Ken mochiuas Toteki akinmej tikchiuaj ken Cristo

Tlen kiualika

1. Nin amatl techpaleuis tinochtin akinmej titlamachtiaj uan tikitaj Toteki akinmej tikchiuaj ken Cristo ijkuak timonechikouaj. Noijki matikitakan tlen kijtoua Toteki akinmej tikchiuaj ken Cristo (Tlen timomachtiskej itech nechikol) ijkuak timoyektlaliskej para titlamachtiskej. Xikinyolchikauakan nochtin akinmej tetlapouiaj makipanoltikan se tlamachtil. Akinmej touan monechikouaj uelis kipanoltiskej se tlamachtil tla kineltokaj uan kichiuaj tlen tlamachtia Biblia. Tokni tlen kita akinmej kipanoltiskej tlamachtilmej itech Toteki akinmej tikchiuaj ken Cristo moneki motlapouis iuan akin kineki kipanoltis se tlamachtil tla ayamo tetlapouia. Ijkon moneki iuan motlapouis para kiluis tlen moneki kichiuas para uelis kipanoltis se tlamachtil uan satepan kiluis kox yiuelis kipanoltis. Ijkuak iuan motlapouiskej moneki ompa mayeto akin kimachtia Biblia noso se ipapa tlen tlaneltoka. Tlen moneki kichiuas akin kineki kipanoltis se tlamachtil noijki tlen moneki para akin yitetlapouis (od-S cap. 8 párr. 8).

TLEN TIMOMACHTISKEJ

2. Se minuto. Achto titlakuikaskej uan timotlatlaujtiskej. Satepan akin kiyekanas nechikol Toteki akinmej tikchiuaj ken Cristo kijtos tlen timomachtiskej uan noijki kijtos tlen okachi techpaleuis.

KEN TECHPALEUIA BIBLIA

3. Tlamachtil (10 minutos). Itech Toteki akinmej tikchiuaj ken Cristo kijtoua tlen itoka tlamachtil uan kipia ome noso eyi tlamantli miak ipati. Nin tlamachtil moneki kipanoltis se tlayekanki noso se siervo ministerial tlen kuali tlamachtia. Tikitaskej se video ijkuak peuas se amochtli tlen kipia Biblia. Tokni tlen kipanoltis non tlamachtil uelis kijtos seki tlamantli tlen kijtoua video pero moneki kiyekijtos tlen tlamachtia Toteki akinmej tikchiuaj ken Cristo. Uelis tlamachtis ika fotos tlen ompa katej hasta kajxitis 10 minutos. Tokni noijki uelis kijtos okseki tlamantli tla kinpaleuis tokniuan makajsikamatikan tlamachtil.

4. Matiktemokan ken techpaleuia Biblia (10 minutos). Akin kipanoltis nin tlamachtil moneki yetos se tlayekanki noso se siervo ministerial tlen kuali tlamachtia. Amo moneki itlaj kijtos ijkuak peuas nion ijkuak tlamis. San moneki kintlajtlanis tokniuan tlen ompa kijtoua uan yejuan tlanankiliskej. Noijki kitas kox kintlajtoltiskej nochi textos tlen ompa katej. Tokniuan moneki tlanankiliskej san kanaj 30 segundos.

5. Motlajtoltis (4 minutos). Kipanoltis se tokni tlakatl. Amo moneki itlaj kijtos ijkuak peuas nion ijkuak tlamis kitlajtoltis Biblia. Akin kiyekanas nechikol moneki kipaleuis akin kitlajtoltis Biblia kuali mamoajsikamati tlen kitlajtoltis, amo mamotsitsikojti, yolik makitlajtolti uan chikauak makijto tlen miak ipati. Tokni tlen kita akinmej kipanoltiskej tlamachtilmej itech Toteki akinmej tikchiuaj ken Cristo moneki kuali kipejpenas akin kitlajtoltis Biblia porque ualeua moneki kintlajtoltiskej miakej textos.

OKACHI KUALI MATITLAMACHTIKAN

6. Quince minutos. Nin sección techpaleuis kuali matimoyektlalikan para titetlapouiskej uan titlamachtiskej. Tokniuan tlayekankej noijki uelis kipanoltiskej tla moneki. Akinmej kipanoltiskej uelis mopaleuiskej ika amatlajkuilol “Kuali titlamachtis” noso amatlajkuilol “Xitetlasojtla” tlen kijtoua Toteki akinmej tikchiuaj ken Cristo. Seki semanas tikitaskej seki tlamachtilmej inuan nochtin tlen kipanoltis se tlayekanki noso se siervo ministerial tlen kuali tlamachtia (Xikita párrafo 15 ken moneki tikpanoltis tlamachtil inuan nochtin).

7. Ijkuak ikaj peuas tiktlapouis. Nin tlamachtil uelis kipanoltis se tokni tlakatl noso se tokni siuatl. Tla panos se tlakatl moneki kipaleuis se tlakatl noso ifamiliar. Noijki tla panos se siuatl moneki kipaleuis se siuatl noso ifamiliar. Uelis motlaliskej noso moketoskej. (Xikinmita párrafos 12 uan 13 tla tikneki okachi tikmatis kanin moijtoua ken titlamachtis uan kanin moijtoua kanin titetlapouis).

8. Oksepa xitetlajpaloti. Nin tlamachtil uelis kipanoltis se tokni tlakatl noso se tokni siuatl. Tla panos se tlakatl moneki kipaleuis se tlakatl, tla panos se siuatl moneki kipaleuis se siuatl (km-S 5/97 pág. 2). Uelis motlaliskej noso moketoskej. Akin panos makiteititi tlen uelis kijtos ijkuak oksepa kitlajpaloti akin okitlapoui. (Xikinmita párrafos 12 uan 13 tla tikneki okachi tikmatis kanin moijtoua ken titlamachtis uan kanin moijtoua kanin titetlapouis).

9. Xitlamachti. Nin tlamachtil uelis kipanoltis se tokni tlakatl noso se tokni siuatl. Tla panos se tlakatl moneki kipaleuis se tlakatl, tla panos se siuatl moneki kipaleuis se siuatl (km-S 5/97 pág. 2). Uelis motlaliskej noso moketoskej. Mamota yopejki momachtiaj. Amo moneki itlaj kijtos tokni ijkuak peuas nion ijkuak tlamis tlamachtis. San uelis itlaj kijtos tla okiluijkej ijkon makichiua.

10. Xikyekijto tlen tikneltoka. Tla mopanoltis ken se tlapoualistli moneki kipanoltis se tlakatl. Tla kiteititiskej ken tlanankiliskej uelis kipanoltis se tokni tlakatl noso se tokni siuatl. Tla panos se tlakatl moneki kipaleuis se tlakatl noso ifamiliar. Noijki tla panos se siuatl moneki kipaleuis se siuatl noso ifamiliar. Akin kipanoltis makiteititi amo kualani ijkuak tlanankilis uan kuali makinankili tlajtlanil tlen ompa ijkuilitok. Tla kineki uelis kijtos kanin okiski tlamachtil.

11. Tlapoualistli. Nin kipanoltis se tokni tlakatl uan kipanoltis ken se tlamachtil. Ijkuak kisas itech amatlajkuilol Xitetlasojtla itech Okseki tlamachtilmej 1, tokni moneki kijtos ken uelis titetlapouiskej ika textos tlen ompa katej. Uelis kiyekijtos tlen kijtosneki non versículo, keman uelis ikaj tiktlajtoltiliskej noso ken techpaleuis ikaj iuan matimotlapouikan. Ijkuak kisas itech se tlamachtil tlen kipia amatlajkuilol Xitetlasojtla moneki kijtos ken techpaleuis ijkuak titetlapouiskej. Tla kita tepaleuis uelis kijtos tlen kipia punto 1 tlen kipia non tlamachtil noso okseki versículos tlen ompa katej.

12. Kanin moijtoua ken titlamachtis. Nin párrafo uan okse kijtoua tlen moneki tikchiuas “Ijkuak ikaj peuas tiktlapouis” uan ijkuak ‘Oksepa titetlajpaloti’. Tla amo kiluiaj makichiua okse tlamantli akin kipanoltis nin tlamachtil, moneki kiteititis ken uelis tetlapouis ika se texto tlen amo oui uan makiteititi tlen uelis kichiuas para oksepa tetlajpaloti. Noijki moneki kiteititis tlen okachi kinpaleuis akinmej chantij kanin tetlapouia. Tla kineki uelis kitemakas se amatlajkuilol noso kiteititis se video tlen ika titlamachtiaj. Amo san xikijto tlen otikojpaui. Moneki mamokaki ikaj iuan timotlapouijtok uan xiktlapoui tlen kineki kimatis.

13. Moijtoua kanin titetlapouis. Akin kipanoltis nin tlamachtil moneki kiteititis ken uelis tetlapouis ik kanin chanti. Matikitakan ken uelis tikchiuas:

(1) Ijkuak titetlapouia kajkalpan. Ijkon tikintlapouis akinmej tikintlapouia inkalijtik, ijkuak tikinnotsa ika teléfono uan ijkuak tikinmijkuililia se carta.
(2) Ijkuak san kanin titetlapouia. Nin kijtosneki titetlapouis maski san kanin tiyetos maski tikchijtos okseki tlamantli. Uelis ijkon tikchiuas ijkuak tikintlajtoltilis se texto akinmej inuan titekipanoua, akinmej inuan timomachtia, akinmej chantij ik kanin tichanti uan ijkuak tio itech carro.
(3) Ijkuak titetlapouia ika carrito. Ijkon tikchiuaj ijkuak titetlapouiaj ika carritos. Noijki ijkon uelis tikchiuas ijkuak titetlapouia kanin tlanemakaj, itech ojtli kanin miakej panouaj, itech parques, kanin kinketsaltiaj carros noso kanin miakej katej.

14. Xikinteititi videos uan amatlajkuilolmej. Akin kipanoltis nin tlamachtil ye kijtos kox kiteititis se video noso se amatlajkuilol. Tla tlamachtil tlen tikpanoltis kipia se video noso tikneki ijkon tikchiuas, amo xiktlali uan san xikyekijto tlen ompa mota.

TIKCHIUAJ KEN CRISTO

15. Ijkuak timomachtiskej nin tlamachtil, moneki achto titlakuikaskej. Nin tlamachtil uejkauas 15 minutos uan kipanoltiskej se noso ome tlamachtilmej tlen techpaleuiskej matikchiuakan tlen kijtoua Biblia. Moneki kipanoltis se tlayekanki noso se siervo ministerial tlen kuali tlamachtia. Pero san tlayekankej kipanoltiskej kanin kijtoua “Tlen moneki tikchiuaskej”. Ijkuak mopanoltis se tlamachtil inuan nochtin, tokni tlen kiyekana tlamachtil uelis kintlajtlanis okseki tlamantli uan amo san tlen ompa ijkuilitok. Amo makijto miak tlamantli ijkuak kipeualtis tlamachtil para uelis kiyekijtos tlen okachi miak ipati uan noijki miakej tlanankiliskej. Tla ikaj kitlajtlaniskej seki tlamantli, tla uelis mapano tlayekapan uan amo san matlanankili kanin euatok.

16. Matimomachtikan se amochtli (30 minutos). Nin tlamachtil kipanoltis se tlayekanki tlen kuali tlamachtia (tla amo katej miakej tlayekankej, uelis kipanoltiskej siervos ministeriales tlen kuali tlamachtiaj). Tlayekankej kitaskej akinmej kipanoltiskej nin tlamachtil. Akin kipanoltis tlamachtil moneki uejkauas san 30 minutos. Noijki makita tlen textos kintlajtoltiskej uan makinpaleui tokniuan makajsikamatikan tlen okachi ipati. Kipaleuis tlen kijtoua revista Akin Tetlapouijtok 23.04 pág. 24, tlen ijkuilitok itech recuadro. Ompa kijtoua ken kiyekanas tlamachtil. Tla tokni yokiyekijto nochi tlamachtil, amo moneki kajxitis 30 minutos. Sejse semana uelis mopatlatiaskej akinmej kiyekanaskej nin tlamachtil uan akinmej kintlajtoltiskej párrafos. Tokni tlen kiyekanas nechikol uelis kiluis akin kiyekanas nin tlamachtil amo mauejkaua 30 minutos. Ijkuakon ye moneki kitas ken kichiuas. Kipaleuis tla amo kintlajtoltis seki párrafos.

TLEN OTIMOMACHTIJKEJ UAN TLEN TIMOMACHTISKEJ CHIKOME

17. Tres minutos. Tokni tlen otlayekanki ijkuak otimonechikojkej kijtos seki tlamantli tlen otimomachtijkej. Noijki makijto tlen timomachtiskej chikome uan tla uelis makijto akinmej panoskej. Tla moneki kijtos seki tlanauatilmej noso kitlajtoltis se carta, makichiua ijkuak yitlamis timomachtiskej. Amo moneki kijtos kanin titetlapouiskej noso akinmej tlachipauaskej porque kitlaliskej se amatl itech tablero. Tla moneki kijtos seki tlanauatilmej noso kintlajtoltis cartas, makinmilui tokniuan tlen kipanoltiskej tlamachtil “Tikchiuaj ken Cristo” amo mauejkauakan (xikinmita párrafos 16 uan 19). Ijkuak tlamis timomachtiskej titlakuikaskej uan timotlatlaujtiskej.

KINMILUISKEJ TOKNIUAN KEN OKACHI KUALI TLAMACHTISKEJ

18. Tokni tlen kiyekanas nechikol, kiyolchikauas akin kipanoltis tlamachtil uan kiluis ken kichiuas ijkon ken kijtoua tlamachtil tlen kipanoltis. Moneki uejkauas san se minuto. Ijkuak kijtos akin panos, amo moneki kijtos tlen tlamachtil kitekitiltis. Ijkuak tokni yokipanolti tlamachtil uan yokiyolchikajkej, akin kiyekanas nechikol uelis kijtos tlen tlamachtil okitekitilti, tlen kuali okichi noso ken okachi kuali tlamachtis. Noijki uelis kijtos okseki tlamantli tlen okichi tokni tla kinpaleuis tokniuan. Ijkuak tlamis nechikol noso okse tonal, uelis kiluis okseki tlamantli tlen moneki kichiuas ijkon ken kijtoua amatlajkuilol Xitetlasojtla, Kuali titlamachtis noso amochtli Benefíciese. (Xikinmita párrafos 19, 24 uan 25 ompa kijtoua tlen okseki tlamantli moneki kichiuas akin kiyekanas nechikol Toteki akinmej tikchiuaj ken Cristo uan noijki consejero auxiliar).

¿KESKI MINUTOS UEJKAUAS IJKUAK TIMONECHIKOSKEJ?

19. Nochi tlamachtilmej moneki uejkauaskej san minutos tlen kipiaj uan noijki tlen kijtos akin kiyekanas nechikol. Toteki akinmej tikchiuaj ken Cristo kijtoua keski minutos mopanoltis se tlamachtil pero non amo kijtosneki kajxitis nochi minutos akin kipanoltis tla kuali yotlamachti. Tokni tlen kiyekana nechikol noso consejero auxiliar uelis motlapouiskej iuan akin kipanoltia se tlamachtil tla uejkaua. Satepan uelis kiluiskej tlen moneki kichiuas (xikinmita párrafos 24 uan 25). Nochi mopanoltis san se hora uan 45 minutos.

IJKUAK TECHTLAJPALOS TLAYEKANKI ITECH CIRCUITO

20. Ijkuak techtlajpalos tlayekanki itech circuito, timomachtiskej ijkon ken kijtoua Toteki akinmej tikchiuaj ken Cristo san mopatlas seki tlamantli. Amo mochiuas “Matimomachtikan se amochtli” porque tlayekanki itech circuito kipanoltis se tlamachtil tlen uejkauas 30 minutos. Tokni tlen kiyekanas nechikol kijtos tlen otimomachtijkej uan tlen timomachtiskej chikome, uelis kintlajtoltis cartas noso kijtos seki tlanauatilmej tlen moneki kimatiskej tokniuan. Satepan kijtos tlen tlamachtil kipanoltis tlayekanki itech circuito. Ijkuak yotlamachti tlayekanki itech circuito, tlamis ika se tlakuikali tlen ye okipejpenki. Ye uelis kiluis se tokni mamotlatlaujti. Amo motekitiltiskej salas auxiliares ijkuak techtlajpalos tlayekanki itech circuito. Ijkuakon grupos tlen okse tlamantli tlajtouaj uelis sekan monechikoskej. Pero noijki san sekan monechikoskej inmiuan tokniuan tlen okintlajpaloko tlayekanki itech circuito uan ijkon kinkakiskej tlamachtilmej tlen kinpanoltis tokni.

IJKUAK MOCHIUAS UEYI NECHIKOL

21. Amo timonechikoskej ijkuak tikpiaskej ueyi nechikol. Akin kiyekanas nechikol moneki kimilnamiktis tokniuan mamomachtikan inselti noso iuan infamilia tlen timomachtiskej non semana.

IJKUAK TIKILNAMIKISKEJ IMIKILIS JESÚS

22. Amo timonechikoskej tla tlajko semana tikilnamikiskej imikilis Jesús.

TLAYEKANKI TLEN KITA KEN TIMOMACHTISKEJ TOTEKI AKINMEJ TIKCHIUAJ KEN CRISTO

23. Tlayekankej kipejpenaskej akin kitas ken timomachtiskej Toteki akinmej tikchiuaj ken Cristo. Ye kitas kuali makinpanoltikan tlamachtilmej ijkuak timonechikoskej uan mamochiua ken kijtoua nin amatl. Moneki mopaleuis iuan consejero auxiliar. Ijkuak kisas Toteki akinmej tikchiuaj ken Cristo, moneki san niman makinpejpena uan makinmilui akinmej kipanoltiskej se tlamachtil non ome metstli. Tokniuan tlen kipanoltiskej se tlapoualistli uan akin kiyekanas nechikol, moneki kipanoltiskej tokniuan tlen tlayekankej yokijtojkej uelis ijkon kichiuaskej (xikinmita párrafos 3 hasta 16 uan 24). Ijkuak kinpejpenaskej moneki kitaskej keski xiuitl kipia, kox uelis kipanoltis uan kox kichiua tlen kiyekijtos. Akinmej tlamachtiskej moneki kanaj eyi semanas achto makinmiluikan. Sekimej moneki kinmakaskej amatsintli tlen itoka Akinmej panoskej itech Toteki akinmej tikchiuaj ken Cristo (S-89). Tokni noijki moneki kitlalis programa itech tablero. Tlayekankej uelis kitlaliskej okse tlayekanki noso se siervo ministerial makipaleui akin kita ken kinpejpenas akinmej tlamachtiskej. Pero san tlayekankej uelis kijtoskej akinmej kipanoltiskej se tlapoualistli.

AKIN KIYEKANAS NECHIKOL IJKUAK TIMOMACHTISKEJ TOTEKI AKINMEJ TIKCHIUAJ KEN CRISTO

24. Sejse semana se tlayekanki kiyekanas nechikol ijkuak timomachtiskej Toteki akinmej tikchiuaj ken Cristo. Tla amo katej miakej tlayekankej, uelis kiyekanas se siervo ministerial tlen kuali tlamachtia. Akin kiyekanas nechikol kijtos seki tlamantli ijkuak peuas uan ijkuak tlamis. Kijtos akinmej kinpanoltiskej tlamachtilmej uan tla amo katej miakej tlayekankej noijki kinpanoltis seki tlamachtilmej. Amo moneki uejkauas ijkuak kijtos tlen tlamachtil peuas. Uelis ijkon kichiuas tla moneki san kitlaliskej se video. Noijki techtlajtlanis tlen techmachtiaj videos kanin mota ken titetlapouiskej. Amo moneki kijtos miak tlamantli ijkuak kijtos akinmej panotiaskej. Tlayekankej kijtoskej akinmej kiyekanaskej nechikol uan mopatlatiaskej akinmej okinpejpenkej ijkon makichiuakan. Akin kita ken mochiuas Toteki akinmej tikchiuaj ken Cristo xamo monekis okachi miak uelta kiyekanas nechikol. Noijki uelis kiyekanas nechikol tokni tlen ueli kipanoltia “Matimomachtikan se amochtli”. Pero akin kiyekanas nechikol moneki kimatis ken kinyolchikauas tokniuan tlen kipanoltiskej se tlamachtil. Noijki moneki kimatis ken kinyekiluis tokniuan seki tlamantli tlen kinpaleuis kuali matlamachtikan. Noijki moneki makita tonechikol mauejkaua san se hora uan 45 minutos (xikinmita párrafos 17 uan 19). Tla plataforma ueyi, uelis kitlaliskej okse micrófono tlen kitekitiltis akin kiyekanas nechikol uan ijkon kinyektlaliliskej atril akinmej panotiaskej. Noijki uelis kitlaliskej se mesa uan se silla kanin motlalis akin kiyekanas nechikol ijkuak panos tokni tlen kitlajtoltis Biblia uan ijkuak kipanoltiskej tlamachtil “Okachi kuali matitlamachtikan”. Ijkon amo okachi tiuejkauaskej.

CONSEJERO AUXILIAR

25. Moneki kipejpenaskej se tlayekanki tlen kuali tlamachtia. Nin tokni kinmiluis tlayekankej noso siervos ministeriales ken okachi kuali tlamachtiskej itech Toteki akinmej tikchiuaj ken Cristo. Uelis ijkon kichiuas ijkuak kipanoltiskej se tlamachtil, ijkuak kiyekanaskej revista Akin Tetlapouijtok, ijkuak kiyekanaskej “Matimomachtikan se amochtli” uan ijkuak kintlajtoltiskej párrafos (xikita párrafo 19). Sejse xiuitl uelis kipatlaskej consejero auxiliar tla katej miakej tlayekankej tlen kuali tlamachtiaj. Pero amo moneki nochipa kinmiluis ken okachi kuali tlamachtiskej.

CLASES AUXILIARES

26. Uelis motekitiltiskej salas auxiliares tla katej miakej tokniuan tlen tlamachtiaj. Kinyekanas se tlayekanki tlen kuali tlamachtia. Uelis kinyekanas se siervo ministerial tlen kuali tlamachtia tla amo katej miakej tlayekankej. Tlayekankej kitaskej akinmej yetoskej itech salas auxiliares uan kox mopatlatiaskej. Tokni tlen tlayekanas itech sala auxiliar moneki kichiuas tlen kijtoua párrafo 18. Kinmiluiskej akinmej tlamachtiskej mayakan sala auxiliar ijkuak tlamis tlamachtil “Matiktemokan ken techpaleuia Biblia”. Tokniuan oksepa yaskej kanin omotlalijkej ijkuak yotlamachtijkej.

VIDEOS

27. Ijkuak tikpiaskej tonechikol Toteki akinmej tikchiuaj ken Cristo, tikinmitaskej videos tlen katej itech aplicación JW Library®.

S-38-NHC 11/23