Amo xikilkaua tlen okipanok isiua Lot

Lot ochantiaya Canaán iuan Abrahán akin okatka itío. Satepan, inyolkauan omomiaktilijkej, ik non, ayakmo uelis san sekan chantiskiaj. Abrahán okilui Lot: “Ayakmo uelis san sekan tichantiskej. Nimitstlatlaujtia, xikpejpena kanin tikneki tias uan ne oksekan nias”. ¡Abrahán okatka yolkuali!

Lot okitak se kuajkualtsin tlali itech se altepetl tlen omotokayotiaya Sodoma. Ompa okatka miak atl uan miak xiuitl. Ik non, Lot okipejpenki non tlali uan ompa ochantito iuan ikalchanejkauan.

Sapanoa amo yolkualmej okatkaj akinmej ochantiayaj Sodoma uan itech okse altepetl tlen ik ompa okatka tlen omotokayotiaya Gomorra. Ik non, Jehová okijto kinpojpoloskia nonmej altepemej. Pero Jehová okinekiaya kinmakixtis Lot uan ikalchanejkauan, ik non, okintitlanki ome ángeles ma kinmiluikan: “¡Totoka! ¡Xikisakan itech nin altepetl! ¡Jehová kipojpolos!”.

Pero Lot, isiua uan ome ichpokauan amo san niman okiskej. Ik non, ángeles okinmatilankej, san niman okinkixtijkej uan okinmiluijkej: “¡Ximotlalokan uan xicholokan, ijkon amo nanmikiskej uan amo xitlachiakan tlakuitlapan! Nanmikiskej tla nantlachiaskej tlakuitlapan”.

Ijkuak Lot uan ikalchanejkauan oajsitoj altepetl tlen omotokayotiaya Zóar, Jehová okichi ma uetsi tlitl uan azufre ipan altepemej Sodoma uan Gomorra. Ijkon Jehová okinpojpolo nonmej altepemej. Isiua Lot amo okitlakamatki Jehová, ye otlachixki tlakuitlapan uan omokuepki istatl. Pero Lot uan ichpokauan omomakixtijkej porque otetlakamatkej. Yejuan omoyolkokojkej ijkuak okitakej isiua Lot amo otetlakamatki, pero omoyolseuijkej porque yejuan okitlakamatkej Jehová.