TLAMACHTIL 8
¿Ken uelis tikmatis kox akinmej inmiuan timouika melauak mitstlasojtlaj?
Brittany okijto: “Ijkuak nikualani, nikneki ikaj iuan nimotlapouis. Tla nimoyolkokoua, nikneki manechiluikan moyektlalis tlen panotok. Pero tla niyolpaki nikneki ikaj nikiluis tlen nechyolpaktia. Ne nikita miak ipati nikinpias noyolikniuan”.
SEKIMEJ kijtouaj konemej moneki kinpiaskej akinmej inmiuan mauiltiskej. Pero telpochmej moneki kinpiaskej akinmej inmiuan mouikaskej. ¿Tleka ijkon kijtouaj?
Se chokotsin noso takotsin mauiltia iuan ikaj para amo yetos iselti.
Akinmej inmiuan timouikaj kipatioitaj tlen tejuan tikpatioitaj.
Biblia noijki kijtoua: “Se melauak toyolikni nochipa kiteititia techtlasojtla uan ye se tokni tlen kajki ijkuak timoyolkokouaj” (Proverbios 17:17). Toyolikniuan okachi inmiuan timouikaj uan techpaleuiaj. Amo ijkon ken konemej ijkuak mauiltiaj inmiuan oksekimej konemej.
Tlen moneki: Ijkuak timoskaltijti, moneki timouikas inmiuan akinmej...
1)... kipiaj kuali inyelis.
2)... moyekanaj ika principios bíblicos tlen kijtouaj matikchiuakan tlen kuali.
3)... kichiuaj tlen mitspaleuis.
Pero axkan ximotlajtlani kox kichiuaj nochi non tlamantli akinmej inmiuan timouika. Matikitakan tlen kijtosneki sejse tlamantli tlen yotikijtojkej.
Se tlamantli: Kuali inyelis
Tlen moneki tikmatis. Amo nochtin akinmej inmiuan timouika kichiuaskej tlen moneki kichiuas se toyolikni. Biblia kijtoua “katej akinmej kintlajyouiltiaj oksekimej” (Proverbios 18:24). Uelis tikijtos non amo melauak. Pero ximotlajtlani, ¿se tonal ikaj akin iuan timouika omitskajkaya, omitstene ijkuak amo ompa otikatka noso okijto itlaj otikchi maski amo melauak? Ijkuak ijkon panoua, ayamo uelis timouikas iuan non moyolikni.a Okachi ipati makipiakan kuali inyelis akinmej inmiuan timouika uan amo sapanoua ipati miakej inmiuan timouikas.
Tlen uelis tikchiuas. Xikita kuali makipiakan inyelis akinmej inmiuan timouika.
Yvette akin kipia 17 xiuitl, okijto: “Nochtin kijtouaj kuali tlen kichiua noyolikni Fiona. Nikneki nikchiuas ken ye uan kuali makitakan oksekimej tlen nikchiua. Nechpaktia tlen kichiua”.
Xikchiua nin.
1. Xiktlajtolti Gálatas 5:22, 23.
2. Ximotlajtlani: “¿Kinyekana espíritu santo akinmej inmiuan nimouika?”.
3. Xikijkuilo intoka akinmej inmiuan timouika. Noijki xikijkuilo ken kipiaj inyelis.
Itoka
․․․․․
Iyelis
․․․․․
Tlen uelis mitspaleuis: Xamo moneki tikinpatlas moyolikniuan tla tikita kichiuaj tlen amo kuali.
Ome tlamantli: Principios bíblicos tlen kijtouaj matikchiuakan tlen kuali
Tlen moneki tikmatis. Xamo amo kuali tikinpejpenas akinmej inmiuan timouikas tla san niman tikneki tikinmajsis moyolikniuan. Noijki xikilnamikto tlen kijtoua Biblia. Ompa kijtoua: “Akin mouika iuan akinmej amo yolkualmej kipanos tlen amo kuali” (Proverbios 13:20). Tlajtoli “amo yolkualmej” kijtosneki akinmej amo kuali mokuayejyekouaj uan teixnamikij. Amo kijtosneki akinmej amo kuali momachtiaj escuela noso amo ixtlamatkej. Xamo te amo tikneki tikinpias ijkon moyolikniuan.
Tlen uelis tikchiuas. Kuali xikinpejpena akinmej inmiuan timouikas uan amo ximouika inmiuan akinmej amo tikinmixmati (Salmo 26:4). Pero non amo kijtosneki tikchiuas se grupo inmiuan akinmej amo miakej. Kijtosneki moneki kuali tikitas “akin yolmelauak uan akin amo yolkuali, akin kitekichiuilia toTajtsin Dios uan akin amo kitekichiuilia” (Malaquías 3:18).
Christopher akin kipia 13 xiuitl, okijto: “Niyolpaki porque notatajuan onechpaleuijkej manikintemo akinmej inmiuan nimouikas. Nimouika inmiuan telpochmej ken ne uan kuali mouikaj iuan Jehová”.
Xikinnankili ninmej tlajtlanilmej:
¿Mitstekipachoua akinmej inmiuan timouika mamitsiluikan xikchiua tlen amo kuali?
□ Kema
□ Amo
¿Amo tikneki motatajuan makinmixmatikan moyolikniuan porque amo kinpaktis inmiuan ximouika?
□ Kema
□ Amo
Tlen uelis mitspaleuis: Tla ijkuak otikinnankili ninmej tlajtlanilmej otikijto kema ijkon tikchiua, moneki tikintemos oksekimej moyolikniuan tlen melauak makichiuakan tlen kuali. Ximouika inmiuan tokniuan tlen kuali kitekichiuiliaj Jehová.
Eyi tlamantli: Tlen mitspaleuis
Tlen moneki tikmatis. ITlajtol toTajtsin Dios kijtoua: “Tla nonnemiskeh iwa akimeh kichiwah tlan amokuali, kipatlaskeh nomotlayejyekolis iwa nomechijtlakoskeh” (1 Corintios 15:33). Tlen okipanok Lauren ijkon techititia. Ye okijto: “Ne oniknekiaya kuali nouan mamouikakan akinmej inmiuan onimomachtiaya. Pero omonekiaya nikchiuas tlen yejuan onechiluiayaj. Opejki nikchiua ken yejuan porque onimomachiliaya noselti uan ijkon uelis inmiuan nimouikaskia”. Tla tikchiuas ken kichiuaj oksekimej ijkon ken okichi Lauren, mitstoktiskej san tlen yejuan kinekiskej. Ijkon ken ijkuak mauiltiaj ika ajedrez. ¿Tikneki ijkon mamitstoktikan?
Tlen uelis tikchiuas. Ayakmo ximouika inmiuan akinmej kinekij xikchiua ken yejuan kichiuaj. Xamo ayakmo tikinpias miakej moyolikniuan tla ijkon tikchiuas pero okachi kuali tiyetos. Noijki okachi tikinmajsis akinmej inmiuan timouikas tlen melauak mitspaleuiskej (Romanos 12:2).
Jason akin kipia 21 xiuitl, okijto: “Se noyolikni tlen itoka Clint kuali iuan nimouika. Ye nochipa nechyolchikaua porque kuali kimati tlen kichiua uan teajsikamati”.
Xikinnankili ninmej tlajtlanilmej:
¿Tikpatla ken timotlakentia, ken titlajtoua noso tlen tikchiua para tikinyolpaktis akinmej inmiuan timouika?
□ Kema
□ Amo
¿Tio kanin amo moneki tias san porque yejuan yauij?
□ Kema
□ Amo
Tlen uelis mitspaleuis: Tla ijkuak otikinnankili ninmej tlajtlanilmej otikijto kema ijkon tikchiua, xikinmilui motatajuan noso ikaj tlen okachi ueyi mamitspaleuikan xikinpejpena moyolikniuan tlen melauak mitspaleuiskej. Noijki uelis timotlapouis iuan se tokni tlayekanki tla te tiiTlaixpantijka Jehová.
TLA TIKNEKI OKACHI TIKMATIS XIKITA TLAMACHTIL 9 VOLUMEN 2
¿Ikaj yomitsyejyeko noso tikneki tikchiuas itlaj tlen yitikmati amo kuali?
[Nota]
a Tinochtin timotlapololtiaj (Romanos 3:23). Ik non tla ikaj akin iuan timouika mitsyolkokoua pero mitsiluia xiktlapojpolui, xikilnamiki Biblia kijtoua “akin milák tetlasojtla, kimati tetlapojpolwia” (1 Pedro 4:8).
TEXTO TLEN MONEKI TIKILNAMIKTOS
“Onka se toyolikni tlen okachi kuali iuan timouikaj uan amo ken iuan se tokni” (Proverbios 18:24).
NIN UELIS TIKCHIUAS
Ximochijchikaua nochipa xikchiua tlen kuali. Ijkon mouan mouikaskej akinmej noijki mochijchikauaj kichiuaskej tlen kuali. Yejuan yetoskej kuali moyolikniuan uan melauak mitstlasojtlaskej.
¿OTIKMATIAYA?
ToTajtsin Dios nochtin kintlasojtla pero amo nochtin inmiuan mouika (Salmo 15:1-5).
¡MA TIKCHIUAKAN!
¿Tlen nechpaleuis kuali manikinpejpena akinmej inmiuan nimouikas? ․․․․․
Sekimej tokniuan tlen yiuejueyij uan nikneki okachi nikinmixmatis: ․․․․․
¿Tlen nikneki niktlajtlanis notajtsin noso nonantsin? ․․․․․
¿TLEN TIMOKUAYEJYEKOUA?
● Xikyekijto tlen okachi mitspaktia makichiua se moyolikni uan tleka.
● ¿Tlen moneki tikchiuas para okachi kuali timouikas inmiuan moyolikniuan?
[Tlen moijtoua]
Carlos okijto: “Notatajuan onechiluijkej ayakmo manimouika inmiuan sekimej noyolikniuan. Ne amo oniknekiaya nikinkauas porque onimokuayejyekouaya san yejuan kuali inmiuan onimouikaya. Pero tlen onechiluijkej notatajuan manikchiua onechpaleui. Onikajsikamatki okatkaj miakej akinmej okachi kuali inmiuan nimouikaskia”.
[Recuadro]
Okseki tlamantli tlen uelis tikchiuas
Ximotlapoui inmiuan motatajuan. Xikintlajtlani ken okatkaj akinmej inmiuan omouikayaj ijkuak okatkaj telpochmej ken te. ¿Kox omotlapololtijkej ijkuak okinpejpenkej akinmej inmiuan mouikaskiaj? ¿Tleka? Noijki xikinmilui mamitsiluikan tlen uelis tikchiuas para tikpejpenas tlen kuali.
Xikinmilui motatajuan makinmixmatikan akinmej inmiuan timouika. Tla amo tikneki motatajuan makinmixmatikan akinmej inmiuan timouika, ximokuayejyeko tleka amo tikneki. ¿Kichiuaj itlaj tlen amo kuali uan motatajuan amo kinpaktis? Xamo moneki tikinpejpenas oksekimej moyolikniuan tla ijkon kichiuaj.
Kuali xikinkaki akinmej inmiuan timouika. Xikteititi tikneki tikmatis tlen mokuayejyekouaj uan mitstekipachoua tlen kinpanoua (Filipenses 2:4).
Xiteajsikamati uan xitetlapojpolui. Amo ximokuayejyeko moyolikniuan amo keman motlapololtiskej. Porque Santiago 3:2 kijtoua: “Tinochteh kualchiwa titlajtolpanoah”.
Amo nochipa san inmiuan xiyeto. Tla melauak moyolikniuan, mitspaleuiskej ijkuak itlaj mitspanos (Eclesiastés 4:9, 10).
[Foto]
Tla tikchiuas ken kichiuaj oksekimej, mitstoktiskej san tlen yejuan kinekiskej. Ijkon ken ijkuak mauiltiaj ika ajedrez