Se siuatl ueyi tekiua amo yolkuali

Ueyi tekiua Acab ochantiaya altepetl Jezreel. Desde ikalijtik okitaya se tlali kanin okitokayaj uvas. Non tlali okatka iaxka se tlakatl tlen omotokayotiaya Nabot. Acab okinekiaya non tlali uan okilui Nabot ma kinemakilti. Pero Nabot amo okinek kinemakiltis porque iTlanauatil Jehová okijtoaya amo uelis kinemakaskiaj tlali tlen okinkajteuiliayaj intatajuan. Nabot okichi tlen kuali. ¿Tikneltoka Acab okipakti tlen okichi Nabot? Amo. Acab sapanoa okualanki, ik non, omokaltsak uan ayakmo okinekiaya tlakuas.

Isiua Acab okatka Jezabel, se siuatl ueyi tekiua amo yolkuali. Ye okilui: “Te titlanauatia itech altepetl Israel, uelis tikpias san tlen tiknekis. Ne nimitsmakas non tlali”. Ijkuakon, Jezabel okinmijkuilo seki cartas uan okintitlanili akinmej otlayekanayaj itech altepetl. Itech nonmej cartas otlanauati ma kijtokan Nabot okiuijuikalti toTajtsin Dios uan omonekiaya ma kimiktikan ika tetl. Tlayekankej okichijkej ken otlanauati Jezabel. Satepan, Jezabel okilui Acab: “Nabot yomikik. Yiuelis tikmoaxkatis itlal kanin okitokaya uvas”.

Jezabel amo san okimikti Nabot. Noijki okinmikti miakej akinmej okitlasojtlayaj Jehová. Noijki okinueyichiuaya teotsitsintin uan okichiuaya miak tlamantli tlen amo kuali. Pero Jehová okitak nochi tlen okichiuaya Jezabel. ¿Tlen okichi Jehová?

Seki kauitl satepan ijkuak Acab omikik, ikone tlen omotokayotiaya Jehoram opejki tlanauatia. Ijkuakon, Jehová okititlanki se tlakatl tlen omotokayotiaya Jehú para kitlajyouiltiskia Jezabel uan ikalchanejkauan.

Jehú otlejkok ipan icarreta uan oyajki altepetl Jezreel, ompa ochantiaya Jezabel. Jehoram noijki otlejkok ipan icarreta uan okinamikito Jehú. Ijkuak omonamikej itech ojtli, Jehoram okitlajtlani Jehú: “¿Tikpiaj yolseuilistli?”. Jehú okinankili: “Amo tikpiaskej yolseuilistli tla monantsin Jezabel ok tlajtlakolchijtos”. Ijkuak Jehoram yiyaskia, Jehú okimotlak ika se flecha uan okimikti.

Satepan, Jehú oyajki kanin ochantiaya Jezabel. Ijkuak Jezabel okimatki ajsiskia Jehú, omotlapalui, omoxilui uan okichixki itech ventana tlen okatka ikuapak ikalijtik. Ijkuak Jehú oajsito, Jezabel okiuijuikalti. Jehú chikauak okinmilui tlakeualmej tlen okatkaj iuan Jezabel: “¡Xiktlamotlakan!”. Yejuan okitlamotlakej Jezabel itech ventana uan omikik.

Satepan, Jehú okinmikti 70 ikoneuan Acab uan okichi ayakmo ma kiueyichiuakan Baal itech nochi altepetl. ¿Otikitak? Jehová nochi kimati uan kintlajyouiltia ijkuak moneki akinmej kichiuaj tlen amo kuali.