Tlakuikalmej tlen techmachtiaj uan techyolseuiaj

ITECH Biblia, amochtli tlen okachi ueyi kipia tlakuikalmej tlen ika moueyichiua toTajtsin Dios, tlen omoijkuilojkej kanaj ipan mil xiuitl. Akinmej okijkuilojkej, ika kuakualtsin tlajtolmej otlajtojkej itech inueyi tlaneltokilis. Noijki itech non tlakuikalmej okijkuilojkej tlen okimachiliayaj, ken pakilistli uan tekokojkayotl, tlasojkamatilis uan yolkuepalis, ueyichiualis uan yolkokolis. Nochtin yejuan okitlasojtlayaj toTajtsin Dios uan omomachiliayaj inauak Ye. Ma tikitakan sekimej tlajtolmej tlen techiluia Salmos.

Jehová, san ye akin kinamiki Tlanauatis itech iluikak uan Tlaltikpak, moneki ma tikueyichiuakan. Salmo 83:18 techyekiluia: “Te, akin motoka Jehová, san te okachi tiUeyi ipan nochi tlaltikpak”. Miakej salmos kiueyichiuaj Jehová pampa okichijchi iluikak, sitlaltin, nemilis ipan Tlaltikpak uan kualtsin totlalnakayo (Salmos 8, 19, 139 uan 148). Miakej kiueyichiuaj pampa ye kinmaluia uan kinmakixtia itekipanojkauan yolmelajkej (Salmos 18, 97 uan 138). Uan oksekimej kitlakuikiliaj pampa ye toTajtsin Dios akin kichiua nochi ika melajkayotl uan kinpaleuia akinmej tlajyouiaj uan kintlajyouiltia akinmej amo yolkualmej (Salmos 11, 68 uan 146).

Jehová kinpaleuia uan kinyolseuia akinmej kitlasojtlaj. Uelis moijtos Salmo 23 ye tlen okachi moixmati, kanin David kineskayotia toTajtsin Dios ika se tlajpixki tlen ika tlasojtlalis kinyekana, kinmaluia uan kinpaleuia iichkauan. Itech Salmo 65:2 techilnamiktia ke Jehová ye “Akin kikaki tlatlaujtilmej”. Noijki akinmej sapanoa otlajtlakojkej moyolseuiaj ika tlen kijtoa Salmos 39 uan 51. Ompa, David technextilia ke melauak moyolkuepa itech itlajtlakol tlen okichi uan kuali kimati ke toTajtsin Dios kitlapojpoluis. Uan itech Salmo 55:22 techyoleua ma timotenmachiakan itech Jehová uan ma tikmokauilikan ma techpaleui itech tlen techtekipachoa.

Jehová kiualikas se yankuik Tlaltikpak ika iTekiuajkayo Mesías. Itech Salmos tikajsij miakej tlajtolmej tlen tlajtoa itech Mesías, ueyi Tekiua tlen yomoijtojka. Se neskayotl, itech Salmo 2 kijtoa ke nin ueyi Tekiua kitlajtlamis nochtin altepemej tlen kixnamiki. Itech Salmo 72 technextilia ke kitlajtlamis apistli, tlen amo melajki uan nochi tlen amo kuali. Uan ken kijtoa Salmo 46:9, ika iTekiuajkayo Mesías, toTajtsin Dios kitlajtlamis guerras uan nochi inteposuan tlen ika moteuiaj. Noijki, itech Salmo 37 tiktlajtoltiaj ke itech yankuik Tlaltikpak ayakmo yetoskej tlaltikpaktlakamej tlen amo yolkualmej uan tlen yolmelajkej nemiskej nochipa san sekan ika yolseuilis.

(Okisak itech amochtli Salmos.)