Tepamitl tlen okiyaualoaya Jerusalén

Ma tikitakan tlen opanok seki xiuitl achto. Nehemías okatka se israelita tlen ochantiaya altepetl Susa, nin okatka itech ueyi altepetl Persia. Ye okitekichiuiliaya ueyi tekiua Artajerjes. Se tonal, ikni Nehemías tlen oualaya itech Judá, okilui ninmej amo kuali tlajtolmej: “Uelis itlaj kinpanos israelitas tlen omokuepkej Jerusalén. Ok ayamo kiyektlaliaj tepamitl tlen kiyaualoa altepetl uan ikaltlatsakuiluan tlen babilonios okinxixinijkej”. Nehemías omoyolkoko. Okinekiaya tlapaleuis, ik non, okitlatlaujti toTajtsin Dios para ueyi tekiua kikauiliskia ma uia Jerusalén.

Satepan, ueyi tekiua okitak Nehemías omoyolkokoaya uan okilui: “Amo keman ijkin onimitsitaya. ¿Tlen mitspanoa?”. Nehemías okinankili: “Nimoyolkokoa porque yoxixinki noaltepe Jerusalén”. Ueyi tekiua okitlajtlani: “¿Ken uelis nimitspaleuis?”. Ijkuakon, Nehemías ichtaka omotlatlaujti. Satepan okilui: “Nimitstlatlaujtia, xinechkauili ma nio Jerusalén para nikyektlalis tepamitl”. Ueyi tekiua Artajerjes okikauili ma uia uan okipaleui para amo itlaj ma kipano itech ojtli. Noijki, okitlali ma tlanauati itech Judá uan okimakak kuauitl tlen ika kinchijchiuaskia ikaltlatsakuiluan altepetl.

Ijkuak Nehemías oajsito Jerusalén, okitato ken okatka tepamitl. Satepan, okinnechiko teopixkej uan tlayekankej uan okinmilui: “Nin amo kuali kajki. Moneki ma titekitikan”. Nochtin okinpakti tlen okijto Nehemías uan opejkej kiyektlaliaj tepamitl.

Akinmej okinkokoliayaj israelitas okinpinauijkej uan okinmiluiayaj: “Hasta se zorro uelis kitlamotlas tepamitl tlen nankichijchijtokej”. Pero akinmej otekititokaj amo okinkakej uan chikauak otekitikej. Okachi uejkapan uan chikauak okichijchijkej tepamitl.

Ijkuakon, miakej akinmej okinkokoliayaj israelitas tlen tlatlamantli inmialtepe okijtojkej kipojpoloskiaj Jerusalén. Judíos okimatkej uan omomojtijkej. Pero Nehemías okinmilui: “Amo ximomojtikan, Jehová touan kajki”. Noijki, okintlali akinmej otlamaluiayaj, ijkon amo itlaj okinpanok akinmej otekititokaj.

San itech 52 tonalmej otlankej okichijchijkej tepamitl uan kaltlatsakuilmej. Nehemías okinnechiko levitas itech Jerusalén para iluichiuaskiaj porque okitlamijkej tekitl. Okintlajkoxelo akinmej otlakuikayaj. Sekimej oyajkej iuan Esdras uan oksekimej iuan Nehemías. Otlejkokej ipan tepamitl itech escaleras kanin okatka Puerta de la Fuente. Satepan, akinmej okatkaj iuan Esdras oyajkej inakastlan tepamitl uan akinmej okatkaj iuan Nehemías oyajkej okse inakastlan tepamitl uan okiyaualojkej altepetl. Okitsotsonayaj trompetas, címbalos uan arpas uan okitlakuikiliayaj Jehová hasta omonamikitoj itech teokali. Tlakamej, siuamej uan konemej okitlamanilijkej Jehová uan oiluichijkej. Sapanoa oyolpaktokaj uan intlajtol uejka omokakiaya.