Xiktemo toTajtsin Dios pampa nanyolpakiskej itech monamiktilis

ToTajtsin Jehováa okichi achto namiktilistli. Biblia techiluia toTajtsin Dios okichijchi achto siuatl uan “okimakak tlakatl”. Adán sapanoa oyolpakiaya, ik non okijto: “Nin kema noomio uan nonakayo” (Génesis 2:22, 23). Jehová ok kineki ma yolpakikan akinmej yomonamiktijkej.

Ijkuak monamiktiaj mokuayejyekoaj nochi kuali yetos. Pero maski tlakatl uan siuatl melauak motlasojtlaskej ualeua kipiaj seki ouijkayotl (1 Corintios 7:28). Nin amatlajkuilol kipia seki principios bíblicos, tla tikchiuaj tonamiktilis uan tokalchanejkauan yolpakiskej (Salmo 19:8-11).

1 XIKSELI TEKITL TLEN JEHOVÁ OMITSMAKAK

BIBLIA KIJTOA: Tlakatl kinyekana ikalchanejkauan (Efesios 5:23).

Tla titlakatl uan yotimonamikti, Jehová kineki xiktlasojtla uan xikmalui mosiua (1 Pedro 3:7). ToTajtsin Dios okichijchi pampa ma mitspaleui, ik non, moneki tiktlasojtlas uan tiktlakaitas (Génesis 2:18). Moneki tiktlasojtlas mosiua uan tikchiuas tlen ye kineki uan amo san tlen te tikneki (Efesios 5:25-29).

Tla tisiuatl uan yotimonamikti, Jehová kineki xiktlakaita monamik uan xikpaleui pampa kuali kichiuas iteki (1 Corintios 11:3; Efesios 5:33). Melauak xikpaleui itech nochi tlen kijtos (Colosenses 3:18). Tla tikchiuas, monamik uan Jehová mitstlasojtlaskej (1 Pedro 3:1-6).

TLEN UELIS TIKCHIUAS:

• Xiktlajtlani monamik tlen uelis tikchiuas pampa tiyetos se kuali tlakatl, noso se kuali siuatl. Kuali xikaki tlen kijtos uan ximochijchikaua pampa tikchiuas tlen moneki

• Amo xikualani. Uelis uejkauas pampa te uan monamik nanyolpakiskej

2 MELAUAK XIMOTEKIPACHO ITECH TLEN KIMACHILIA MONAMIK

BIBLIA KIJTOA: Moneki tikitas tlen kitekipachoa monamik (Filipenses 2:3, 4). Xiktlasojtla monamik, uan xikilnamiki Jehová kineki nochtin itekipanojkauan ‘ma moyekwikakan iwan nochteh’ (2 Timoteo 2:24). “Akin amo mokuayejyekoa ijkuak tlajtoa, tetsopitia ken se espada, maski ijkon, innenepil ixtlamatkej tepajtia.” Ik non, moneki kuali timokuayejyekos tlen tikijtos (Proverbios 12:18). Jehová mitspaleuis ika iespíritu pampa titlajtos ika tlasojtlalistli (Gálatas 5:22, 23; Colosenses 4:6).

TLEN UELIS TIKCHIUAS:

• Moneki timotlatlaujtis pampa amo san niman tikualanis, uan kuali tikakis ijkuak monamik mitstlapouis itlaj tlen miak ipati

• Kuali ximokuayejyeko tlen tikijtos, uan ken tikijtos

3 SAN SEKAN XIYETOKAN

BIBLIA KIJTOA: Ijkuak ikaj monamiktia mochiua “san se” iuan inamik (Mateo 19:5). Pero ok ome, uan tlatlamantli mokuayejyekoaj. Ik non, moneki nanmochijchikauaskej pampa nanmokuayejyekoskej uan nankimachiliskej ken san se (Filipenses 2:2). Miak ipati san sekan xiyetokan ijkuak itlaj nankipejpenaskej. Biblia kijtoa: “Ijkuak tetlajtlaniaj nochi kuali kisa” (Proverbios 20:18). Ijkuak itlaj nankipejpenaskej san sekan, xikitakan ken uelis namechpaleuiskej principios bíblicos (Proverbios 8:32, 33).

TLEN UELIS TIKCHIUAS:

• Amo san moneki timotlapouis iuan monamik tlen tikneki tikchiuas, noijki moneki tikiluis tlen tikmachilia

• Ximotlapoui iuan monamik achto tikchiuas itlaj