Isoldados Jehová tlen omilintokaj

Ueyi tekiua Ben-Hadad akin otlanauatiaya Siria, miak uelta okiteui altepetl Israel. Pero teotlajtojki Eliseo nochipa okiluiaya ueyi tekiua itech Israel ma cholo. Ik non, Ben-Hadad okinekiaya kikitskis Eliseo. Ijkuak okimatki okatka altepetl Dotán, okintitlanki isoldados para ma kikitskikan.

Soldados sirios oajsitoj altepetl Dotán ijkuak yotlayoak. Ijkuak otlaneski, tlakatl tlen okipaleuiaya Eliseo okiski uan okinmitak miakej soldados okiyaualojtokaj altepetl. Sapanoa omomojti uan chikauak okijto: “Eliseo, ¿tlen tikchiuaskej?”. Eliseo okinankili: “Touan katej okachi miakej soldados”. Ijkuakon, Jehová okichi tlakatl tlen okipaleuiaya Eliseo ma kinmita miakej caballos uan carretas tlen omilintokaj ipan tepemej tlen okiyaualoayaj altepetl.

Ijkuak soldados sirios okinekiayaj kikitskiskej Eliseo, ye omotlatlaujti uan okijto: “Jehová, nimitstlatlaujtia, xikchiua ayakmo ma tlachiakan”. San niman, maski soldados ok otlachiayaj amo okimatiayaj kanin okatkaj. Ijkuakon, Eliseo okinmilui: “Nikan amo kajki akin nankitemoaj, ne namechuikas kanin kajki non tlakatl”. Yejuan oyajkej iuan Eliseo hasta Samaria. Ompa ochantiaya ueyi tekiua itech Israel.

Saiktlami, soldados sirios okimatkej kanin okatkaj, pero ayakmo uelis choloskiaj. Ueyi tekiua itech Israel okitlajtlani Eliseo: “¿Ma nikinmikti?”. Sirios okinekiayaj kikitskiskej Eliseo, ik non, ye uelis momakuepaskia. Pero amo okichi. Ye okilui ueyi tekiua: “Amo xikinmikti. Xikintlamaka uan xikinkauili ma yakan”. Ueyi tekiua okintlamakak uan satepan okinkauili ma yakan inkalijtik.