Se tlayekanki yolkuali uan ome siuamej yolchikauakej

Josué okiyekanki ialtepe Jehová miak xiuitl uan omikik ijkuak okipiaya 110 xiuitl. Israelitas okiueyichijkej Jehová ijkuak okatka Josué. Pero ijkuak omikik, opejkej kinueyichiuaj oksekimej dioses ken okichiuayaj akinmej ochantiayaj Canaán. Israelitas ayakmo okitlakamatkej Jehová, ik non, ye okika ma kintlajyouilti ueyi tekiua cananeo tlen omotokayotiaya Jabín. Satepan, israelitas okitlatlaujtijkej Jehová ma kinpaleui. Ik non, Jehová okitlali se yankuik tlayekanki tlen omotokayotiaya Barac. Ye kinpaleuiskia israelitas oksepa ma kiueyichiuakan Jehová.

Débora okatka se siuatl teotlajtojki. Ye okinotski Barac uan okilui tlen okijto Jehová: “Xio kanin kajki aueyatl Cisón uan xikinuika 10,000 tlakamej ma moteuikan iuan isoldados Jabín. Ompa tiktlanilis Sísara akin kinyekana isoldados”. Barac okinankili Débora: “Nias tla te nouan tias”. Ye okilui: “Mouan nias, pero xikmato amo te tikmiktis Sísara. Jehová yokijto se siuatl kimiktis”.

Débora, Barac uan isoldados otlejkokej ipan tepetl Tabor, ompa omoyektlalijkej para moteuiskiaj. Ijkuak Sísara okimatki non, okinnechiko icarretas tlen ika otlateuiayaj uan isoldados ompa ixtlauak. Débora okilui Barac: “Axkan Jehová kichiuas xitlatlani”. Ijkuakon, Barac uan 10,000 isoldados otemokej uan omoteuijkej iuan isoldados Sísara.

Satepan, Jehová okichi ma moskalti aueyatl Cisón, otlaatenki uan icarretas Sísara omotsikotoj ijtik sokitl. Sísara otemok itech icarreta uan ocholo. Barac uan isoldados okintlanilijkej isoldados Sísara pero Sísara omotlatito ijtik imantajkal se siuatl tlen omotokayotiaya Jael. Ye okimakak tepitsin leche uan okitlakenti ika se tsotsoli. Sísara okochki porque osotlauatoka. Ijkuakon, Jael yolik uan ichtaka omotoki inauak uan okitsoponili se kuauitl itech itsonteko uan omikik.

Satepan, Barac okitemojtinemiaya Sísara uan oajsito itech imantajkal Jael. Jael okiski uan okilui: “Xikalaki uan nimitsititis tlakatl tlen tiktemojtok”. Barac okalak ijtik mantajkali uan okitak Sísara yomikik. Ijkuakon, Barac uan Débora okitlakuikilijkej Jehová uan okiueyichijkej porque okinpaleui ma tlatlanikan. Israelitas okipixkej yolseuilistli 40 xiuitl.