Elisabet okipixki se ikone

Teopixki Zacarías uan isiua tlen omotokayotiaya Elisabet ochantiayaj ik Jerusalén. Opanok 400 xiuitl desde okiyektlalijkej tepamitl tlen okiyaualoaya Jerusalén. Zacarías uan Elisabet yokipiayaj miak xiuitl omonamiktijkej, pero amo okinpiayaj inkoneuan. Se tonal, Zacarías okitlatijtoka kopali ijtik teokali uan okimonextili ángel Gabriel. Zacarías sapanoa omomojti, pero ángel Gabriel okilui: “Amo ximomojti. Nimitsiluis kuali tlajtolmej tlen Jehová kineki xikmati. Mosiua Elisabet kipias se konetsintli uan motokayotis Juan. Jehová yokipejpenki Juan para kichiuas se tekitl miak ipati”. Zacarías okitlajtlani: “¿Ken nikmatis kox melauak tlen tikijtoa? Nosiua uan ne yitikpiaj miak xiuitl, amo uelis tikpiaskej tokone”. Gabriel okinankili: “ToTajtsin Dios onechualtitlanki para nimitsiluis ninmej kuali tlajtolmej. Pero ken amo tinechneltokilia, ayakmo titlajtos hasta satepan ijkuak nesis konetsintli”.

Zacarías ouejka ijtik teokali. Ijkuak ye okiski, akinmej okatkaj kiauak okinekiayaj kimatiskej tlen opanok. Pero Zacarías amo ueli otlajtoaya, san okichiuaya señas. Ijkon nochtin okimatkej toTajtsin Dios itlaj okimatilti Zacarías.

Satepan, Elisabet okipixki se chokotsin ijkon ken ángel okijto. Ikalchanejkauan uan iyolikniuan Elisabet okixmatitoj konetsintli uan oyolpakej. Elisabet okijto: “Tiktokayotiskej Juan”. Yejuan okinankilijkej: “Nion se mokalchanejka ijkon itoka. Okachi kuali xiktokayotikan Zacarías ijkon ken itajtsin”. Pero Zacarías okijkuilo: “Itoka Juan”. Ijkuakon, Zacarías oksepa opejki tlajtoa. Nochtin akinmej ochantiayaj Judea okimatkej oneski non konetsintli uan omotlajtlaniayaj: “¿Tlen kichiuas ijkuak moskaltis?”.

Zacarías okiseli espíritu santo uan okijto tlen panoskia satepan: “¡Ma tikueyichiuakan Jehová! Ye okilui Abrahán kiualtitlaniskia Mesías para techmakixtis. Uan Juan yetos teotlajtojki tlen kitematiltis uits Mesías”.

Noijki okipanok itlaj tlen miak ipati se ikalchanejka Elisabet tlen omotokayotiaya María. Tikitaskej tlen okipanok itech okse tlamachtil.