David uan Saúl

Satepan ijkuak David okimikti Goliat, ueyi tekiua Saúl okilui ma kinyekana soldados. David otlatlanki itech miakej guerras, ik non, miakej okixmatiayaj. Ijkuak David omokuepaya ikalijtik ijkuak otlamiaya se guerra, siuamej okiseliayaj, omijtotiayaj uan otlakuikayaj: “Saúl okintlanili miakej, pero David okintlanili sapanoa miakej”. Ik non, Saúl opejki kikokolia uan okinekiaya kimiktis.

David kualtsin okitsotsonaya arpa. Se tonal, ijkuak David okitsotsontoka arpa ixpan Saúl, ye okimotlak ika ilanza. Pero David omokuatolo uan lanza otsoponito itech tepamitl. Satepan, Saúl miak uelta okiyejyeko kimiktis David. Ik non, David ocholo uan omotlatito kanin tlauaki.

Saúl uan 3,000 soldados okitemojtinemiayaj David. Se tonal, Saúl okalak ijtik cueva kanin omotlatijtokaj David uan akinmej okipaleuiayaj. Tlakamej ichtaka okiluijkej David: “Axkan uelis tikmiktis Saúl”. David omotokijtia kanin okatka Saúl uan okitekili tepitsin itlaken pero ye amo okimachili. Satepan, David amo kuali omomachili porque amo okitlakaitak ueyi tekiua tlen Jehová okipejpenki. Ik non, amo okitekauili itlaj ma kichiuilikan. Ijkuak Saúl okiski itech cueva, David chikauak okilui: “Uelis nimitsmiktiskia pero amo onikchi”. ¿Tikneltoka Saúl ayakmo kikokoliskia David?

Amo. Saúl ok okitemojtinemiaya David. Se yoak, David uan isobrino tlen omotokayotiaya Abisái san ichtaka oyajkej kanin okatkaj Saúl uan isoldados. Nochtin okochtokaj, hasta Abner akin okimaluiaya Saúl, noijki okochtoka. Abisái okilui David: “¡Axkan kema kitas! Xinechkauili ma nikmikti Saúl”. Pero David okinankili: “Jehová kimati tlen kichiuilis. San xikonana ilanza uan ikontsin uan ma tiakan”.

Satepan, David otlejkok ipan se tepetl tlen ik ompa okatka. Ompa tlakpak okinmitaya Saúl uan isoldados. David chikauak okijto: “¡Abner! ¿Tleka amo tikmaluia ueyi tekiua? ¿Kanin kajki ikontsin uan ilanza?”. Saúl okitenkak David uan okilui: “Uelis tinechmiktiskia pero amo otikchi. Axkan nikmati te titlanauatis itech Israel”. Ijkuakon, Saúl omokuepki ikalijtik. Pero amo nochtin ikalchanejkauan Saúl okikokoliayaj David.