Jehová okilui Jeremías ma tetlapoui

Jehová okitlali Jeremías ken teotlajtojki itech Judá. Okinauati ma kintlapoui akinmej ompa ochantiayaj uan ma kinmilui ayakmo ma kichiuakan tlen amo kuali. Pero Jeremías okilui Jehová: “Ne ok nitelpochtli, amo ueli nitlajtoa inmixpan miakej”. Jehová okilui: “Amo ximomojti, ne nimitspaleuis uan nimitsiluis tlen tikijtos”.

Jehová okilui Jeremías ma kinnechiko tlayekankej tlen ompa okatkaj uan okilui inmixpan ma kitlapana se komitl uan ma kinmilui: “Ijkin kipanos Jerusalén”. Tlayekankej sapanoa okualankej ijkuak Jeremías ijkon okichi. Se teopixki tlen omotokayotiaya Pasjur okiuitek Jeremías uan okitlali itech cepo kanin okintseko imauan uan ikxiuan itech tablas. Jeremías amo ueli omoliniaya nochi se yoak. Mostlatika, Pasjur okika ma uia. Ijkuakon, Jeremías okijto: “Yonimosotla. Ayakmo nitetlapouis”. ¿Melauak ijkon okichi? Amo. Jeremías kuali omokuayejyeko uan okijto: “ITlajtol Jehová ken se tlitl tlen kajki noijtik. Moneki nitetlapouis”. Jeremías oksepa opejki tetlapouia uan okinmilui oksekimej tlen kinpanoskia.

Miak xiuitl satepan, okitlalijkej se yankuik ueyi tekiua itech Judá. Teopixkej uan akinmej amo melauak okatkaj teotlajtojkej amo okinpaktiaya tlen okijtoaya Jeremías. Ik non, okinmiluijkej príncipes: “Nin tlakatl moneki ma kimiktikan”. Jeremías okijto: “Nantlajtlakolchiuaskej tla nannechmiktiaj. Ne nikijtoa tlen Jehová nechiluia, amo tlen nimokuayejyekoa”. Ijkuak príncipes okikakej tlen okijto Jeremías, okijtojkej: “Nin tlakatl amo moneki ma kimiktikan”.

Jeremías ok otetlapouiaya, pero príncipes opejkej sapanoa kualanij uan okiluijkej ueyi tekiua ma kimiktikan Jeremías. Ueyi tekiua okinmilui ma kichiuilikan tlen kinekiskiaj. Ik non, okikitskijkej Jeremías uan okitlamotlakej ijtik se tekochtli uejkatlan kanin okatka miak sokitl para mikiskia. Jeremías opolakijtoka ijtik sokitl.

Se tlayekanki tlen omotokayotiaya Ébed-Mélec okilui ueyi tekiua: “Príncipes okitlamotlakej Jeremías ijtik se tekochtli. Mikis tla ompa tikkauaskej”. Ueyi tekiua okilui Ébed-Mélec ma kinuika 30 tlakamej uan ma kikixtikan Jeremías. Amo itlaj okitsakuili Jeremías, ye nochipa otetlapoui. ¿Tikneki tiyetos ken Jeremías?