Ana okitlatlaujti Jehová ma kimaka se ikone

Se israelita tlen omotokayotiaya Elcaná okinpiaya ome isiuauan, se omotokayotiaya Ana uan okse Peniná. Pero okachi okitlasojtlaya Ana. Peniná okinpiaya miakej ikoneuan pero Ana amo okipiaya nion se. Ik non, Peniná okipinauiaya Ana. Sejse xiuitl, Elcaná okinuikaya ikalchanejkauan altepetl Siló. Ompa okiueyichiuayaj Jehová itech tabernáculo. Se tonal ijkuak ompa okatkaj, Elcaná okitak Ana sapanoa omoyolkokoaya. Ik non, okilui: “Ana amo xichoka. Mouan nika uan nimitstlasojtla”.

Satepan, Ana iselti omotlatlaujtito. Sapanoa ochokaya uan okitlatlaujti Jehová ma kipaleui. Okilui: “Jehová, tla tinechmakas se chokotsin, nimitsmaktilis para nochipa ma mitstekichiuili”.

Ueyi teopixki Elí okitak Ana ochokatoka uan san okoliniaya ikamak. Ye omokuayejyeko otlauanki. Ana okiyekilui: “Amo noteko, amo onitlauanki. Itlaj sapanoa nechyolkokoa uan onimotlapouijtoka iuan Jehová”. Elí okitak amo opanotoka tlen omokuayejyeko uan okilui Ana: “Jehová ma mitsmaka tlen otiktlajtlanili”. Ana kuali omomachili uan oyajki. Amo opanok nion se xiuitl uan Ana okipixki se chokotsin uan okitokayoti Samuel. ¡Ana sapanoa oyolpakik!

Ana amo okilka tlen okilui Jehová. Ijkuak ayakmo okichichitiaya Samuel, san niman okiuikak itech tabernáculo ma kitekichiuiliti Jehová. Ana okilui Elí: “Oniktlatlaujti Jehová uan onikilui ma nechmaka nin chokotsin uan axkan nikmaka para nochipa ma kitekichiuili”. Elcaná uan Ana sejse xiuitl oyayaj kitlajpalotiuij Samuel uan okiuikiliayaj yankuik itlaken tlen amo okipiaya imauan. Satepan, Jehová okichi Ana ma kinpia ok eyi chokotsitsintin uan ome takotsitsintin.