¿Uelis nechpaleuis Biblia?

¿TLEN TIKCHIUASKIA?

Ximokuayejyeko itech nin tlamantli: Yiyoak uan David nejnemi itech se altepetl. Ken yiyoak amo ueli kita tlen onka kanin yaui. Yomoixpolo. Uelis oyajki itech okse ojtli.

Tla mitspanoskia ken David, ¿tlen tikchiuaskia?

XIMOKUAYEJYEKO

Uelis tikchiuas nin tlamantli:

1. Uelis tikiluis ikaj ma mitsilui ken uelis tiajsiti kanin tikneki tias.

2. Uelis tiktekitiltis se lámpara.

3. Uelis tinejnentias hasta tikajsis ojtli.

Tlamantli 3 non tlen okachi amo kuali tlen uelis kichiuas.

Tlamantli 2 okachi kuali tlen uelis kichiuas: tiktekitiltis se lámpara mitspaleuis pampa tikajsis ojtli.

Biblia ijkon uelis mitspaleuis.

Amochtli tlen okachi monemaka uelis:

• Mitsyekanas ijkuak tikpias ouijkayotl.

• Mitspaleuis kuali ximoixmati uan okachi kuali xikpia moyelis.

• Mitsititis ken uelis okachi kuali tiyetos.

INTLANANKILIS TLAJTLANILMEJ TLEN OKACHI INPATI ITECH TONEMILIS

Nochtin peua titetlajtlaniaj ijkuak peua titlajtoaj.

• ¿Tleka iluikak azul?

• ¿Ken chijchitokej sitlalimej?

Satepan peua timotlajtlaniaj itech tlamantli tlen panoa.

• ¿Tleka techpanoa tlen amo kuali?

• ¿Tleka timikij?

¿Otikmatiaya Biblia kinnankilia ninmej tlajtlanilmej?

Miakej kijtoaj Biblia san kinpia cuentos uan leyendas, tlen ayakmo motekitiltia noso sapanoa oui tikajsikamatiskej. ¿Melauak ijkon? ¿Melauak tlen kijtoaj tlaltikpaktlakamej itech Biblia? ¿Uelis amo nochi kimati?

Se neskayotl, mokuayejyekoaj toTajtsin Dios tlanauatia itech Tlaltikpak. ¿Melauak ijkon? Onka miak tlamantli tlen amo kuali, san kanin tikitaj tlajyouilistli, kokolistli, mikilistli, tlaxixinilistli uan amo onka tomin. ¿Uelis kichiuas nochi nin toTajtsin Dios akin tetlasojtla?

¿Mitspaktiskia tikmatis akin tlanauatia itech Tlaltikpak? Tlen kijtoa Biblia uelis mitstlajtlachialtis.

Ken tikita, nochi tlanojnotsalmej tlen katej itech nin amatlajkuilol kisaj itech Biblia. TiiTlaixpantijkauan Jehová kuali tikmatokej uelis titlaneltokaskej itech Biblia uan kuali techyekanas pampa “Dios otlanawati makijkuilokah, kuali matechmachtikah, ika matechnonotsakah, ika matechmilawakah” (2 Timoteo 3:16, 17). Xikixmati nin amochtli tlen sapanoa yiuejkika kajki uan axkan ok techpaleuia.