¿Akin okatka Job?

Itech tlali Uz, ochantiaya se tlakatl tlen okiueyichiuaya Jehová. Nin tlakatl omotokayotiaya Job. Ye okipiaya miak tomin uan miakej ikalchanejkauan. Noijki okatka yolkuali uan okinpaleuiaya akinmej amo itlaj okipiayaj, iknomej uan siuamej tlen omikej innamik. ¿Tikneltoka Job amo keman tlajyouiskia porque okatka yolkuali?

Maski Job amo okimatiaya, Satanás okitaya. Jehová okilui Satanás: “¿Yotikitak notekipanojka Job? Amo ikaj ken ye itech nochi Tlaltikpak. Tetlakamati uan kichiua tlen kuali”. Satanás okinankili: “Kema mitstlakamati, porque tikmaluia, tikteochiua, tikinmaka tlalmej uan yolkamej, pero xikixtili nochi uan ayakmo mitsueyichiuas”. Jehová okilui: “Uelis tiktlajyouiltis, pero amo xikmikti”. Jehová okikauili Satanás ma kitlajyouilti Job, ¿tikmati tleka? Jehová okimatiaya Job nochipa kitlakamatiskia.

Satanás okitlajyouilti Job uan ijkon okiyejyeko. Achto, okintekitilti tlakamej tlen okinmiluiayaj sabeos, yejuan okichtekej vacas, toros uan burros tlen okatkaj iaxkauan Job. Satepan ichkauan Job omikej ijkuak otlaxotlak. Noijki caldeos okichtekilijkej icamellos Job. Uan itlakeualuan Job tlen okinmaluiayaj iyolkauan noijki omikej. Pero tlen okachi teyolkoko opanok satepan: nochtin ikoneuan Job omikej ijkuak kali kanin otlakuajtokaj inpan ouetsiko. Job sapanoa omoyolkoko, pero amo okika Jehová.

Satanás okinekiaya okachi ma tlajyoui Job, ik non, okichi ma kipia se kokolistli itech nochi itlalnakayo. Nin kokolistli sapanoa okitlajyouilti. Job amo okimatiaya tleka okipanotoka miak tlamantli amo kuali, pero ok okiueyichiuaya Jehová. Ik non, Jehová melauak oyolpakik.

Satepan, Satanás okintekitilti eyi tlakamej para kiyejyekoskia Job. Yejuan okiluijkej: “Otitlajtlakolchi uan amo tikneki ikaj ma kimati. Ik non, toTajtsin Dios mitstlajyouiltijtok”. Job okijto: “Amo onitlajtlakolchi”. Pero satepan opejki kineltoka itlajtlakol toTajtsin Dios nochi tlen okipanotoka uan omokuayejyeko okichiuilijtoka tlen amo kuali.

Se telpochtli tlen omotokayotiaya Elihú okinkaktoka ijkuak omotlapouijtokaj uan amo itlaj okijtoaya. Pero satepan okinmilui: “Amo kuali tlen nankijtoaj. Jehová sapanoa yolkuali, ye amo keman kichiua tlen amo kuali. Ye kita nochi uan techpaleuia ijkuak tikpiaj ouijkayotl”.

Jehová noijki okitlapoui Job. Okilui: “¿Kanin otikatka ijkuak onikchijchi iluikak uan Tlaltikpak? ¿Tleka tikneltoka amo niyolkuali? Titlajtoa pero amo tikmati tleka ijkon panotok”. Job okiseli itlajtlakol uan okijto: “Amo kuali tlen onikchi. Xinechtlapojpolui tlen onikijto. Motech yonikak, pero axkan melauak nimitsixmati uan nikita nochi ueli tikchiua”.

Ijkuak opanok nochi ouijkayotl tlen okipixki Job, Jehová okipajti uan okimakak okachi miak tlamantli amo ken achto okipiaya. Job oyoltoka miak xiuitl uan oyolpakik. Jehová okiteochi porque nochipa okitlakamatiaya maski otlajyoui. ¿Tikchiuas ken Job uan nochipa tikueyichiuas Jehová maski san tlen panos?