Se takotsin okipaleui se soldado tlen omokokoaya

Itech Siria, okatka se takotsin tlen amo ochantiaya iuan ikalchanejkauan nion itech ialtepe. Soldados sirios okiuikakej uejka uan ye okitekichiuiliaya isiua Naamán. Nin tlakatl okinyekanaya soldados. Takotsin okiueyichiuaya Jehová maski akinmej inmiuan ochantiaya amo ijkon okichiuayaj.

Naamán okipiaya se kokolistli temomojti itech itlalnakayo tlen sapanoa okikokoaya. Takotsin okinekiaya kipaleuis, ik non, okilui isiua Naamán: “Nikixmati se tlakatl tlen uelis kipajtis monamik. Itech Israel chanti se iteotlajtojki Jehová tlen itoka Eliseo. Ye uelis kipajtis monamik”.

Nin siuatl okilui Naamán tlen okijto takotsin. Naamán okinekiaya pajtis, ik non, oyajki altepetl Israel okitato Eliseo. Naamán omokuayejyeko Eliseo kiseliskia ken se tlakatl ueyititok. Pero Eliseo amo omotlapoui iuan Naamán, ye okititlanki itlakeual ma kiseliti uan ma kiluiti: “Xio uan xikalaki chikome uelta ijtik aueyatl Jordán. Ijkon tipajtis”.

Naamán amo okipakti tlen okilui uan okijto: “Onimokuayejyeko nin tlakatl kinotsaskia iDios para nechpajtiskia uan nopan kintlaliskia imauan. Pero san onechilui ma nio itech aueyatl tlen kajki Israel. Itech Siria katej okachi kuali aueyamej. ¿Tleka amo ompa nimopajtiti?”. Naamán sapanoa okualanki uan oyajki.

Itlakeualuan Naamán okipaleuijkej kuali ma mokuayejyeko uan okiluijkej: “¿Amo melauak tikchiuaskia san tlen mitsiluiskej para tipajtis? Amo oui tlen omitsilui nin teotlajtojki. ¿Tleka amo tikchiua?”. Naamán okinkak, ik non, oyajki kanin okatka aueyatl Jordán uan chikome uelta okalak ijtik atl. Ijkuak okalak chikome uelta uan okiski, Naamán opajtik. Sapanoa oyolpakik uan okitlasojkamatilito Eliseo, okilui: “Axkan nikmati Jehová melauak toTajtsin Dios”. Naamán omokuepki ikalijtik uan ayakmo omokokoaya. ¿Ken timokuayejyekoa omomachili takotsin israelita ijkuak okitak Naamán?