Otetlapouijkej itech miakej altepemej

Tlatitlanilmej otetlapouijkej kuali tlajtolmej ijkon ken Jesús okinmilui ma kichiuakan itech nochi Tlaltikpak. Itech xiuitl 47, tokniuan tlen ochantiayaj Antioquía okintitlankej Pablo uan Bernabé ma tetlapouitij itech okseki altepemej. Yejuan otetlapouijkej ika miak pakilistli itech nochi Asia Menor itech altepemej ken Derbe, Listra uan Iconio.

Pablo uan Bernabé okintlapouiayaj nochtin: akinmej okipiayaj miak tomin uan akinmej amo, akinmej ok telpokamej uan akinmej yokipiayaj miak xiuitl. Miakej opejkej kichiuaj ken Cristo. Pablo uan Bernabé noijki okitlapouijkej se tlakatl tlen omotokayotiaya Sergio Paulo, ye otlanauatiaya Chipre, pero se tlakatl tlen otetlajchiuiaya okinekiaya kintsakuilis para ayakmo ma tetlapouikan. Pablo okilui non tlakatl: “Jehová mitstlajyouiltis”. Ijkuakon, non tlakatl okipolo itlachialis. Ijkuak tekiua Sergio Paulo okitak non, opejki tlaneltoka.

Pablo uan Bernabé san kanin otetlapouiayaj. Itech kalmej, tiankistli, itech ojtli uan itech sinagogas. Se tonal, itech altepetl Listra, okipajtijkej se tlakatl tlen amo onejnemiaya. Akinmej okinmitakej omokuayejyekojkej Pablo uan Bernabé okatkaj dioses uan okinekiayaj kinueyichiuaskej. Pablo uan Bernabé amo okinkauilijkej uan okinmiluijkej: “¡San toTajtsin Dios moneki tikueyichiuaskej! Tejuan san titlakamej”. Satepan, oajsitoj sekimej judíos tlen okichijkej ma kikokolikan Pablo. Nochtin okimojmotlakej Pablo ika tetl uan omokuayejyekojkej okimiktijkej, ik non, okikixtijkej itech altepetl. ¡Pero Pablo ok oyoltoka! San niman, sekimej tokniuan okipaleuitoj uan oksepa okiuikakej Listra. Satepan, Pablo omokuepki Antioquía.

Itech xiuitl 49, Pablo okintlajpaloto tokniuan tlen okatkaj Asia Menor uan satepan otetlapouito kuali tlajtolmej hasta Europa. Oyajki Atenas, Éfeso, Filipos, Tesalónica uan okseki altepemej. Silas, Lucas uan se telpochtli tlen omotokayotiaya Timoteo oyayaj iuan Pablo. San sekan okinpeualtijkej yankuikej tlanechikolmej uan okinpaleuijkej tokniuan ma kipiakan chikauak intlaneltokilis. Pablo noijki oyajki altepetl Corinto uan ompa omoka se xiuitl uan tlajko para kinyolchikauaskia tokniuan. Ye otetlapouiaya, otlamachtiaya uan okintitlaniliaya cartas miakej tlanechikolmej. Noijki otekitiaya, ye okinchijchiuaya mantajkalmej. Satepan, Pablo omokuepki Antioquía.

Itech xiuitl 52, Pablo oyajki okseki altepemej, achto oyajki Asia Menor. Oyajki ik norte hasta oajsito altepetl Filipos uan satepan oajsito altepetl Corinto. Pablo omoka altepetl Éfeso miak xiuitl, ompa otlamachtiaya, okinpajtiaya akinmej omokokoayaj uan okinpaleuiaya tokniuan. Noijki, mojmostla otlamachtiaya iTlajtol toTajtsin Dios inmixpan miakej itech se escuela. Miakej okikakej tlen otlamachtiaya Pablo uan okipatlakej inyelis. Pablo otetlapoui kuali tlajtolmej itech miakej altepemej. Saiktlami, oyajki Jerusalén.