Jehová okiyolchika Elías

Jezabel sapanoa okualanki ijkuak okimatki tlen okinpanok teotlajtojkej tlen okiueyichiuayaj Baal. Ik non, okititlanki se tlakatl ma kiluiti Elías: “Mostla timikis ijkon ken omikej teotlajtojkej tlen okiueyichiuayaj Baal”. Elías omomojti uan ocholo kanin tlauaki. Ompa omotlatlaujti: “Jehová, ayakmo nitlaxikoa. Nikneki nimikis”. Elías sapanoa osotlajtoka, ik non, okochki itlampa se kuauitl.

Pero se ángel okixiti Elías uan yolik okilui: “Ximeua uan xitlakua”. Elías okitak se pan ipan temej tlen oxotlatokaj uan se kontsin tlen okipiaya atl. Otlakua, oatlik uan oksepa okochki. Ángel oksepa okixiti uan okilui: “Xitlakua. Moneki tikpias chikaualistli para uejka tias”. Ik non, Elías okachi otlakua. Satepan onejnenki 40 tonalmej uan 40 yoak hasta oajsito itech tepetl Horeb. Ompa okalak ijtik se cueva uan okochki. Ijkuakon, Jehová okilui: “¿Tlen tikchijtok nikan Elías?”. Elías okinankili: “Israelitas amo okichijkej tlen omitsiluijkej. Okinpojpolojkej altares tlen moaxkauan uan okinmiktijkej teotlajtojkej. Noijki kinekij nechmiktiskej”.

Jehová okilui Elías: “Xikisa uan ximoketo ipan tepetl”. Ijkuakon, chikauak oejekak, chikauak otlalolinki uan omotak se tlitl. Saiktlami, Elías okikak se kualtsin tlajtoli. Ik non, omoixtlapacho ika itlaken uan ompa omoketoka. Jehová okitlajtlani tleka ocholo. Elías okinankili: “Noselti onimoka, ayakmo kajki okse teotlajtojki”. Pero Jehová okilui: “Amo tika moselti. Ok katej 7,000 akinmej nechueyichiuaj itech altepetl Israel. Xio uan xikiluiti Eliseo mitspatkayotis ken teotlajtojki”. Elías san niman okichi tlen okinauati Jehová. ¿Tikneltoka Jehová noijki mitspaleuis tla tiktlakamati? Kema, ye mitspaleuis. Axkan, ma tikitakan itech okse tlamachtil tlen opanok ijkuak ayakmo okiauik.