Okixnamikej Jehová

Satepan, ijkuak israelitas ok okatkaj kanin tlauaki, Coré, Datán, Abiram uan 250 tlakamej okixnamikej Moisés. Okiluijkej: “¡Yonantechkualanijkej! ¿Tleka moneki te titechyekanas? ¿Uan tleka Aarón ueyi teopixki? Jehová amo san namouan kajki, noijki touan kajki”. Jehová amo okipakti ijkon ma kijtokan porque okimachili ye okixnamiktokaj.

Moisés okilui Coré uan akinmej iuan okatkaj: “Mostla xiktlalilikan kopali tlen ika nantlapopochuiaj. Uan xiualakan nikan tabernáculo. Jehová kiteititis akin okipejpenki”.

Mostlatika, Coré uan 250 tlakamej omonechikojkej iuan Moisés itech tabernáculo. Ompa opejkej kitlatiaj kopali ken yetoskiaj teopixkej. Ijkuakon, Jehová okilui Moisés uan Aarón: “Ximoxelokan itech Coré uan akinmej kipaleuiaj”.

Coré oyajki tabernáculo kanin okatka Moisés, pero Datán, Abiram uan inkalchanejkauan amo oyajkej. Jehová okinmilui israelitas: “Ximoxelokan itech inmantajkaluan Coré, Datán uan Abiram”. Israelitas san niman omoxelojkej. Datán, Abiram uan inkalchanejkauan omokajkej kanin okatkaj inmantajkaluan. Ijkuakon, tlali omotlapo uan okintolo akinmej amo otetlakamatkej. Uan itech tabernáculo, oualtemok tlitl desde iluikak uan okinmixpolo Coré uan 250 tlakamej tlen iuan okatkaj.

Satepan, Jehová okilui Moisés: “Nochtin tlakamej tlen kinyekanaj tlanechikolmej ma kiualikakan intlako. Xikijkuilo intoka itech intlako. Pero xikijkuilo itoka Aarón itech itlako tlanechikol Leví. Nochtin intlako xikintlali ijtik tabernáculo. Uan itlako tlakatl tlen ne nikpejpenas, xochikisas”.

Mostlatika, Moisés okinkixti intlako nochtin tlayekankej uan okinmititi. Itlako Aarón oxochikiski uan okipiaya almendras tlen yochikauak. Ijkon Jehová okiteititi okipejpenki Aarón para yetoskia ueyi teopixki.