Saiktlami chauistli tlen Jehová okititlanki

Moisés okilui faraón ayakmo oksepa kitati. Pero achto yaskia, okilui: “Tlajko yoak, mikiskej tlayekankonemej itech nochtin kalchanejkej tlen katej Egipto. Ikone faraón uan inkoneuan itlakeualuan, nochtin mikiskej”.

Jehová okinmilui israelitas: “Xitlakualchiuakan. Xikmiktikan se ichka noso se tentso tlen kipia se xiuitl uan ieso xikajtsoluikan itech kuauitl kanin mokitskijtok kaltlatsakuil. Xiktliuatsakan nakatl uan xikkuakan ika pan tlen amo kipia levadura. Ximoyektlalikan para nankisaskej, xikonakikan namotlaken uan namokakuan. Nin yoak namechmakixtis”. ¿Timokuayejyekoa ken oyolpakej israelitas?

Tlajko yoak, iángel Jehová opanok itech nochtin kalmej tlen okatkaj Egipto. Ye okinmikti tlayekankonemej kanin amo okatkaj estli itech kuauitl kanin omokitskijtoka kaltlatsakuil. Pero amo ikaj omikik itech kalmej kanin kema okatka estli. Omikej nochtin tlayekankonemej itech nochtin kalchanejkej tlen okatkaj Egipto maski okipiayaj tomin noso amo. Pero nion se tlayekankonetl israelita omikik.

Itlayekankone faraón noijki omikik. Faraón sapanoa omoyolkoko, ik non, okinmilui Moisés uan Aarón: “¡Xiakan! ¡Xikisakan uan xikueyichiuakan namoDios! ¡Xikinuikakan namoyolkauan uan xiakan!”.

Non yoak, chikauak okatka metstli. Israelitas omotekpankej ken kalchanejkej uan okiskej Egipto. Okatkaj 600,000 (seiscientos mil) tlakamej uan noijki miakej siuamej uan konemej. Miakej tlen amo okatkaj israelitas noijki okiskej para kiueyichiuaskiaj Jehová. ¡Israelitas ayakmo okatkaj tlakeualmej!

Israelitas omonekiaya sejse xiuitl tlakualchiuaskiaj ijkon ken Jehová okinnauati uan ijkon kilnamikiskiaj ye okinmakixti. Non iluitl okitokayotijkej Pascua.