Omoyejyeko itlaneltokilis Abrahán

Abrahán okimachti Isaac ma kitlasojtla Jehová uan ma kineltoka nochi tlen okijtoaya. Pero ijkuak Isaac okipiaya kanaj 25 xiuitl, Jehová okilui Abrahán ma kichiua itlaj tlen melauak oui. ¿Tikmati tlen okilui ma kichiua?

ToTajtsin Dios okilui Abrahán: “Nimitstlatlaujtia, xinechmaka mokone ken tlamanali itech se tepetl tlen kajki tlali Moria”. Abrahán amo okimatiaya tleka Jehová okilui ijkon ma kichiua, pero ye okitlakamatki.

Mostlatika ijkuak otlaneski, Abrahán, Isaac uan ome itlakeualuan oyajkej tlali Moria. Ijkuak yonejnentokaj eyi tonal, opejkej kinmitaj tepemej. Abrahán okinmilui itlakeualuan ompa ma mochiakan, ijkon ye uan Isaac kitlamaniliskiaj toTajtsin Dios. Abrahán okiuikak cuchillo uan Isaac okimamalti kuauitl. Isaac okitlajtlani itajtsin: “¿Kanin kajki yolkatl tlen tiktemakaskej ken tlamanali?”. Abrahán okinankili: “Nokone, Jehová techmakas”.

Abrahán uan Isaac okichijchijkej se altar ijkuak oajsitoj itech tepetl. Satepan, Abrahán okinmilpili ikxiuan uan imauan Isaac uan okitekak ipan altar.

Abrahán okikitski cuchillo. Pero iángel Jehová okilui desde iluikak: “¡Abrahán! ¡Amo itlaj xikchiuili telpochtli! Axkan nikmati titlaneltoka itech toTajtsin Dios, porque otiknekiaya tiktemakas mokone”. Satepan, Abrahán okitak se ichka tlen ikuakojuan omotsikojkej itech xiuitl. Ik non, okimikti ichka uan amo Isaac.

Ijkuakon, Jehová okijto Abrahán okatka iyolikni. ¿Tikmati tleka? Abrahán okichi nochi tlen Jehová okinauati, maski amo okimatiaya tleka ijkon okinauatiaya.

Jehová oksepa okilui Abrahán: “Nimitsteochiuas uan yetoskej miakej mokoneuan uan moxuiuan”. Non kijtosneki ika ikalchanejkauan Abrahán, Jehová kinteochiuas nochtin akinmej yolkualmej.