TLAMACHTIL 17
¿Tlen okichi Jesús?
Ijkuak timomachtiaj tlen okichi Jesús uan tlen okijto, okachi tiknekij iuan timouikaskej uan noijki iuan Jehová. ¿Tlen okichi Jesús uan ken uelis tikchiuaskej ken ye?
1. ¿Tleka tikijtouaj Jesús kichiua ken iTajtsin?
Yikipia miak xiuitl Jesús kajki iluikak uan kita Jehová tetlasojtla uan ye noijki ijkon kichiua ikinon Jesús mokuayejyekoua uan kichiua ken iTajtsin (xiktlajtolti Juan 5:19). Jesús melauak kichiua ken iTajtsin ikinon okijto: “Akin yonechitak noijki yokitak noTajtsin” (Juan 14:9). Ikinon tla okachi tikixmatis Jesús, okachi tikixmatis Jehová. Ijkuak tikitaj Jesús oteiknomatki, tikajsikamatij Jehová noijki techiknomati.
2. ¿Ken okiteititi Jesús kitlasojtla iTajtsin?
Jesús okijto: “Ne nikchiua nochi tlen noTajtsin onechnauati para nochtin makimatikan niktlasojtla noTajtsin” (Juan 14:31). Ijkuak Jesús okatka nikan tlaltikpak, okiteititi okitlasojtlaya iTajtsin porque nochipa okitlakamatki maski otlajyoui. Jesús okipaktiaya kintlapouis oksekimej tlen kichiua iTajtsin uan noijki okinpaleui iuan mamouikakan (Juan 14:23).
3. ¿Ken okiteititi Jesús techtlasojtla?
Biblia kijtoua Jesús sapanoua kintlasojtla “inkoneuan tlaltikpaktlakamej” (Proverbios 8:31). Okiteititi techtlasojtla porque ijkuak okatka nikan tlaltikpak oteyolchika, okinpaleui oksekimej uan amo okichiuaya para itlaj makimakakan. Ijkuak okinchi milagros amo san okiteititi okipiaya chikaualistli, noijki okiteititi teiknomati (Marcos 1:40-42). Otetlasojtlaya uan amo otechikoitaya . Noijki okinyolseuiaya uan okimiluiaya oksekimej satepan kuali yetoskiaj, ikinon omotemakak para makitlajyouiltikan uan makimiktikan. Ye sapanoua techtlasojtla pero okachi kintlasojtla akinmej kitlakamatij (xiktlajtolti Juan 15:13, 14).
MATIMOMACHTIKAN
Okachi matikixmatikan Jesús, non techpaleuis matitetlasojtlakan ken ye tetlasojtla uan matikinpaleuikan oksekimej.
4. Jesús kitlasojtla iTajtsin
Jesús otechititi tlen moneki tikchiuaskej uan ijkon toTajtsin Dios kitas melauak tiktlasojtlaj. Xiktlajtoltikan Lucas 6:12, Juan 15:10 uan 17:26 uan satepan xikitakan tlen namechmachtia.
¿Ken uelis tikteititiskej tiktlasojtlaj Jehová ijkon ken Jesús okichi?
Jesús okitlasojtlaya iTajtsin uan nochipa okitlatlaujtiaya.
5. Jesús kineki kinpaleuis akinmej amitlaj kipiaj
Jesús amo san itech omotekipachouaya, okinekiaya kinpaleuis oksekimej maski ualeua osotlauaya. Xiktlajtoltikan Marcos 6:30-44 uan satepan xikitakan tlen namechmachtia.
Ijkon ken otiktlajtoltijkej, ¿ken okiteititi Jesús okitekipachouaya tlen okimachiliayaj oksekimej? (Xikitakan versículo 31, 34, 41 uan 42).
¿Tleka Jesús okinpaleui oksekimej? (Xikitakan versículo 34).
Jesús okichi ken iTajtsin, ¿ken mitspaleuia tlen ye okichi okachi xikixmati Jehová?
¿Ken uelis tikinpaleuiskej oksekimej ijkon ken okichi Jesús?
6. Jesús kipaktia kinpaleuis oksekimej
Maski Jesús amo okipiaya miak tlamantli, okipaktiaya kitemakas tlen okipiaya uan kineki tejuan noijki ijkon matikchiuakan. Xiktlajtoltikan Hechos 20:35 uan satepan xikitakan tlen namechmachtia.
Ijkon ken okijto Jesús, ¿tlen techpaleuis matiyolpakikan?
Xikitakan VIDEO uan satepan xikitakan tlen namechmachtia.
¿Ken uelis itlaj tiktemakaskej maski amo tikpiaj miak tlamantli?
¿Otikmatiaya?
Biblia kijtoua ijkuak tiktlatlaujtiaj Jehová matikchiuakan ika itoka Jesús (xiktlajtoltikan Juan 16:23, 24). Ijkon tikteititiaj tiktlasojkamatij tlen okichi Jesús porque ueli timouikaj iuan Jehová.
SEKIMEJ KIJTOUAJ: “Dios amo kitekipachoua ijkuak titlajyouiaj”.
Jesús kichiua ken iTajtsin, ikinon ¿ken tikmatij Jehová techtlasojtla?
XIKILNAMIKTO
Jesús kitlasojtla iTajtsin uan noijki techtlasojtla. Ken Jesús kichiua ken iTajtsin, tla tikyekixmatis, okachi kuali tikixmatis Jehová.
Matikojpauikan
¿Ken uelis tikteititiskej tiktlasojtlaj Jehová ijkon ken okichi Jesús?
¿Ken uelis tikteititiskej titetlasojtlaj ijkon ken okichi Jesús?
¿Tlen okachi mitspaktia tlen kichiua Jesús?
NIN NOIJKI MITSPAKTIS
Xikita seki tlamantli tlen okichi Jesús uan ken uelis ijkon tikchiuaskej.
Xikita ken techpaleuia Jesús ijkuak timotlatlaujtiaj.
“¿Tleka moneki timotlatlaujtiskej ika itoka Jesús?” (Akin Tetlapouijtok, 1 de febrero 2008)
¿Kijtoua Biblia ken omotaya Jesús?
“¿Ken omotaya Jesús?” (Nin tlamachtil kajki itech jw.org/ncx)
Jesús okintlakaitaya siuamej, ¿tlen techmachtia tlen ye okichi?
“ToTajtsin Dios kintlakaita uan kinpatioita siuamej” (Akin Tetlapouijtok, 1 de septiembre 2012)