¿Ken mitspaleuia tejuatsin imikilis Jesús?

Jesús omikik pampa tejuan uelis tiyoltoskej nochipa (Juan 3:​16)

Eyi tonal satepan omikik Jesús, sekimej siuamej oyajkej kanin imikakoyok uan ayakmo ompa okatka. Jehová okiyoliti Jesús.

Satepan, Jesús okinmonextili itlatitlaniluan.

Kema, Jehová okiyoliti Jesús ken se espíritu tlen kipia miak chikaualistli akin amo keman mikis. Imachtijkauan Jesús okitakej ijkuak oyajki iluikak.

ToTajtsin Dios okiyoliti Jesús uan yokitlali ken ueyi Tekiua itech iTekiuajkayo (Daniel 7:​13, 14)

Jesús okitemakak iyolilis pampa techmakixtis itech tlajtlakoli uan mikilistli (Mateo 20:​28). Ika non temakixtilistli, toTajtsin Dios uelis techmakas yolilistli tlen amo keman tlamis.

Jehová yokitlali Jesús ken ueyi Tekiua itech iluikak pampa ma ualtlanauati ipan Tlaltikpak. Inauak ye tlanauatiskej 144,000 tlaltikpaktlakamej tlen yolmelajkej akinmej kinyolitiaj pampa yaskej iluikak. Jesús uan 144,000 tlanauatiskej itech iTekiuajkayo toTajtsin Dios (Apocalipsis 14:​1-3).

Itekiuajkayo toTajtsin Dios kichiuas Tlaltikpak ma mokuepa se xochitlali. Tlaltikpaktlakamej kipiaskej tlen ika mopanoltiskej, ayakmo yetos guerras, ayakmo kitechiuiliskej tlen amo kuali nion yetos apistli. Nochtin tlaltikpaktlakamej melauak yolpakiskej (Salmo 145:​16).