas achto ye okineltokaya san iselti uelis kichiuaskia seki tlamantli. Ye okilui Jesús: “Ne amo keman nimitskauas maski oksekimej mitskauaskej”. Pero ijkon ken okijto Jesús, Pedro omomojti uan okijto amo okixmatiaya maski okatka iyolikni uan itlamachti. Tlen okipanok okimachti amo oksepa ijkon makichiua (Mat. 26:33, 34, 69-75).

¹⁴ Tla tiknekij titetlapouiskej amo san tikijtoskej tikchiuaskej. Matikchiuakan ijkon ken Pedro uan Juan ijkuak techiluiskej ayakmo matitetlapouikan noso ayakmo matiktekichiuilikan Jehová. Matikiluikan Jehová matechyolchikaua, matikinmiluikan tokniuan matechpaleuikan. Noijki matikinmiluikan tlayekankej tlen techpanoua uan tokniuan tlen kipiaj chikauak intlaneltokilis. Matikilnamiktokan timoyolchikauaj ijkuak tokniuan topatka motlatlaujtiaj (Efes. 6:18; Sant. 5:16).

15. ¿Tlen mitspaleuis amo ximoyolkoko tla ayakmo otitetlapouiaya?

¹⁵ Amo ximoyolkoko tla seki tonal ayakmo otitetlapoui porque sekimej omitsiluijkej ayakmo ijkon xikchiua. Xikilnamikto apóstoles noijki ayakmo otetlapouijkej ijkuak okimiktijkej Jesús. Pero satepan oksepa otetlapouijkej (Mat. 26:56; 28:10, 16-20). Amo xikkauili mamitsyolkoko tlen otikchi yiuejkika. Okachi kuali, ximomachti tlen uelis tikchiuas uan xiteyolchikaua ika tlen omitspanok.

16, 17. ¿Tlen techmachtia ijkuak discípulos omotlatlaujtijkej ompa Jerusalén?

¹⁶ ¿Tlen uelis tikiluiskej toTajtsin Dios tla tekiuajkej techtlajyouiltiaj? Matikilnamiktokan apóstoles amo okiluijkej toTajtsin Dios makinmakixti inmak akinmej okinkokoliayaj. Yejuan kuali okimatiayaj tlen okinmilui Jesús: “Tla yejuan onechtlajyouiltijkej, namejuan noijki namechtlajyouiltiskej” (Juan 15:20). Ikinon yejuan okiluijkej Jehová ‘makikaki ken kinekij kinmomojtiskej’ (Hech. 4:29). Discípulos yokimatiayaj tlen panoskia uan okajsikamatiayaj tleka tlajyouiskiaj. Yejuan kichiuaskiaj tlen kineki toTajtsin Dios maski tekiuajkej amo kinkauiliskiaj. Tetlapouiskiaj iTekiuajkayo toTajtsin Dios ijkon ken Jesús okinmilui (Mat. 6:9, 10).

¹⁷ Discípulos okinekiayaj kitlakamatiskej Jehová ikinon okiluijkej: “Techpaleui matimoyolchikauakan para matitetlapouikan motlajtol”. Jehová san niman okinnankili. Biblia kijtoua: “Otlalolinki kanin omonechikojkej. Nochtin okiselijkej espíritu santo, omoyolchikajkej uan opejki tetlapouiaj iTlajtol toTajtsin Dios” (Hech. 4:29-31). ToTajtsin Dios amikaj uelis kitsakuilis makichiua tlen ye kineki (Is. 55:11). Uelis tikitaskej oui mamochiua tlen Jehová kineki noso tikijtoskej okachi chijchikauakej akinmej techkokoliaj. Pero toTajtsin Dios techpaleuis matitetlapouikan tla tiktlatlaujtiaj uan tikiluiaj matechyolchikaua.

“Otikkajkaya toTajtsin Dios uan amo otikinkajkayaj tlakamej” (Hechos 4:32-5:11)

18. ¿Ken omopaleuiayaj tokniuan ompa Jerusalén?

¹⁸ Amo uejkika opanok uan kanaj 5,000 yopouiayaj itech tlanechikol tlen okatka Jerusalén.d Nochtin “san se tlamantli omokuayejyekouayaj uan san se tlamantli okimachiliayaj” maski okatka tlatlamantli inmialtepe. Nin kijtosneki okichiuayaj san se tlamantli (Hech. 4:32; 1 Cor. 1:10). Amo san okiluiayaj Jehová makinpaleui. Noijki omopaleuiayaj makipiakan chikauak intlaneltokilis uan omopaleuiayaj ika tlen okipiayaj (1 Juan 3:16-18). Ijkon okichi se discípulo tlen omotokayotiaya José tlen apóstoles okiluiayaj Bernabé. Ye okinemakak itlal uan okitemakak itomin para makinpaleuikan tokniuan tlen oajsitoj Jerusalén. Ijkon yankuik discípulos uelis mokauaskiaj uan ijkon okachi momachtiskiaj uan tlaneltokaskiaj.

19. ¿Tleka Jehová okinmikti Ananías uan Safira?

¹⁹ Ananías uan isiua tlen omotokayotiaya Safira noijki okinemakakej intlal para kinpaleuiskiaj tokniuan ika non tomin. Yejuan okinmiluijkej apóstoles okitemakakej nochi tomin tlen ika okintlaxtlauilijkej tlali. Pero Ananías “okimokaui seki tomin” uan amikaj okilui (Hech. 5:2). Ikinon Jehová okinmikti. Amo ijkon okinpanok porque amo okitemakakej miak tomin. Ijkon okinpanok porque otlakajkayajkej uan okinekiayaj kichiuaskej tlen amo kuali. Ananías ‘okikajkaya toTajtsin Dios uan amo okinkajkayaj tlakamej’ (Hech. 5:4). Ye uan Safira okipiayaj ome inmixko. Yejuan okichiuayaj ken tlakamej tlen Jesús okintlajtlakolti porque okichiuayaj tlen kuali san para makinmitakan oksekimej (Mat. 6:1-3).

20. ¿Ken moneki tiktekichiuiliskej toTajtsin Dios?

²⁰ Axkan tiiTlaixpantijkauan Jehová ika nochi toyolo titlapaleuiaj mamotetlapoui ipan nochi tlaltikpak ijkon ken okichijkej discípulos tlen okatkaj Jerusalén. Timajxiliaj titetlapouiskej uan tiktemakaj totomin ika nochi toyolo. Tikchiuaj ijkon ken kipaktia toTajtsin Dios uan amo ‘techixkokoua’ nion amikaj ‘techchiualtia’ ijkon matikchiuakan (2 Cor. 9:7). Jehová kita tleka itlaj tiktemakaj uan amo kita kech tiktemakaj (Mar. 12:41-44). Amo matikchiuakan ijkon ken okichijkej Ananías uan Safira. Amo matiktekichiuilikan toTajtsin Dios san para oksekimej matechitakan. Matikchiuakan ijkon ken Pedro, Juan uan Bernabé. Matiktekichiuilikan toTajtsin Dios porque tiktlasojtlaj uan noijki porque tikintlasojtlaj oksekimej (Mat. 22:37-40).