Jesús okititi miak tlamantli Juan

Ijkuak tlatitlanil Juan otsaktoka itech se isla tlen itoka Patmos, Jesús okititi 16 tlamantli tlen panos satepan. Jesús okititi Juan ken mochipauas itoka Jehová, ken uits iTekiuajkayo uan ken mochiuas itlanekilis nikan Tlaltikpak ijkon ken mochijtok iluikak.

Achto, Juan okitak Jehová itech itrono tlen kajki iluikak. Noijki 24 tlayekankej okiyaualoayaj itrono Jehová. Yejuan okipiayaj se corona tlen ochijchijtoka ika oro uan intlaken istak. Itech itrono Jehová okisayaj ken rayos uan omokakiaya chikauak otlatijtikuiniaya. 24 tlayekankej omotlankuaketsayaj ixpan Jehová uan okiueyichiuayaj. Satepan, Juan okinmitak sapanoa miakej tlaltikpaktlakamej. Yejuan oualayaj itech miakej altepemej uan otlajtoayaj tlatlamantli tlajtolmej uan okiueyichiuayaj Jehová. Se Ichkatsin tlen kineskayotia Jesús okinyekanaya kanin okatka atl tlen kitemaka yolilistli. Noijki, Juan okitak Jesús opejki tlanauatia iluikak iuan 24 tlayekankej. Satepan, Juan okitak Jesús omoteuijtoka iuan Dragón tlen kineskayotia Satanás, noijki iuan amo kuali ejekamej. Jesús okinkixti iluikak uan okinualtlamotlak nikan Tlaltikpak.

Juan noijki okitak Ichkatsin iuan 144,000 (ciento cuarenta y cuatro mil) tlen omoketokaj ipan tepetl Sion. Satepan, okitak se ángel opatlantinemiaya itech nochi Tlaltikpak uan okijtoaya: “Xiktlakaitakan toTajtsin Dios uan xikueyichiuakan”.

Juan noijki okitak guerra Armagedón. Itech non guerra, Jesús uan isoldados okipojpolojkej nochi tlen Satanás kiyekantok. Saiktlami, Juan okitak itech iluikak uan Tlaltikpak nochtin kuali omouikayaj uan okipiayaj yolseuilistli. Noijki okitak ken okinmixpolojkej Satanás uan nochtin akinmej kipaleuiaj. Nochtin akinmej katej iluikak uan Tlaltikpak, kitlakaitaj itoka toTajtsin Dios tlen chipauak uan san ye kiueyichiuaj.