David okitlanili Goliat

Jehová okilui Samuel: “Xio ikalijtik Jesé. Se ikone yetos yankuik ueyi tekiua itech Israel”. Ik non, Samuel oyajki ikalijtik Jesé uan ijkuak okitak itlayekankone, omokuayejyeko: “Jehová okipejpenki nin telpochtli”. Pero Jehová okilui Samuel amo ye okipejpenki uan okiyekilui: “Ne nikita ken inyelis tlaltikpaktlakamej, amo ken tlachixtokej”.

Jesé okinnotski ok chikuase ikoneuan para ma kinmixmati Samuel. Pero Samuel okijto: “Jehová amo okipejpenki nion se. ¿Tikinpia oksekimej mokoneuan?”. Jesé okinankili: “Poliui xokoyotl tlen itoka David, kinmaluijtok ichkamej”. Ijkuak David oajsito, Jehová okilui Samuel: “¡Nin onikpejpenki!”. Ijkuakon, Samuel okitlalili aceite ipan itsonteko. Ijkon okipejpenki para yetoskia yankuik ueyi tekiua itech Israel.

Seki kauitl satepan, israelitas omoteuijtokaj iuan filisteos. Yejuan okipiayaj se soldado sapanoa uejkapantik tlen omotokayotiaya Goliat. Ye mojmostla okinpinauiaya israelitas uan chikauak okijtoaya: “Xikualtitlanikan se tlakatl para nouan ma moteui. Tla nechtlanilis, tiyetoskej namotlakeualuan. Pero tla niktlanilis, nanyetoskej totlakeualuan”.

Ikniuan David okatkaj soldados. Se tonal, David okinkauilito intlakual kanin okatkaj nochtin soldados. Ompa David okikak tlen okijtoaya Goliat. Ik non, David okijto: “¡Ne iuan nimoteuis!”. Ueyi tekiua Saúl okilui: “Pero ok titelpochtli”. David okinankili: “Jehová nechpaleuis”.

Saúl okitlaneti iarmadura, pero David okijto: “Amo uelis nimoteuis ika nin”. Ik non, David okikitski imatemeka. Se matemekatl okitekitiltiayaj para ika uejka kintitlaniskiaj temej. Oyajki kanin okatka se aueyatl uan okinpejpenki makuili temej petstikej uan okinkalaki ijtik ipoxa. David omotlalo kanin okatka Goliat. Uan Goliat chikauak okijto: “¡Chokotsin, xiuiki uan tikitas! Motlalnakayo nikinmakas ma kikuakan totomej uan yolkamej”. David amo omomojti uan okinankili: “Te tikualika se espada uan se lanza, pero ne nio moixpan ika itoka Jehová. Amo touan timoteuijtok, timoteuijtok iuan toTajtsin Dios. Nochtin akinmej nikan katej kitaskej Jehová okachi chikauak uan amo se espada noso se lanza. Ye kichiuas ma timechtlanilikan”.

Satepan, David okitlali se tetl itech imatemeka uan chikauak okimotlak Goliat. Jehová okichi tetl ma kalaki ixkuak Goliat. San niman, nin tlakatl uejkapantik ouetsito uan omikik. Ijkuakon, filisteos ocholojkej para amo kinmiktiskiaj. ¿Titlaneltoka itech Jehová ijkon ken David?