Israelitas amo okitlakamatkej Jehová

Jehová okilui Moisés: “Xitlejko ipan tepetl kanin nika. Uan nikinmijkuilos notlanauatiluan itech tetl uan nimitsinmakas”. Moisés otlejkok ipan tepetl uan ompa omoka 40 tonalmej uan 40 yoak. Ijkuak ompa okatka, Jehová okijkuilo Majtlaktli Tlanauatilmej itech ome temej patlauakej uan okinmakak Moisés.

Pero ijkuak opanok seki tonal, israelitas omokuayejyekojkej Moisés okinkajte. Yejuan okiluijkej Aarón: “¡Tiknekij ikaj ma techyekana. Xitechchijchiuili se dios!”. Aarón okinnankili: “Xinechualikilikan oro tlen nankipiaj”. Ye okipatilti oro uan okichijchi se torojkonetl. Israelitas okijtojkej: “¡Nin torojkonetl todios tlen otechkixti Egipto!”. Oiluichijkej uan okiueyichijkej torojkonetl. ¿Otlajtlakolchijkej? Kema, porque israelitas okijtojkej san Jehová kiueyichiuaskiaj. Pero amo ijkon okichijkej.

Jehová okitak tlen opanotoka uan okilui Moisés: “Xio kanin kajki altepetl, yejuan amo nechtlakamatij. Kiueyichijtokej se dios”. Moisés otemok uan okinuikaya ome temej kanin oijkuilitokaj Majtlaktli Tlanauatilmej.

Ijkuak Moisés yoajsitoka kanin okatkaj israelitas, okikak ken otlakuikatokaj. Ijkuak oajsito, okinmitak omijtotijtokaj uan okiueyichijtokaj torojkonetl. Moisés sapanoa okualanki, okintlamotlak ome temej uan otlapankej. San niman okixaxamanito torojkonetl uan okitlajtlani Aarón: “¿Tlen omitsiluijkej, ik non, otikchi nin tlamantli amo kuali?”. Aarón okinankili: “Amo xikualani, te tikmati ken inyelis. Okinekiayaj se dios, ik non, oniktlali oro ijtik tlitl uan okiski nin torojkonetl”. Amo kuali tlen okichi Aarón. Moisés oksepa otlejkok ipan tepetl uan okilui Jehová ma kintlapojpolui israelitas.

Jehová okintlapojpolui israelitas tlen okinekiayaj kitlakamatiskej. Yejuan omonekiaya ma kitlakamatikan Jehová uan noijki Moisés, ¿amo melauak?