Carta tlen okijkuilo Cuerpo Gobernante

Tokniuan:

Akinmej tikueyichiuaj Jehová tikpatioitaj Biblia. Tikneltokaj tlen itech ijkuilitok melauak opanok, noijki techiluia tlen uelis tikchiuaskej itech tonemilis uan kiteititia Jehová melauak techtlasojtla (Salmo 119:105; Lucas 1:3; 1 Juan 4:19). Tiknekij ika nochi toyolo tikinpaleuiskej oksekimej ma kimatikan tlen melauak tlamachtia iTlajtol toTajtsin Dios. Ik non, tiyolpakij timechmakaskej nin amochtli tlen itoka: Nechpaktia tlen nechmachtia Biblia. Timechiluiskej ken ijkuilitok nin amochtli.

Nin amochtli omoijkuilo para konemej. Pero noijki kinpaleuis akinmej yiuejueyij tlen kinekij okachi kimatiskej itech Biblia. Tinochtin techpaleuia iTlajtol toTajtsin Dios, ik non, tla timomachtiaj nin amochtli, techpaleuis itech tonemilis uan melauak tiyolpakiskej.

Nochi tlen nikan ijkuilitok omokixti itech Biblia, peua techmachtia ken toTajtsin Dios okichijchi nochi tlen onka. Otimochijchikajkej para amo oui xikajsikamatikan nin amochtli uan noijki otikijkuilojkej ijkon ken opanotia.

Nin amochtli amo san techtlapouia itech Biblia. Tlen nikan ijkuilitok uan tlaixkopinalmej namechpaleuiskej xikitakan ken okatka innemilis akinmej moijtoaj itech Biblia uan ken omomachiliayaj.

Biblia techtlapouia itech akinmej okitlakamatkej Jehová uan akinmej amo okitlakamatkej. Itech nin amochtli tikitaskej ken techpaleuis tlen okinpanok (Romanos 15:4; 1 Corintios 10:6). Nin amochtli kinpia 14 secciones. Ijkuak peua se sección moijtoa tlen techmachtia sejse tlamachtil.

Tla tikinpia mokoneuan, san sekan xikintlajtoltikan tlamachtilmej uan xikijtokan tlen namechmachtiaj tlaixkopinalmej. Satepan, uelis nankintlajtoltiskej tlaxelolmej kanin omokixtijkej tlamachtilmej. Xikinpaleui mokoneuan ma kajsikamatikan tlen kijtoa Biblia noijki moijtoa itech tlamachtil tlen nanmomachtiskej. Noijki ijkon uelis tikchiuas ijkuak tikmachtis se tlakatl noso siuatl uan ijkon ye kajsikamatis Biblia.

Tiknekij nin amochtli ma kinpaleui konemej uan nochtin akinmej yolkualmej, ma momachtikan iTlajtol toTajtsin Dios uan ma kichiuakan itech innemilis tlen momachtiskej. Ijkon yejuan noijki kixmatiskej Jehová uan kiueyichiuaskej.