TLAXELOL 5
Ximokuepakan ‘inawak akin kimaluia nomoyolilis’
¿Mitspanotok ijkon ken kijtoa nin amatlajkuilol? Tla ijkon, amo san tejuatsin ijkon mitspanoa, yiuejkika miakej itekipanojkauan Jehová ijkon yokinpanok. Uan ijkon ken yejuan, Jehová uelis mitspaleuis pampa ayakmo ijkon ma mitspano.
Jehová mitsyekanas pampa oksepa iuan timokuepas
JEHOVÁ mitspaleuis oksepa itech ximokuepa. Ye mitspaleuis xikxiko nochi ouijkayotl uan tlen mitstekipachoa uan ximoyolseui pampa ayakmo itlaj mitstekipachos. Ijkuak ijkon mitspanos uelis oksepa tiknekis tiktekichiuilis Jehová itech tlanechikol. Mitspanos ijkon ken sekimej tokniuan itech achto siglo, akinmej Pablo okinmilui: “Achto nomejwah ononnemiah kemi ichkameh non omoixpolojtinemiah, pero axa yononwalmokopkeh inawak n tlájpixki non kinmokuitlawia nomoyolilis” (1 Pedro 2:25).
Oksepa timouikas iuan Jehová non tlen okachi kuali. ¿Tleka? Achto, Jehová sapanoa yolpakis (Proverbios 27:11). Ken tikmati Jehová noijki moyolkokoa uan yolpaki, uan tlen tejuan tikchiuaj uelis kiyolkokos noso kiyolpaktis. Pero ye amo techchiualtia ma tiktekichiuilikan nion ma tiktlasojtlakan (Deuteronomio 30:19, 20). Se tlakatl tlen tlajkuiloa itech Biblia okijto: “Iyolo se tlakatl san uelis motlapos tlaijtik, uan amo uelis motlapos ik kiauak”. Ijkuak tiktekichiuiliaj Jehová pampa tiktlasojtlaj ken tiktlaposkiaj toyolo. Uan non sapanoa kiyolpaktia pampa tla tiyolmelajkej ye kita ken se tetliokolil tlen miak ipati. Tla tiktekichiuiliaj Jehová ken ye kinamiki sapanoa tiyolpakiskej (Hechos 20:35; Apocalipsis 4:11).
Uan noijki ijkuak timokuepas, tikselis tlakuali espiritual ijkuak okachi tikneki (Mateo 5:3). Se neskayotl, miakej motlajtlaniaj tleka tiyoltokej, pero amo ikaj kinnankilia nin uan okseki tlajtlanilmej. Jehová otechchijchi pampa ma tiknekikan tikmatiskej okachi itech toTajtsin Dios uan kimati tiyolpakiskej tla tiktekichiuiliaj. Ik non, Jehová sapanoa yolpakis tla tikueyichiuaj pampa tiktlasojtlaj (Salmo 63:1-5).
Jehová mitsyoleua ximokuepa iuan ialtepe. Uan nin amatlajkuilol techmachtia uelis ijkon tikchiuaskej. Ijkuak omochijchi otiktlatlaujtijkej Jehová ma techpaleui uan melauak otimochijchikajkej kuali tikchijchiuaskej. Satepan uelis tlayekankej noso okse tokni omitsmakak, uan satepan otiktlajtolti. Tlen otiktlajtolti uelis oajsik itech moyolo. Nochi nin techititia Jehová amo mitsilkaua uan mitsselia ika miak tlasojtlalistli (Juan 6:44).
Techyolseuia tikmatiskej Jehová amo kinmilkaua iichkauan tlen opolikej. Non tlen okimatki se tokni tlen itoka Donna. Ye kijtoa: “Yolik onimoxelo itech tlen melauak, pero nochipa onimokuayejyekoaya itech tlen kijtoa Salmo 139:23, 24, kanin kijtoa: ‘Notech xitlatemo, oh Dios, uan xikixmati noyolo. Xinechita uan xikinmixmati nokuayejyekoluan tlen nechtekipachoaj. Xikita kox notech onka se ojtli tlen amo kuali, uan xinechyekana itech ojtli tlen amo keman tlamis’. Amo keman onechpakti tlen mochiua itech Tlaltikpak kanin tlayekantok Satanás. Onikmatiaya omonekiaya niyetos itech tlanechikol. Onikmatki Jehová amo keman onechka, san omonekiaya nikajsis ojtli pampa oksepa nimokuepas. ¡Niyolpaki pampa onimokuepki!”.
“Onikmatki Jehová amo keman onechka, san omonekiaya nikajsis ojtli pampa oksepa nimokuepas”
Timotlatlaujtiaj pampa itech moyolilis oksepa xiyolpaki ijkuak tiktekichiuilia Jehová (Nehemías 8:10). Uan xikneltoka amo keman timoyolkokos tla oksepa tiktekichiuilis Jehová.